ހަމަލައާ ގުޅިގެން މާލޭ ޖަލާއި މާފުށީ ޖަލުގައި ޚާއްސަ އޮޕަރޭޝަނެއް ހިންގަނީ
12 ޖޫން 2021 | ހޮނިހިރު 04:08މި އޮޕަރޭޝަން ކުރިއަށް ގެންދިޔުމަށް ހަމަޖެހިފައިވަނީ ފުލުހުންނާއި ސިފައިންނާއި ކަރެކްޝަންސް ގުޅިގެން
މާފުށީ ޖަލު
ރައްޔިތުންގެ މަޖިލީހުގެ ރައީސް, ރައީސް މުހައްމަދު ނަޝީދަށް ދިން ހަމަލާއާ ގުޅިގެން މާލޭ ޖަލާއި މާފުށީ ޖަލުގައި ޚާއްސަ އޮޕަރޭޝަނެއް ހިންގަން ފަށައިފިއެވެ.
ރައީސް ނަޝީދަށް އަމާޒުކޮށް ދެވުނު ޓެރަރިޒަމްގެ ހަމަލާއާއި ހަރުކަށި ފިކުރާ ދެކޮޅަށް ފުލުހުންނާއި ސިފައިން ގެންދަނީ ޚާއްސަ އޮޕަރޭޝަންތަކެއް ހިންގަމުނެވެ. މާލެއާއި މާފުށީ ޖަލުގައި ކުރިއަށްގެންދާ ޚާއްސަ މި އޮޕަރޭޝަނަކީ، ފުލުހުންނާއި ސިފައިން ހިންގަމުންދާ އެހެނިހެން އޮޕަރޭޝަންތަކާ ގުޅިގެން، ކުރިއަށް ގެންދެވޭ އޮޕަރޭޝަނެއް ކަމަށް މޯލްޑިވްސް ކަރެކްޝަނަލް ސާވިސް އިން މައުލޫމާތުދެއެވެ.
ހޮނިހިރު ދުވަހު މި އޮޕަރޭޝަން ކުރިއަށް ގެންދިޔުމަށް ހަމަޖެހިފައިވަނީ ފުލުހުންނާއި ސިފައިންނާއި ކަރެކްޝަންސް ގުޅިގެންނެވެ.
މެއި 6 ވަނަ ދުވަހު ދިން ޓެރަރިސްޓް ހަމަލާއަށްފަހު މިހާރު ކުރިއަށްގެންދާ ތަހުގީގަށް އެކި ގޮތްގޮތުން މައުލޫމާތު ހާމަކޮށްފައިވާ 150ށް ވުރެ ގިނަ މީހުން އެބަތިބި ކަމަށް ފުލުހުން މައުލޫމާތުދެއެވެ. އަދި އާންމު ފަރާތްތަކުން ލިބުނު މައުލޫމާތާއި ފުލުހުންގެ ތެރެއިން ލިބުނު މައުލޫމާތުގެ މައްޗަށް މިހާތަނަށް ޖުމްލަ 25ށް ވުރެ ގިނަ ތަންތަން ބަލައި ފާސްކޮށްފައިވެއެވެ.
ހަމަލާއާ ގުޅިގެން މިހާތަނަށް ސީދާ އެ މައްސަލައާ ގުޅުންހުރި 4 މީހަކު ވަނީ ހައްޔަރުކޮށްފައެވެ. އަދި ހަރުކަށި ފިކުރު ފަތުރާ އަދި ރާވައި ހިންގާކަމުގެ ތުހުމަތުގައި 10 މީހަކު ހައްޔަރުކޮށްފައިވެއެވެ.
