241 ކޮމިޓީން އެސިސްޓަންޓް ކޮމިޝަނަރ އޮފް ޕޮލިސްއާ ސުވާލުކޮށްފި

ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ ސެކިޔުރިޓީ ފެއިލްވިގޮތުގެ އިންކުއަރީ ކުރިޔަށްގެންދާ ރައްޔިތުންގެ މަޖިލީހުގެ 241 ކޮމިޓީއަށް، އެސިސްޓަންޓް ކޮމިޝަނަރ އޮފް ޕޮލިސް މުހައްމަދު ރިޔާޒް ވަޑައިގެން ކޮމިޓީގެ ސުވާލުތަކަށް ޖަވާބު ދެއްވައިފިއެވެ.

241 ކޮމިޓީން ކުރިޔަށްގެންދާ އިންކުއަރީއަށް މިހާތަނަށް ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލްއާއި ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަބްދުއްރަހީމް ޢަބްދުއްލަތީފްއާއި މާލެ ސިޓީގެ ކުރީގެ މޭޔަރ ޝިފާ މުހައްމަދާއި މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ، މުޙައްމަދު އަސްލަމްގެ އިތުރުން ޕޮލިސް ކޮމިޝަނަރު މުޙައްމަދު ޙަމީދު ވެސް ވަނީ ކޮމިޓީއަށް ވަޑައިގަންނަވާފައެވެ. ކޮމިޓީގެ ބައްދަލުވުންތައް ކުރިޔަށްދަނީ މީޑިޔާއަށް ނުވަދެވޭ ގޮތަށް ސިއްރުކޮށްގެންނެވެ. މި ތަހުގީގަށް ފުލުހުންނާއި ސިފައިންގެ އިތުރުން ކަމާގުޅުންހުރި އިދާރާތަކުގެ ބޭފުޅުން ހާޒިރުކޮށް ސުވާލުކުރުމަށް ކޮމިޓީން ވަނީ ނިންމާފައެވެ.

ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާގައި އެމަނިކުފާނުގެ ސެކިއުރިޓީ ފެއިލްވި ގޮތާ ގުޅިގެން ސަލާމަތީ ޚިދުމަތްތަކާ ބެހޭ ކޮމިޓީން ކުރިޔަށް ގެންދާ އިންކުއަރީގައި އެމްއެންޑީއެފްގެ އޮފިސަރުންގެ ތެރެއިން 29 ބޭފުޅަކާ ސުވާލުކުރުމަށް ކޮމިޓީން ނިންމާފައިވާކަމަށް ކޮމިޓީގެ މުގައްރިރު މުހައްމަދު އަސްލަމް ވަނީ ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވިދާޅުވެފައެވެ. އަސްލަމް ވިދާޅުވީ އެ އަދަދަށް ބަދަލު އައުމަކީ އެކަށީގެންވާ ކަމެއްކަމަށެވެ. އެންމެ ފުރަތަަމަ ކޮމިޓީން ނިންމާފައިވަނީ 29 އޮފިސަރުންނާ ސުވާލުކުރުމަށް ކަމަށެވެ. އެހެންނަމަވެސް އިންކުއަރީއަށް ބޭނުންވާ މައުލޫމާތު ލިބޭ ކަމަށް ކޮމިޓީއަށް ގަބޫލުކުރެވޭ ކަމަށްވާނަމަ ދެން މައުލޫމާތު ސާފުކުރުމަށް ބޭނުންވާ އެހެން އޮފިސަރުންގެ ފަރާތުން މައުލޫމާތު ސާފުނުކޮށް ވެސް ހިނގައިދާނެކަމަށް އަސްލަމް ވިދާޅުވިއެވެ.

އަސްލަމް ވިދާޅުވީ ލިޔެކިޔުމުން ލިބިފައިވާ މައުލޫމާތުގެ އަލީގައި ފާހަގަކުރެވޭ ބައެއް ބޭފުޅުންނަށް ބައެއް މަގާމުތަކުގެ މަސްއޫލިއްޔަތު އަދާކުރައްވައި އެ ބޭފުޅުންނަށް މިހާރު ސުވާލުކުރުމަށް ދަންނަވަމުން ގެންދަވާކަމަށެވެ. އަދި އިތުރަށް އިންޓަރވިއުތަކުން ފާހަގަކުރެވޭ ކަންކަމާއި އެނގިގެންދާ ކަންކަމުގެ މައްޗަށް ބިނާކޮށް ސުވާލުކުރަން ބޭނުންވާ ފަރާތްތަކަށް ބަދަލު އަންނަމުންދާ ކަމަށް އަސްލަމް ވިދާޅުވިއެވެ. މީގެއިތުރުން ސުވާލުކުރުމަށް ވަކި އަދަދެއް ކޮމިޓީން ނިންމާފައިނުވާ ކަމަށް އަސްލަމް ވިދާޅުވިއެވެ.

އިންކުއަރީގައި އެކި ފަރާތްތަކާ ސުވާލުކުރުމަށް ފަށާފައިވަނީ މެއި މަހުގެ 5 ވަނަ ދުވަހުން ފެށިގެންނެވެ.