''އެންމެ ހިތް ދަތިވަނީ ފަހުނޭވާލާ ތަން ބަލަން''

ހާލަތު ގޯސްވެއްޖެއެވެ. ކޮންޓްރޯލް ނައްޓައިގެން ގޮސްފިކަމުގެ އިންޒާރު ސިއްޚީ މާހިރުން ދަނީ ދެމުންނެވެ. ކޮވިޑްގެ ހާލަތު އަތުން ދޫވެ، އެންމެންގެ އެއްބާރުލުމަށް ސިއްހީ ޚިދުމަތްތެރިން ތިބީ އެދިއެދިއެވެ. ބައްޔަށް ހުށަހެޅޭ މީހުން އިތުރުވެ، ބަލީގައި ދުނިޔެ ދޫކޮށްދާ މީހުންގެ ރޭޓް މަތިވީއެވެ. ފާއިތުވި މަސްދުވަހުގެ ތެރޭގައި ގިނަ ބަޔަކު އަޅުގަނޑުމެންނާ ދާއިމަށް ވަކިވެދިޔައީއެވެ. މި ފަނާވަނިވި ދުނިޔެއަށް އަލްވަދާއު ކީއެވެ. ކޮންމެ ދުވަހަކު ކަހަލަ ގޮތަކަށް ''ހުޅުމާލެ މެޑިކަލް ފެސިލީޓީ'' ގައި ފަރުވާ ހޯދަމުން ދިޔަ މީހަކު ނިޔާވި ޚަބަރު ނީވޭ ދުވަހެއް މަދުވާނެއެވެ. މިއާއެކު ހުޅުމާލެ މެޑިކަލް ފެސިލިޓީން ގިނަ ބަޔަކު ނިޔާވަނީ ކީއްވެތޯއާއި، ދެމުންދާ ޚިދުމަތްތަކާ ބެހޭ ގޮތުން ސުވާލު އުފައްދާފައިވެއެވެ.

''އެންމެ ހިތް ދަތިވަނީ ފަހުނޭވާލާތަން ބަލަން'' މިއީ އޭނަ ވާހަކަ ފެށިގޮތެވެ. ނަން ނުޖެހުމަށް ޝަރުތުކޮށް އޭނާ ކިޔައިދިން ގޮތުގައި ހުޅުމާލޭގެ މެޑިކަލް ފެސިލިޓީގައި ޚިދުމަތްތައް ފުރިހަމައެވެ. ވަސީލަތްތައް ވަނީ ގާއިމުކުރެވިފައެވެ. ނަމަވެސް ބަލި ޖެހޭ މީހުންގެ ރޭޓް އިންތިހާއަށް ގިނަވެ، ގިނަ ބަޔަކު ހުޅުމާލެ މެޑިކަލް ފެސިލިޓީގައި އެޑްމިޓް ކުރިއެވެ. ގިނަ ބަލި މީހުންނަކީ ދާއިމީ ބައްޔަށް ފަރުވާ ހޯދަމުންދާ މީހުންނަށްވާތީ އެމީހުންނަށް ޚާއްސަ އިސްކަމެއް ދޭން ޖެހެއެވެ. މީގެ ތެރޭގައި ޑަޔަލިސިސް ހަދާ މީހުންނާއި، ލޭ މައްޗަށްދާ މީހުންނާއި، ހަކުރު ބަލި ފަދަ ބަލިތައް ހުރި މީހުން ހިމެނެއެވެ. އަދި އަމިއްލައަށް ތެދުވެ ނޫޅެވޭ ވަރުގެ އުމުރުން ދުވަސްވީ ބަލި މީހުން ތިބިކަން އޭނާ ފާހަގަކުރިއެވެ.

ސިއްހީ ޚިދުމަތްތެރިޔާ ބުނި ގޮތުގައި މެއި މަހަކީ ބިރުވެރި ހިތް ދަތިމަހެކެވެ. ކޮންމެ ދުވަހަކު ކަހަލަ ގޮތަކަށް ކޮންމެވެސް މީހެއްގެ މާމައެއް، ކާފައެއް، މަންމައެއް ނުވަތަ ބައްޕައެއް މަރުވާ މަންޒަރު ލޮލަށް ފެންނަ ކަމަށާއި، އެވަގުތު ސިފަ ކުރަން ވެސް ނޭނގޭ ކަމަށެވެ. އޭނާ ކިޔައިދިން ގޮތުގައި އުމުރުން ދުވަސްވީ ބައެއް މީހުން ހާލު ސިރިއަސްވެ ކުއްލި ގޮތަކަށް ނިޔާވެސްވެފައި އެބަހުއްޓެވެ. އޮކްސިޖަން ލެވަލް އިންތިހާއަށް ދަށްވެ ފުރާނަ ދަނީއެވެ.

މި ޚިދުމަތްތެރިޔާ ބުނިގޮތުގައި މެއި މަހުގެ ތެރޭގައި ނަރުހުންނާއި ޑޮކްޓަރުންނަށް އެކަށީގެންވާ ގޮތެއްގައި ޙިދުމަތް ދެވޭ ވަރަށް ވުރެ ކޮވިޑަށް ފަރުވާ ހޯދަން އެޑްމިޓްކުރި މީހުންގެ އަދަދު ވަނީ ވަރަށް ބޮޑަށް އިތުރުވެފައެވެ.

އެހެންކަމުން ޚިދުމަތްތެރިން ވީ މަދެވެ. ކޮންމެ ނަރުހަކަށް 10 ޕޭޝަންޓު ބަލަން ޖެހުނު ދުވަސްތައް އައިކަން އޭނާ ފާހަގަކުރިއެވެ. ނަމަވެސް މިހާރު ސިއްހީ ޚިދުމަތްތެރިންނަށް އެހީތެރިކަން ފޯރުކޮށްދިނުމުގެ ގޮތުން ނަރުސްކަން ކިޔަވާ ކުދިން ވަނީ ވޮލަންޓިއަރުންގެ ގޮތުގައި ފްރޮންޓްލައިނަށް ނެރެފައެވެ. އަދި މި މިފަރާތްތަކަށް އިތުރަށް އެހީތެރިކަން ފޯރުކޮށްދިނުމުގެ ގޮތުން ބަލި މީހުންނަށް އިތުރަށް އަޅާލުމަށްޓަކައި އިތުރު ވޮލަންޓިއަރުން ވެސް ވަނީ މިހާރު ފެސިލިޓީގައި މަސައްކަތްކުރަން ފަށާފައެވެ.

ސިއްހީ ޚިދުމަތްތެރިޔާ ކިޔައިދިން ގޮތުން ފެސިލިޓީގައި ސާފުތާހިރުކަން ކުޑައެއް ނޫނެއެވެ. އަބަދުވެސް ސާފުކުރާ މީހުންނާއި، ފެސިލިޓީގެ ކަންކަން ބަލަހައްޓާ މީހުން އުޅެއެވެ. ނަމަވެސް ގިނަ ބަޔަކު އުޅޭ ތަނަކަށްވާއިރު، ކޮންމެވެސް ކަހަލަ މައްސަލަތަކެއް ކުރިމަތިވެދާނެ ކަމަށް އޭނާ ބުނެއެވެ. އަދި އެއީ އެތަނެއްގެ އުޅޭ ބައެއްގެ ސާފުތާހިރުކަމަށް ކަންކަން ޑިޕެންޑްވާ ކަމަށެވެ.

ހުޅުމާލެ މެޑިކަލް ފެސިލިޓީގައި ގާއިމްކޮށްފައިވަނީ ބްލޮކް ތަކަކަށް ބަހައިގެންނެވެ. އެގޮތުން އޭ ބްލޮކް 1، 2، 3 ހިމެނޭއިރު، ބީ-ބްލޮކްގައި އަވަސްފަރުވާއަށް ވަނީ ޚާއްސަ ކޮށްފައެވެ. އަދި އޭ ބްލޮކްގެ ގްރައުންޑްގައި ގާއިމުކޮށްފައިވަނީ އައިސީޔޫއެވެ. ފެސިލިޓީން އެއްވެސް ވަރަކަށް ބޭރު ނުފެނުނު ކަމުގައި ވީނަމަވެސް އޭ ބްލޮކް 1، 2، 3 އަކީ ޖާގަ ތަނަވަސް ތަނެއް ކަމަށާއި އެތަނުގައި ކެރަމް ބޯޑް، ތާސް ފަދަ ކުޅިވަރުތައް ކުޅެވޭނެ އިންތިޒާމް ވަނީ ހަމަޖައްސާފައެވެ.

ބިރުވެރި ހާލަތުން އަރައިގަތުމަށް ސިއްހީ ޚިދުމަތްތެރިން ހޭބޯނާރާ ދަނީ މަސައްކަތް ކުރަމުންނެވެ. ވަރުބަލިވި ނަމަވެސް އެކަމެއް ނުދައްކައެވެ. އެ ޚިދުމަތްތެރިންގެ ފުރާނަ ވެސް ނުރައްކަލުގެ ތެރެއަށް ވައްޓާލުމަށްފަހު، އާއިލާއާ ދުރުގައި އެތައް މަސްދުވަސްދުވަސް ހޭދަކުރަމުންދާއިރު، ޚިދުމަތްތެރިން އެދެމުންދަނީ އާއްމު ރައްޔިތުންގެ އެއްބާރުލުމަށެވެ.