މިއަހަރުގެ ތެރޭގައި ރާއްޖޭގެ އަންއެމްޕްލޯއިމެންޓް ރޭޓް ދަށްވެ، އެމްޕްލޯއިމެންޓް ރޭޓް މަތިވާނެ ކަމަށް ފިނޭންސް މިނިސްޓްރީން ބުނެފިއެވެ.

ފިނޭންސް އިން އާންމުކޮށްފައިވާ މައުލޫމާތުތައް ދައްކާގޮތުން މިއަހަރު ރައްޖޭގެ އިގުތިސާދު ރަނގަޅުވާނެ ކަމަށް ލަފާކުރެވިފައިވާތީ މި އަހަރުގެ ތެރޭގައި އަންއެމްޕްލޯއިމެންޓް ދަށްވެ، އެމްޕްލޯއިމެންޓް އިތުރުވާނެ ކަމަށް ލަފާކުރެވޭ ކަމަށް ވަނީ ފާހަގަކޮށްފައެވެ.

ފިނޭންސް އިން އާންމުކޮށްފައިވަ މައުލޫމާތުތައް ދައްކާގޮތުން 2020 ވަނަ އަހަރުގެ މެދުތެރޭގައި ރާއްޖޭގެ އެމްޕްލޯއިމެންޓް ރޭޓް ވަނީ ވަރަށް ބޮޑަށް ދަށަށް ގޮސް، އަންއެމްޕްލޯއިމެންޓް ރޭޓް މަތިވާން ފަށާފައެވެ. އެގޮތުން ކޮވިޑް-19 އާ ގުޅިގެން ވަޒީފާ ގެއްލުނު އަދި މުސާރައިން އުނިކޮށްފައިވާ ފަރާތްތަކަށް އިންކަމް ސަޕޯޓް އެލަވަންސް ދޫކުރުމަށް އެކުލަވާލި ޖޮބްސެންޓަރުގެ ޕޯޓަލްގައި އޭޕްރިލް މަހުން ފެށިގެން މީހުން ރަޖިސްޓްރީވަމުން ދިޔައިރު، ފުރަތަމަ ތިން މަހު ރަޖިސްޓްރީވި މީހުންނަށް ވުރެ ކުރިއަށް އޮތް ފަސް މަހު ރަޖިސްޓްރީވި މީހުންގެ އަދަދު ބޮޑުތަނުން އިތުރުވެގެން ދިޔައެވެ.

އޭޕްރިލް މަހު 3،861 މީހުން ޖޮބްސެންޓަރުގައި ރަޖިސްޓްރީވެފައިވާއިރު، މެއި މަހު ރަޖިސްޓްރީވެފައި ވަނީ 4،092 މީހުންނެވެ. އަދި ޖޫން މަހު 3،871 މީހުން ވަނީ ޖޮބްސެންޓަރުގައި ރަޖިސްޓްރީވެފައެވެ. ޖުލައި މަހުން ފެށިގެން ޖޮބްސެންޓަރުގައި ރަޖިސްޓްރީވާ މީހުންގެ އަދަދު އިތުރުވާން ފަށާފައިވާއިރު، އެމަހު އެކަނިވެސް 12،095 މީހުން ވަނީ ޖޮބްސެންޓަރުގައި ރަޖިސްޓްރީވެފައެވެ. އޮގަސްޓް މަހު 13،806 މީހުން، ސެމްޓެމްބަރު މަހު 13،149 މީހުން އަދި އޮކްޓޫބަރު މަހު 13،162 މީހުން ވަނީ ރަޖިސްޓްރީކޮށްފައެވެ. ނޮވެމްބަރު މަހުން ފެށިގެން މިއަަދަދު ދަށްވާން ފެށިއިރު، އެމަހު ރަޖިސްޓްރީކޮށްފައި ވަނީ 12،804 މީހުންނެވެ. އަދި ޖެހިގެން އައި ޑިސެމްބަރު މަހު މި އަދަދު ވަނީ 7،818ށް ދަށްވެފައެވެ.

ފިނޭންސް އިން ބުނީ މިދިޔަ އަހަރުގެ ޖޫން މަހު ރާއްޖޭގެ ބޯޑަރު އަލުން ހުޅުވާލުމާއެކު ފަތުރުވެރިކަމުގެ ސިނާއަތް ކުރިއަރަން ފެށުމާއި ސަރުކާރުން އިކޮނޮމިކް ރިކަވަރީ އަދި އިކޮނޮމިކް ސްޓިމިއުލަސް ޕެކޭޖްތައް ތައާރަފުކުރުމުން، އިގުތިސާދު ކުރިއަރަންފަށައި އޭގެ އަސަރު ވަޒީފާތަކަށް ކޮށްފައިވާކަމަށެވެ.

ޕެންޝަން އޮފީހުގައި ރަޖިސްޓަރ ކޮށްފައިތިބި މުވައްޒަފުންގެ އަދަދު މި ދިޔަ އަހަރު ދަށަށް ދިޔަ ނަމަވެސް މިއަހަރުގެ ފެބްރުއަރީ މަހު އެ އަދަދު 2019 ވަނަ އަހަރާ އެއްވަރަށް މަތިވެފައިވާކަމަށް ފިނޭންސް އިން ފާހަގަކުރެއެވެ.