އީސަގެ މައްސަލަ ޕީޖީއަށް ފޮނުވަން ތައްޔާރުވެއްޖެ
މައްސަލަ ރިޕޯޓް ކުރީ މެއި 18 ވަނަ ދުވަހުގެރޭ
އަހްމަދު އީސާ، ކެނދިކުޅުދޫ ދާއިރާގެ މެމްބަރު
އީސަގެ މައްޗަށް ތުހުމަތުކުރާ ގެވެށި އަނިޔާގެ މައްސަލައިގެ ދައުވާކުރުމަށް ޕީޖީއަށް ފޮނުވުމަށް ތައްޔާރު ވެއްޖެއެވެ.
ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެންބަރު އަޙްމަދު އީސާގެ މައްޗަށް ފުލުހުން ތަހުގީގު ކުރަމުން އަންނަ ގެވެށިއަނިޔާ ކުރުމުގެ މައްސަލައިގެ ތަހުގީގު ނިންމައި ދައުވާކުރުމަށް ޕްރޮސެކިއުޓާ ޖެނަރަލްގެ އޮފީހަށް ފޮނުވުމަށް ތައްޔާރުވެފައިވީނަމަވެސް އިތުރު ތަފްސީލެއް ފުލުހުން ނުދެއްވައެވެ.
ފުލުހުން ބުނީ އެ މައްސަލަ ޕީޖީ އޮފީހަށް ފޮނުވުމަށްޓަކައި އެންމެ ފަހުގެ މަސައްކަތްތައް ކުރަމުން އަންނަ ކަމަށެވެ.
އީސަގެ ގެވެށި އަނިޔާގެ މައްސަލަ ފުލުހުންނަށް ރިޕޯޓުކޮށްފައިވަނީ މި މަހުގެ 18 ވަނަ ދުވަހުގެރެއެވެ. އިސައާ ދެކޮޅަށް ގެވެށި އަނިޔާގެ މައްސަލަ ހުށަހެޅުއްވީ އީސަގެ ކުރީގެ އަނބިކަނބަލުން އަސްރާ ނަސީމެވެ. އެ މައްސަލާގައި ފުލުހުންނަށް ބަޔާން ދެއްވުމަށްފަހު އަސްރާގެ ފޭސްބުކް ސްޓޭޓަސްގައި ބުނެފައިވަނީ، އެ ކުރެވުނު ތަޖުރިބާއަކީ އެކަމަކަށް ދުވަހަކު ވެސް އުއްމީދުކޮށްގެން ހުރި ތަޖުރިބާއެއް ނޫން ކަމަށެވެ. އަދި ދަރިފުޅާއި އޭނާއަށް ވެސް މިއީ ވަރަށް ވެސް އުނދަގޫ ވަގުތެއް ކަމަށެވެ.
މި މައްސަލަ ކުރިއަށް ނުގެންދިޔުމަށް ކުރީގެ އަނބިކަނބަލުން އަސްރާ އެދުނެވެ. އެހެންނަމަވެސް ފުލުހުން ބުނީ، އެ މައްސަލައަކީ ޖިނާއީ މައްސަލައަކަށްވާތީ އިސަގެ ކުރީގެ އަނބިކަނބަލުން އަސްރާ ނަސީމް، މައްސަލަ ކުރިއަށް ނުގެންދިޔުމަށް އެދުނު ނަމަވެސް ތަހުގީގު ކުރިއަށްދާނެ ކަމަށެވެ. މި މައްސަލަ ކުރިއަށް ނުގެންދިއުމަށް އަސްރާ ފުލުހުންގެ ކިބައިން އެދުނީ ކީއްވެގެންކަން ފުލުހުން ހާމައެއް ނުކުރެއެވެ.
ދަރިފުޅުގެ މަންމައަށް އެއްވެސް މީހަކު އިހާނެތި ބަހެއް ބުނުމަށް ނޭދޭ ކަމަށް ބުނެ އީސަ ވަނީ ފޭސްބުކް ޕޯސްޓެއް ވެސް އާއްމު ކުރައްވާފައެވެ.
މެމްބަރު އީސައަށް ތުހުމަތުކުރެވޭ މައްސަލައިގެ ތަހުގީގަށް އޭނާ ހައްޔަރު ކުރުމުގެ އަމުރަކަށް ޕީޖީ އޮފީހުން ކްރިމިނަލް ކޯޓުގައި އެދުނު ނަމަވެސް މި މައްސަލައިގައި ކްރިމިނަލް ކޯޓުން ނިންމާފައިވަނީ މެމްބަރު އީސަ ހެއްކަށް ނުފޫޒު ފޯރުވާނެކަމަށް ބެލެވޭނެ ޖާގައެއް ނެތް ކަމަށެވެ. އެހެންކަމުން އޭނާ ހައްޔަރުކުރުމުގެ އަމުރެއް ނެރެދެވެން ނެތް ކަމަށް ކްރިމިނަލް ކޯޓުން ވަނީ ނިންމާފައެވެ.
