ފެންބޮޑުވުމުގެ މައްސަލަ ސީރިއަސްވަނީ އެތެރޭގެ މަގުތައް ހަދާތީ - މޭޔަރ
30 މެއި 2021 | އާދީއްތަ 16:20ނަރުދަމާ ނިޒާމު ރަނގަޅު ކުރުމަށް ބައެއް ސާމާނު ވަނީ ގެނެވިފައި
ފުވައްމުލަކުގައި މެއި މަހުގެ ތެރޭގައި ފެންބޮޑުވެފައި
ފުވައްމުުލަކުގައި ފެންބޮޑުވުމުގެ މައްސަލަ އެހާ ސީރިއަސްވަނީ، އެތެރޭގެ މަގުތައް ހަދަމުން އަންނަތީ ކަމަށް ފުވައްމުލައް ސިޓީގެ މޭޔަރ އިސްމާއީލް ރަފީގު ވިދާޅުވެއްޖެއެވެ.
ރާއްޖެޓީވީގެ ފަލަ ސުރުޚީ ޕްރޮގްރާމްގައި ވާހަކަދައްކަވަމުން މޭޔަރ ވިދާޅުވީ، ފުވައްމުލަކު އެތެރޭގެ މަގުތައް ހަދާތީ، ރަށުގެ އެކި ސަރަހައްދުގައި ފެން ދައުރުވާން ހުރި ކާނުތައް ބެދިފައިވާ ކަމަށާއި ވަކި ސަރަހައްދު ތަކެއްގައި، ފެން ހަރުލަނީ ކަމަށެވެ. މިގޮތަށް ފެން ހަރުލުމުގެ ސަބަބުން މާރޗް އަދި މެއި މަހުގައި ކުރި ވިއްސާރައިގައިވެސް ފުވައްމުލަކުގެ 400 ވަރަކަށް ގެއަށް ފެން ވަދެ އެކި ވަރުގެ ގެއްލުން ވަނީ ލިބިފައެވެ.
އިސްމާއީލް ރަފީގް ވިދާޅުވީ، ރަނގަޅު ފެން ހިންދާ ނިޒާމެއް ގާއިމް ކުރުމަށް މިހާރު ޕްލޭނިންގ މިނިސްޓްރީއާކު މަސައްކަތް ކުރަމުން އަންނަ ކަމަށެވެ. މިހާރު ފުވައްމުލަކުގައި ގާއިމް ކުރުމަށް ނިންމަފައިވާ ސްޓޯމް ވޯޓަރ ސިސްޓަމަކީ، އެ ސިޓީއަށް އެންމެ އެކަށީގެންވާ ސިސްޓަމަކަށް ނުވާތީ ދާއިމީ ހައްލެއް ހޯދުމުގެ މަސައްކަތް ފަށާފައިވާ ކަމަށެވެ.
ފުވައްމުލަކުގައި ގާއިމު ކޮށްފައިވާ ނަރުދަމާ ނިޒާމުގެ މައްސަލަ ހައްލު ކުރުމަށް ފެނަކައާ މިހާރު ހަވާލުކޮށްފައިވާއިރު އެކަމަށް ބޭނުންވާ ބައެއް ސާމާނު އެ ސިޓީއަށް މިހާރު ވަނީ ގެންގޮސްފައެވެ. އެކަމަށް ބޭނުންވާ ސާމާނު ރާއްޖެއިން ބޭރުން ގެނައުމަށް އޯޑަރު ކޮށްފައިވާ ކަމަށް ފެނަކައިން މީގެ ކުރިން ވަނީ ބުނެފައެވެ. އަދި މިކަމަށް ދާއިމީ ހައްލެއް ހޯދައިދޭނެ ކަމުގެ ޔަގީންކަން ފެނަކައިން ދީފައިވެއެވެ.
