ކުރިއަށް އޮތް 12 ގަޑިއިރު ތެރޭ ބަންގާޅު ކަނޑުގައި އުފެދިފައިވާ ކޮޅިގަނޑު ބާރުގަދަ ތޫފާނަކަށް ބަދަލުވެގެން ދާނެ ކަމަށް އިންޑިއާގެ މީޓިއޮރޮލޮޖިކަލް ޑިޕާޓްމެންޓުން ބުނެފިއެވެ.

"ޔާސް" ގެ ނަމުން ނަންދެވިފައިވާ މި ކޮޅިގަނޑު ބާރުގަދަ ތޫފާނަކަށް ބަދަލުވެ އިންޑިއާގެ އިރުމަތީ އައްސޭރިއަށް ދަތުރުކުރަމުން ދާތީ އެ ސަރަހައްދުގެ ތިރި ހިސާބުތަކުގައި ދިރިއުޅެމުންދާ މީހުން ވަނީ ރައްކާތެރި ހިޔާތަކަށް ބަދަލުކޮށްފައެވެ.

މި ކޮޅިގަނޑު ބާރުގަދަ ތޫފާނަކަށް ބަދަލުވެ, ގަޑިއަކު 110 މޭލަށް ވައި ގަދަވާނެ ކަމަށް އިންޑިއާގެ މީޓިއޮރޮލޮޖިކަލް ޑިޕާޓްމެންޓުން ލަފާކޮށްފައިވެއެވެ. އެއާއެކު މި ކޮޅިގަނޑު އިންޑިއާގެ އިރުމަތީ ދެ ސްޓޭޓް ކަމަށްވާ ވެސްޓް ބެންގޯލް އަދި އޮޑިޝާއަށް ބުދަ ދުވަހު މެންދުރު ފޯރާނެ ކަމަށް ލަފާ ކޮށްފައިވެއެވެ.

ޔާސް ކޮޅިގަނޑު އިންޑިއާއާ ކައިރިވަމުން މި ދަނީ, ޓައުކްޓޭ ތޫފާން އިންޑިއާއަށް އެރިތާ އެންމެ 10 ވަރަކަށް ދުވަސް ފަހުންނެވެ. އެ ތޫފާނުގައި 150ށް ވުރެ ގިނަ މީހުން މަރުވެފައިވެއެވެ.

ބަންގާޅު ކަނޑުގައި އުފެދުނު ތޫފާން އިންޑިއާގެ އިރުމަތީ އައްސޭރިއަށް ދަތުރުކުރަމުން ދާއިރު, އެގައުމުގެ ވައިގެ އަދި ކަނޑުގެ ސިފައިން ތިބީ ތޫފާނުގައި ލިބިދާނެ ގެއްލުންތަކަށް އެހީތެރިކަން ފޯރުކޮށްދޭން ތައްޔާރުގައެވެ. އެގޮތުން އިންޑިއާ ސިފައިންގެ ހެލިކޮޕްޓަރުތަކާއި އެހެނިހެން އުޅަނދުތައްވެސް ވަނީ ތައްޔާރުކޮށްފައެވެ. ހަމައެހެންމެ އޮޑީޝާގެ ޑިޒާސްޓާ ރެޕިޑް އެކްޝަން ފޯސްގެ 800އަށް ވުރެ ގިނަ މީހުން ރިލީފް މަސައްކަތްތަކުގައި ހަރަކާތްތެރިވުމަށް ތައްޔާރުވެތިބި ކަމަށް ރިޕޯޓުތައް ބުނެއެވެ.