މެންދުރާ ހަމައަށް އައްޑޫއާއި ފުވައްމުލައް ސިޓީއަށް ވައިގަދަވާނެ
އެ ގަޑި ތަކުގައި ކަނޑުވެސް ގަދަވާނެ
ފުވައްމުލަކަށް މި މަހު ކުރި ވިއްސާރައިގައި އެ ސިޓީގެ މަގެއްގައި ފެން ބޮޑުވެފައި
އަންގާރަ ދުވަހުގެ މެންދުރާ ހަމައަށް އައްޑޫ ސިޓީން ފެށިގެން ފުވައްމުލައް ސިޓީއަށް ވައި ގަދަ ވާނެ ކަމަށް މެޓް އޮފީހުން ބުނެފިއެވެ.
މޯލްޑިވްސް މީޓިއޮރޮލޮޖިކަލް ސާރވިސް އިން ބުނީ، އަންގާރަ ދުވަހުގެ ހެނދުނު 8:00ން ފެށިގެން މެންދުރު 1:00ށް އައްޑޫ ސިޓީން ފުވައްމުލައް ސިޓީއަށް ވައިގަދަވާނެތީ ދެ ސިޓީގެ ރައްޔިތުން ވެސް ސަމާލު ވުމަށް އެދޭ ކަމަށެވެ. އެގޮތުން އެ ސަރަހައްދަށް ގަޑިއަކު 19 މޭލާއި 24 މޭލާ ދެމެދުގެ ބާރު މިނުގައި ވައި ޖެހި ވިލާ ގަނޑުގައި 45 މޭލަށް ވައި ގަދަވާނެ ކަމަށެވެ. އަދި ކަނޑުވެސް އެ ވަގުތުތަކުގައި ގަދަވާނެތީ، ކަނޑުމައްޗަށް އަރާއިރު ސަމާލުވުމަށް އިލްތިމާސް ކޮށްފައިވެއެެވެ.
މި މަހުގެ ތެރޭގައި އައި ކޮޅިކަނޑުގައި އައްޑޫ ސިޓީއާ ފުވައްމުލައް ސިޓީއަށްވަނީ ބޮޑެތި ގެއްލުން ލިބިފައެވެ. ފުވައްމުލައް ސިޓީއަށް މެދު ކެނޑުމެއްނެތި ވެހުނު ވާރޭގައި އެ ސިޓީގެ 400އެއްހާ ގެއަށް ފެން ވަދެފައިވެއެވެ. އަދި 15 އާއިލާއެއް ވަގުތީ ހިޔާތަކަށް ބަދަލު ކުރިއެވެ. އޭގެ އިތުރުން ހިފައި ގެންގުޅޭ ސާމާނާއި ގޭގޭ ގެ ފަރުނީޗަރަށް ވެސް ބޮޑެތި ގެއްލުންތައް ލިބިފައިވެއެވެ.
އައްޑޫ ސިޓީއަށް ވެސް ކުރި ވިއްސާރައިގައި ގަސްތައް ވެއްޓި ގޭގެއަށް ފެން ވަނުމުގެ ހާދިސާތައް ވެސް ވަނީ ދިމާވެފައެވެ.
