މިމަހު ނިޔާވި 39 މީހުންގެ ތެރެއިން 60 އިންސައްތަ މީހުން ވެކްސިންގެ އެއްވެސް ޑޯޒެއް ނުޖަހާ: ޑރ. ނަޒްލާ މުސްތަފާ
20 މެއި 2021 | ބުރާސްފަތި 07:42ވެކްސިން ޖެހިކަމަށް ބަލަނީ އެއްޑޯޒް ޖަހާތާ 14 ދުވަސް ހަމަވުމުން
ޓެގްގައި ހިމެނިވަޑައިގަންނަވާ، ޕީޑިއޮޓްރިކް އިންފެކްޝަންސް އެކްސްޕާޓް، ޑރ. ނަޒްލާ މުސްތަފާ
ކޮވިޑް-19ގައި މި މަހު ނިޔާވި 39 މީހުންގެ ތެރެއިން 60 އިންސައްތަ މީހުން ވެކްސިންގެ އެއްވެސް ޑޯޒެއް ނުޖަހާ ކަމަށް ޓެކްނިކަލް އެޑްވައިޒަރީ ގްރޫޕް (ޓެގް)ގައި ހިމެނިވަޑައިގަންނަވާ، ޕީޑިއޮޓްރިކް އިންފެކްޝަންސް އެކްސްޕާޓް، ޑރ. ނަޒްލާ މުސްތަފާ ވިދާޅުވެއްޖެއެވެ.
ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ޑރ. ނަޒްލާ ވިދާޅުވީ ވެކްސިން ޖެހިކަމަށް ބަލަނީ އެއްޑޯޒް ޖަހާތާ 14 ދުވަސް ހަމަވުމުން ކަމަށެވެ. އެގޮތުން މި މަހު ނިޔާވި 39 މީހުންގެ ތެރެއިން 60 އިންސައްތަ މީހުން އެއްވެސް ޑޯޒެއް ނުޖަހާ ކަމަށެވެ. އަދި 20 އިންސައްތަ މީހުން އެއްޑޯޒް ޖަހާފައިވާއިރު، ދެ ޑޯޒު ޖަހާފައިވަނީ 12 އިންސައްތަ މީހުން ކަމަށް ކަމަށް ޑރ. ނަޒްލާ ވިދާޅުވިއެވެ.
އާބާދީގެ ބޮޑު އިންސައްތައަކަށް ވެކްސިން ދިނުމަށް ޚާއްސަ މަސައްކަތްތައް ކުރާކަން ފާހަގަކުރައްވައި ޑރ. ނަޒްލާ ވިދާޅުވީ މާލެސިޓީގެ އާބާދީގެ 60 އިންސައްތައަށް ވެކްސިން ދެވިފައިވާ ކަމަށެވެ.
ބަލީގައި ނިޔާވި އުމުރުފުރާއަށް އަލިއަޅުއްވާލައްވައި ޑރ. ނަޒްލާ ވިދާޅުވީ ނިޔާވި މީހުންގެ ތެރެއިން 80 އިންސައްތައަކީ 60 އަހަރުން މަތީގެ މީހުން ކަމަށެވެ. އަދި 17 އިންސައްތަ އަކީ 60 ދަށުގެ މީހުން ކަމަށެވެ.
ޑރ. ނަޒްލާ ވިދާޅުވީ މިބަލީގައި ނުރައްކާ ބޮޑީ އުމުރުން ދުވަސްވީ މީހުންނަށް އެކަނި ނޫން ކަމަށެވެ. މިހާރު ވެސް އައިސީޔޫގައި 40 އަހަރު ދަށުގެ 35 އިންސައްތަ މީހުންނަށް ފަރުވާ ދެމުންދާކަން ޑރ. ނަޒްލާ ފާހަގަކުރެއްވިއެވެ.
ޑރ. ނަޒްލާ ވިދާޅުވީ ބަލިން ރައްކާތެރިވުމަށް ހުރިހާ އުމުރުފުރައެއްގެ މީހުން ވެސް ސަމާލުވާން ޖެހޭ ކަމަށެވެ. ކޮވިޑްގެ ބަލިން ރަނގަޅުވުމަށްފަހު ވެސް އެތައް ދުވަހަކަށް އުދަނގޫތައް ހުންނަ ކަމަށާއި، އަމިއްލަ ދިރިއުޅުމަށް ރުޖޫއަވާން ދުވަސް ނަގާނެ ކަމަށް ޑރ. ނަޒްލާ ވިދާޅުވިއެވެ. އަދި ކަނޑައަޅާފައިވާ އުސޫލުތަކާއި ގައިޑްލައިންތަކަށް އަމަލުކުރުމަށް އެދިފައިވާއިރު، ވެކްސިން ނުޖަހާ މީހުން ވެކްސިން ޖެހުމަށް ވަނީ އިލްތިމާސްކޮށްފައެވެ.
