މިލާނާއި ކަލިއާރީ އެއްވަރު، ޔުވެންޓަސްއަށް އުއްމީދެއް

އިޓާލިއަން ލީގުގައި އާދީއްތަ ދުވަހުގެރޭ އޭސީ މިލާނާއި ކަލިއާރީ ބައްދަލުކުރި މެޗު އެއްވަރުވުމުން، ގަދަ ހަތަރެއްގެ ޖާގައެއް ހޯދަން މަސައްކަތްކުރަމުން އަންނަ ޔުވެންޓަސްއަށް އުއްމީދެއް ލިބިއްޖެއެވެ.

މިލާނުގެ ދަނޑުގައި ކުޅުނު މެޗު އެއްވަރުވީ ދެ ޓީމުން ކުރެ ޓީމަކަށް ލަނޑެއް ނުޖެހިއެވެ.

މި މެޗުގައި ލީޑު ނަގަން ދެ ޓީމަށްވެސް ރަނގަޅު ފުރުސަތުތަކެއް ލިބިގެންދިޔައިރު، ފުރަތަމަ ހާފުގައި އެންމެ ނުރައްކާތެރި ހަމަލާއެއް އުފައްދާފައިވަނީ މިލާނުންނެވެ. އެގޮތުން އޭރިއާ ބޭރުން އެ ޓީމުގެ އެލެކްސިސް ސައެލެމައެކާސް ފޮނުވާލި ނުރައްކާތެރި ހަމަލާ ކަލިއާރީގެ ގޯލްކީޕަރު ވަނީ ދިފާއުކޮށްފައެވެ.

އަދި ދެވަނަ ހާފުގައި އޭރިއާ ތެރެއިން ކަލިއާރީގެ ލެއޮނާޑޯ ޕަވޮލެޓީ ބޮލުން ނުރައްކާތެރި ހަމަލާއެއް ފޮނުވާލިއިރު، އެ ހަމަލާ މިލާނުގެ ގޯލްކީޕަރު ޖިއަންލުއިޖީ ޑޮންނަރުއްމާ ވަނީ ހުށިޔާރުކަމާއެކު ދިފާއުކޮށްފައެވެ. އަދި އޭގެ ފަހުން ދެވަނަ ހާފުގައި މިލާނުގެ ކުޅުންތެރިންނަށް ގިނަ ފުރުސަތުތަކެއް ލިބިގެންދިޔަ ނަމަވެސް، އެ ފުރުސަތުތަކުގެ ބޭނުން ހިފިފައެއް ނުވެއެވެ.

މި މެޗުން މިލާން މޮޅުވި ނަމަ، ޔުވެންޓަސްއަށް ގަދަ ހަތަރެއްގެ ފުރުސަތު ވަރަށް ބޮޑަށް ހަނިވެގެންދާނެއެވެ. އެކަމަކު މިލާން އެއްވަރުވުމުން ގަދަ ހަތަރެއްގެ އުއްމީދެއް ޔުވެންޓަސްއަށް ލިބިގެންދިޔައިރު، އެ ޓީމު މި ވަގުތު އޮތީ ތާވަލުގެ ފަސްވަނައިގައި ކުޅުނު 37 މެޗުން ލިބުނު 75 ޕޮއިންޓާއެކުއެވެ.

ތާވަލުގެ ހަތަރުވަނައިގައި އޮތީ އާދީއްތަ ދުވަހުގެރޭ ފިއޮރެންޓީނާ އަތުން 2-0 ގެ ނަތީޖާއަކުން މޮޅުވި ނާޕޮލީއެވެ. ނާޕޮލީ އާއި ތިންވަނައިގައި އޮތް މިލާނަށް 37 މެޗުން 76 ޕޮއިންޓް ލިބިފައިވާއިރު، މިލާނަށް ކުރި ލިބެނީ ހެޑް-ޓު-ހެޑް ގަވާއިދުންނެވެ.