ފިތުރު ޒަކާތުގެ ގޮތުގައި މާލެ ސިޓީން ހަމިލިއަނަށް ވުރެ ގިނަ ރުފިޔާ

މިއަހަރު ފިތުރު ޒަކާތުގެ ގޮތުގައި މާލެ ސިޓީން ހަމިލިއަނަށް ވުރެ ގިނަ ރުފިޔާ ދައްކާފައިވާ ކަމަށް އިސްލާމިކް މިނިސްޓްރީން ބުނެފިއެވެ.

1442 ވަނަ އަހަރުގެ ފިތުރު ޒަކާތު ފައިސާގެ ތަފްސީލު ހިއްސާކޮށް އިސްލާމިކް މިނިސްޓްރީން ބުނީ މާލޭ ސިޓީގައި ފިތުރު ޒަކާތް ބަލައިގެންފައިވަނީ 1442 ރަމަޟާން 01 އިން ފެށިގެން 1442 ރަމަޟާން 30 ވަނަ ދުވަހުގެ ރޭ 8:00ށް އާ ހަމައަށް ކަމަށެވެ. ފިތުރު ޒަކާތުގެ ގޮތުގައި ލިބުނު ފައިސާގެ ޖުމްލަ 00-6,746,896 (ހަމިލިއަން ހަތްލައްކަ ސާޅީސް ހަހާސް އަށްސަތޭކަ ނުވަދިހަ ހަ ރުފިޔާ) ލިބިފައިވާއިރު، ފިތުރު ޒަކާތް ދައްކާފައިވަނީ 164392 މީހުން ކަމަށް މިނިސްޓްރީން ބުނެއެވެ.

މާލެ ސިޓީގައި ފިތުރު ޒަކާތުގެ ފައިސާ ބަހާފައިވާ ގޮތަށް އަލިއަޅުވާލައި އިސްލާމިކް މިނިސްޓްރީން ބުނީ މާލޭގައި ފަގީރުންނާއި މިސްކީނުންގެ ދަފްތަރުގައި ހިމެނެނީ 1498 މީހުން ކަމަށާއި، މި އަހަރުގެ ފިތުރު ފައިސާ ހަވާލު ކުރެވުނީ 1494 މީހުންނަށް ކަމަށެވެ. އަދި ފަގީރުންގެ ދަފްތަރަށް ބަހާފައިވާ ޖުމްލަ ފައިސާއަކީ 6,274,800.00 (ހަމިލިއަން ދެލައްކަ ހަތްދިހަ ހަތަރުހާސް އަށްސަތޭކަ ރުފިޔާ) ކަމަށް އިސްލާމިކް މިނިސްޓްރީން ބުނެއެވެ.

އިސްލާމިކް މިނިސްޓްރީން ބުނީ ފިޔަވަތި، އަމާންވެށި، ކުޑަކުދިންގެ ހިޔާ އަދި ކ. ގުރައިދޫގައި ހުންނަ ޚާއްސަ އެހީއަށް ބޭނުންވާ މީހުންގެ މަރުކަޒަށް ހަވާލު ކުރެވުނީ 47209600 (ހަތަރުލައްކަ ހަތްދިހަ ދެހާސް ނުވަދިހަ ހަރުފިޔާ) ކަމަށެވެ.

މީގެ އިތުރުން މިނިސްޓްރީން ބުނީ 1442 ރަމަޝާން 28 ވަނަ ދުވަހާ ހަމައަށް އެކައުންޓްގެ ތަފްސީލް ލިބިފައިވާ ޖުމްލަ 1472 މީހުންނަށް ފިތުރު ފައިސާ ވަނީ އެމީހުންގެ އެކައުންޓްތަކަށް ޖަމާކޮށްފައި ކަމަށެވެ. ނަމަވެސް 1442 ރަމަޟާން 30 ވަނަ ދުވަހާ ހަމައަށް އެކައުންޓް ތަފްސީލް ލިބިފައިނުވާ މީހުންގެ ފައިސާ ދެވޭނެ އިންތިޒާމުތައް ހަމަޖައްސައި އިތުރު 22 މީހުންގެ ފައިސާ މިނިސްޓްރީން ދޫކޮށްފައިވެއެވެ.

ފިތުރު ޒަކާތުގެ ފައިސާ އަކީ އެ ރަށަކަށް ލިބޭ ފައިސާ އެ ރަށެއްގައި ދިރިއުޅޭ ފަގީރުންނާއި މިސްކީނުންނަށް ޢީދު ނަމާދުގެ ކުރިން ބަހައި ހުސްކުރަން ޖެހޭ ފައިސާ އެކެވެ. އެގޮތުން އެ ރަށަކުން ލިބުނު ފައިސާ އެ ރަށެއްގައި ރަޖިސްޓްރީވެފައިވާ ފަގީރުންނާއި މިސްކީނުންނަށް ބަހާއިރު މާލެ އަދި އަތޮޅުތެރޭގެ އެކި ރަށްތަކުގައި ބޮލަކަށް ޖެހޭ އަދަދު ތަފާތުވާނެވެ.

އިސްލާމިކް މިނިސްޓްރީން ބުނީ މާލެ ސިޓީ އަދި ރަށްރަށުގައި ނަގާފައިވާ ފިތުރު ފައިސާ، އީދު ނަމާދުގެ ކުރިން އެ ރަށެއްގައި ދިރިއުޅޭ ފަގީރުންނާއި މިސްކީނުންނަށް ބަހާފައިވާ ކަމަށެވެ. މިނިސްޓްރީގެ ބެލުމުގެ ދަށުން ހުރިހާ ރަށެއްގައި ފިތުރު ފައިސާ ބަހާފައިވާއިރު ރަށްރަށުންފައިސާ ބެހިގޮތުގެ ތަފްސީލު ލިބޭނީ ހުރިހާ ކައުންސިލަކުން ތަފްސީލް ލިބުމުން ކަމަށް ވެސް އިސްލާމިކް މިނިސްޓްރީން ބުނެއެވެ.