މިއަހަރު ފިޠުރު ޒަކާތުގެ ގޮތުގައި 7.8 މިލިއަން ރުފިޔާ ލިބުނު

މިއަހަރު ފިޠުރު ޒަކާތުގެ ގޮތުގައި 7.8 މިލިއަން ރުފިޔާ އިސްލާމިކް މިނިސްޓްރީ އިން ބަލައިގެންފައިވާ ކަމަށް އެ މިނިސްޓްރީ އިން ބުނެފިއެވެ.

އެ މިނިސްޓްރީ އިން ބުނީ މިއީ އޮންލައިންކޮށް އަދި މިނިސްޓްރީގެ ކައުންޓަރުތަކުން ލިބިފައިވާ ފައިސާގެ އަދަދު ކަމަށެވެ. މި 7.8 މިލިއަން ރުފިޔާގެ ތެރޭގައި އޮންލައިންކޮށް އެހެން ރަށްރަށުން ދެއްކި ފައިސާ ހިމެނޭ ކަމަށް ވެސް މިނިސްޓްރީ އިން ބުނެފައިވެއެވެ.

ފިތުރު ޒަކާތް ދެއްކި ފަރާތްތަކުގެ ތެރެއިން ފަގީރުން ނެތް ރަށްރަށުން 450،373 ރުފިޔާ ލިބިފައިވާ ކަމަށް އިސްލާމިކް މިނިސްޓްރީން ބުނެފައިވާއިރު މާލެއިން ލިބިފައިވަނީ 7.4 މިލިއަން ރުފިޔާއެވެ. ފަގީރުން ނުހިމެނެނީ ރައްޖޭގެ 42 ރަށުގައެވެ.

ފަޤީރުންނެތް ރަށްރަށަކީ ހއ. މޮޅަދޫ، ހއ. މުރައިދޫ، ހއ. ތަކަންދޫ، ހދ. ހިރިމަރަދޫ، ށ. ބިލެތްފަހި، ށ. ފީވަށް، ށ. ކޮމަންޑޫ، ށ. ނޫމަރާ، ށ. ނަރުދޫ، ށ. މަރޮށި، ނ. މާޅެންދޫ، ނ. މަގޫދޫ، ނ.ފޮއްދޫ، ރ. އަނގޮޅިތީމު، ރ. ކިނޮޅަސް، ބ. ފުޅަދޫ، ބ. ގޮއިދޫ، ބ. ކިހާދޫ، ބ. ކެންދޫ، ކ. ހުރާ، އދ. ދިއްދޫ، އދ. މަންދޫ، އދ. ފެންފުށި، އދ. މަހިބަދޫ، ވ. ފެލިދޫ، ވ. ރަކީދޫ، ވ. ތިނަދޫ، ވ. ފުލިދޫ، މ. ދިއްގަރު، މ. ނާލާފުށި، މ. ރަތްމަންދޫ، މ. ވޭވަށް، މ. މަޑުއްވަރި، ފ. ދަރަނބޫދޫ. ފ. މަގޫދޫ، ފ. ނިލަންދޫ، ތ. ކަނޑޫދޫ، ތ. ވަންދޫ. ތ. ގުރައިދޫ، ލ. ދަނބިދޫ، ދ. ހުޅުދެލި، ދ. ރިނބިދޫއެވެ.

ފައިސާގެ އިތުރުން ގޮވާމުގެ ބާވަތްތަކުން ވެސް ފިތުރު ޒަކާތް ވަނީ ދައްކާފައެވެ. އެގޮތުން 11،399.45 ކިލޯ ގޮވާމުގެ ބާވަތްތަކުން ދައްކާފައިވާ ކަމަށް އިސްލާމިކް މިނިސްޓްރީ އިން މައުލޫމާތު ދެއެވެ. އެއީ ފިތުރު ޒަކާތުގެ ގޮތުގައި ގޮވާމުގެ ބާވަތްތަކުން ލިބުނު 10،092 ކިލޯއާއި ސަދަގާތުގެ ގޮތުގައި ލިބުނު 1،307.45 ކިލޯއެވެ.

2021 ވަނަ އަހަރު ފިޠުރު ޒަކާތުގެ ގޮތުގައި މާލެއިން 6.7 މިލިއަން ރުފިޔާ ލިބުނުއިރު އަތޮޅުތެރެއިން 4.1 މިލިއަން ރުފިޔާ ލިބިފައިވެއެވެ. މީގެ ތެރޭގައި އެ އަހަރު ރިޕޯޓް ނުފޮނުވާ 18 ރަށެއް ނުހިމަނައެވެ.