ކޮވިޑް-19 ހަލުވިކަމާއިއެކު ފެތުރެމުން އަންނާތީ މިކަމާއި ގުޅިގެން އިނގިރޭސިވިލާތުގެ ސަރުކާރުން އަޅަމުން އަންނަ ފިޔަވަޅުތަކުގެ ތެރެއިން އެގައުމުން އެކުލަވާލައިފައިވާ 'ރެޑް' ލިސްޓް ގައުމުތަކުގެ ތެރޭގައި ދިވެހިރާއްޖެ ހިމެނިއްޖެއެވެ.

ޚާރިޖީ ވުޒާރާއިން ނެރުނު ބަޔާނެއްގައި ބުނީ މި މަހުގެ 12 ވަނަ ދުވަހުގެ ފަތިހު 04:00 ން ފެށިގެން އިނގިރޭސިވިލާތުގެ 'ރެޑް ލިސްޓް' ގައުމުތަކުގެ ތެރޭގައި ރާއްޖެ ހިމެނުމަށް އިނގިރޭސިވިލާތުން ނިންމާފައިވާ ކަމަށެވެ.

ޚާރިޖީ ވުޒާރާއިން ބުނީ އިނގިރޭސިވިލާތުން ނިންމި މި ނިންމުމުގެ ސަބަބުން އިނގިރޭސިވިލާތާއި އަޔަލޭންޑުގެ ރައްޔިތުންނާއި އިނގިރޭސިވިލާތުގެ ރަށްވެހިކަމުގެ ހައްގު ލިބިފައިވާ މީހުން ފިޔަވައި އެހެން މީހުން އެގައުމަށް އެތެރެވުން މަނާވާނެ ކަމަށެވެ.

މީގެ އިތުރުން ޚާރިޖީ ވުޒާރާއިން ބުނީ އިނގިރޭސިވިލާތަށް އެތެރެވުމުގެ ހުއްދަ ލިބިފައިވާ މީހުން އެގައުމަށް އެތެރެވުމުގެ 10 ދުވަސް ކުރިން ރާއްޖެއަށް ޒިޔާރާތް ކޮށްފައިވާނަމަ ނުވަތަ ޓްރާންސިޓް ކޮށްފައިވާނަމަ، އެގައުމަށް އެތެރެވުމަށްފަހު އެގައުމުން ކަނޑައަޅާފައިވާ މަރުކަޒެއްގައި 10 ދުވަހުގެ ކަރަންޓީނު ފުރިހަމަކުރަން ޖެހޭނެ ކަމަށާއި، ކަރަންޓީނުގެ 2 ވަނަ ދުވަހާއި 8 ވަނަ ދުވަހު ކޮވިޑް ޓެސްޓު ހަދަން ޖެހޭނެ ކަމަށެވެ.

އިނގިރޭސިވިލާތުގެ 'ރެޑް' ލިސްޓަށް ރާއްޖެ އެރުމާއި ގުޅުގެން އެގައުމަށް ދަތުރުކުރުމަށް ގަސްތުކޮށްގެން ތިބި ދިވެހީން މިކަަމަށް ސަމާލުވުމަށާއި، މި ފިޔަވަޅުތަކަށް ބަދަލު އައިސްދާނެތީ ދަތުރު ކުރުމުގެ ކުރިން މައުލޫމާތު ސާފު ކުރުމަށް އިލްތިމާސް ކުރާ ކަމަށް ބުނެފައިވެއެވެ.

ރާއްޖޭގައި ކޮވިޑްގެ ހާލަތު ގޯސްވެ، ޕޮޒިޓިވްވާ މީހުންގެ އަދަދު އިތުރުވަމުން އަންނައިރު، ސިއްހީ މާހިރުން ވަނީ ރާއްޖެއަށް ކޮވިޑްގެ ހަތަރުވަނަ ރާޅު ބިންދާލައިފައިވާ ކަމަށް ބުނެފައެވެ.