މޭޑޭ މުޒާހަރާއާ ގުޅިގެން ހޯމް މިނިސްޓަރާ ސުވާލު ކުރުމަށް ހުށައަޅައިފި
3 މެއި 2021 | ހޯމަ 10:54ފަސް ސުވާލެއް މިނިސްޓަރ އިމްރާނާ ކުރަން ހުށައަޅާފައިވޭ
ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް
މަސައްކަތްތެރިންގެ ދުވަހާ ގުޅިގެން މާލޭގައި ބޭއްވި އެއްވުން ރޫޅާލުމުގައި ފުލުހުން ބާރުގެ ބޭނުންކުރި ގޮތާމެދު މިނިސްޓަރ އޮފް ހޯމް އެފެއަރޒް އިމްރާން އަބްދުﷲއާއި ސުވާލު ކުރެއްވުމަށް އެދި ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް މަޖިލީހުގެ ރައީސަށް ސިޓީއެއް ފޮނުއްވައިފިއެވެ.
ރައިޒް އަޕް އެމްވީ މޫވްމަންޓުން އިންތިޒާމުކޮށްގެން ކުރިއަށްގެންދިޔަ އެއްވުން ރޫޅާލުމަށް ފުލުހުން ހާލަތާ ނުބައްދަލު ބާރުގެ ބޭނުން ކޮށްފައިވާ ކަމަށް ބުނެ ގިނަ ބަޔަކު އެކަމުގެ ނުރުހުން ފާޅުކުރަމުންދާއިރު، އެފަދަ މަންޒަރުތައް ދައްކުވައިދޭ ވީޑިއޯތައް ދަނީ ދައުރުވަމުންނެވެ. މި ކަމާއި ގުޅިގެން މިނިސްޓަރާ ސުވާލު ކުރުމަށް އެދޭ ކަމަށް މެންބަރުގެ ސިޓީގައި ބަޔާން ކުރައްވާފައިވެއެވެ.
މި ސިޓީގައި މިނިސްޓަރ އިމްރާނާ ކުރަން ފަސް ސުވާލެއް ހުށައަޅުއްވާފައިވެއެވެ. އެ ސުވާލުތަކަކީ:
1. މުޒާހަރާ ރޫޅާލުމުގައި ފުލުހުން ހާލަތާއި ނުބައްދަލު ބާރުގެ ބޭނުންކޮށްފައިވާއިރު، މިހާތަނަށް މިކަމާއި ގުޅިގެން އެއްވެސް ފުލުހަކަށް ފިޔަވަޅެއް އެޅިފައިވޭތޯ އަދި ފިޔަވަޅެއް އެޅިފައިވާނަމަ އެފިޔަވަޅަކީ ކޮބައިތޯ؟
2. މުޒާހަރާ ރޫޅާލަންދިޔަ ފުލުހުން ޔުނިފޯމް އަޅައިގެން ތިބީ ފުލުހުންގެ ގާނޫނުގެ ދަށުން އެމީހުންގެ ސާރވިސް ނަމްބަރ ފެންނަ ގޮތަށްތޯ؟
3. މުޒާހަރާ ރޫޅާލަން ހަރަކާތްތެރިވީ، އެކަމާއި ގުޅޭ އެކަށީގެންވާ ޓްރެއިނިން ލިބިފައި ތިބި ފުލުހުންތޯ؟
4. މުޒާހަރާތަކާއި އެކިއެކި އެއްވުންތައް ރޫޅާލުމުގައި ފުލުހުން ހަރަކާތްތެރިވާއިރު ބޮޑީ ކެމެރާ ބޭނުން ނުކުރަނީ ކީއްވެތޯ؟
5. ބޮޑެތި ކުށްތަކަށް ތުހުމަތު ކުރެވިގެން، އެތުހުމަތު ކުރެވޭ ފަރާތްތަކުގެ ވަނަވަރު ހާމަކުރާއިރު، ހުރިހާ ފަހަރަކު އެއް އުސޫލަކުން އަމަލު ނުކުރަނީ ކީއްވެތޯ؟
މި އެއްވުމާއި ގުޅިގެން މިނިސްޓަރ އިމްރާން ކުރެއްވި ޓުވީޓެއްގައި ވިދާޅުވެފައި ވަނީ އެއްވުން ކޮންޓްރޯލްކުރުމަށް ފުލުހުން ހާލަތާ ނުބައްދަލު ބާރުގެ ބޭނުންކޮށްފައިވޭތޯ ބައްލަވާނެ ކަމަށެވެ. އަދި ވިދާޅުވީ ފުލުހުންގެ ގާނޫނުގައި ބާރުގެ ބޭނުން ކުރުން ހުއްދަ ހާލަތުގައި ވެސް ބާރުގެ ބޭނުން ކުރަންވާނީ ކަނޑައަޅާފައިވާ މިންގަނޑުގެ ތެރެއިން ކަމަށެވެ. މިނިސްޓަރ އިމްރާން މިހެން ވިދާޅުވިއިރު އެ މައްސަލައާ ގުޅިގެން ފުލުހުން ބުނީ އެއްވުންތައް ކޮންޓްރޯލް ކުރަން ހަރަކާތްތެރިވާ ފުލުހުން އަމަލުކުރާ ގޮތާއި ގުޅޭ ގޮތުން ހުށަހެޅޭ ޝަކުވާ އުސޫލުތަކުގެ ތެރެއިން ބަލާނެ ކަމަށެވެ.
