މި އަހަރުގެ އޭލެވެލް އިމްތިހާނުގެ ފިޒިކްސް ޔުނިޓް-1 ޕޭޕަރު ލީކުވެއްޖެއެވެ.
އިތުބާރު ހުރި ފަރާތަކުން ރާއްޖެއެމްވީއަށް ބުނީ ޕިޒިކްސް ޔުނިޓް-1 ޕޭޕަރު ބުރާސްފަތި ދުވަހު ލީކުވެފައިވާ ކަމަށެވެ. ސްކޭން ކޮށްފައިވާ ކޮޕީއެއް ދައުރުވަމުންދާ ކަމަށެވެ. ލީކް ކޮށްލާފައިވަނީ ބުރާސްފަތި ދުވަހުގެ ހެނދުނުގެ ވަގުތެއްގައެވެ. ނަމަވެސް ލީކުވީ ކޮން ގައުމެއްގައި ކަމެއް ސާފެއް ނުވެއެވެ.
ފިޒިކްސް ޔުނިޓް-1ގެ އިމްތިހާނު އޮތީ ބުރާސްފަތި ދުވަހުގެ މެންދުރުފަހު 2:00ގައެވެ. މީގެ އިތުރުން ވެސް އޭލެވެލްގެ ޕޭޕަރުތައް ލީކްކޮށްލި ކަމުގެ މައުލޫމާތު ވަނީ ލިބިފައެވެ.
މިކަމާއި ގުޅިގެން އެޑިޔުކޭޝަން މިނިސްޓްރީން ބުނީ ޕޭޕަރު ލީކުވިކަމުގެ މައުލޫމާތު ލިބިފައިވާ ކަމަށާއި އިތުރަށް ބަލަން ޖެހޭ ކަންކަން ބަލަމުންދާ ކަމަށެވެ. މިކަމާއި ގުޅޭ ގޮތުން ވަކި އިތުރު ތަފްސީލެއް މިނިސްޓްރީން ދީފައި ނުވެއެވެ. ނަމަވެސް ލީކުވެފައިވަނީ ރާއްޖޭގައި ކަމެއް ނުވަތަ ބޭރުގައި ކަމެއް އަދި ސާފެއް ނުވެއެވެ. އެޑިއުކޭޝަން މިނިސްޓްރީން ބުނެފައިވަނީ ޕޭޕަރު ލީކުވެފައިވަނީ ރާއްޖޭގައި ކަމެއް ސާފެއް ނޫން ކަމަށާއި ބޮޑަށް ބެލެވެނީ ބޭރުގައި އެކަން ހިނގާފައިވާ ކަމަށެވެ.
އޭއެސް/އޭލެވެލް އިމްތިހާން ފަށާފައިވަނީ އޭޕްރީލް މަހުގެ 26 ވަނަ ދުވަހުއެވެ. މެއި/ޖޫންގައި ބޭއްވުމަށް ހަމަޖެހިފައިވާ އިމްތިހާން އަވަސްވުމާއި ގުޅިގެން އޭރު އެޑިޔުކޭޝަން މިނިސްޓްރީން ބުނީ މި ނިންމުން ބަދަލުކުރުމަށް އެ މިނިސްޓްރީ އާއި ޑިޕާޓްމެންޓް އޮފް ޕަބްލިކް އެގްޒެމިނޭޝަނުން އެޑެކްސެލްއާއެކު ގިނަ މަޝްވަރާތަކެއް ކުރިކަމަށެވެ. ނަމަވެސް މި މަޝްވަރާތަކުން އަލިމަގެއް ފެނިފައި ނުވާކަމަށް ވަނީ ބުނެފައެވެ. އޭއެސް/އޭލެވެލް އިމްތިހާނު އޭޕްރީލް މަހަށް އަވަސްވުމުން މިއަހަރުގެ އެޗްއެސްސީ އިމްތިހާނު ބާއްވާނީ 13 ޖޫން 2021ގައި ކަމަށް އެޑިއުކޭޝަން މިނިސްޓްރީން ވަނީ ހާމަކޮށްފައެވެ.
