ފޭރިގަތީ ފައިސާކޮޅު، ޒަރޫރީ ބޭނުން ކުރާނެވަރުވެސް ނެތް!

ފަހަކަށް އައިސް އެންމެ ގިނައިން ފޯނުތަކަށް އަންނަ އެއް މެސެޖްއަކީ ބޭންކް އޮފް މޯލްޑިވްސްގެ ނަމުގައި ބަޔަކު ފޮނުވާ މެސެޖެކެވެ. އެކަމަކު އެއީ މަކަރާއި ހީލަތުގެ މެސެޖެކެވެ. ބީއެމްއެލްއަކުން އެއްވެސް ކަސްޓަމަރަކަށް އެކައުންޓް ނުވަތަ ކާޑުގެ މައުލޫމާތު ހޯދުމަށް އެދި ނުގުޅާނެއެވެ. އެކައުންޓުގެ މައްސަލައެއް ދިމާވެގެން އެހެން އެކައުންޓަކަށް ފައިސާ ޖަމާކުރުމަށް އެއްވެސް ހާލަތެއްގައި ބޭންކުން ނޭދޭނެއެވެ.

ކަން މިހެން އޮތަސް މިފަދަ މާތް މައްސަރެއްގައިވެސް ބައެއްމީހުން ދަނީ އެތައް ބައެއްގެ ފައިސާ ނުހައްގުން ފޭރެމުންނެވެ. ހަރާމް ފައިސާ ބޭނުން ކުރަމުންނެވެ. މަކަރާއި ހީލަތުންނެވެ.

ވަސްމާއަކީ މިގޮތަށް ބައެއްގެ ކެހިވެރިކަމުގައި ޖެހިގެން ލަނޑު ލިބުނު އަންހެނެކެވެ. އެއީ އެއް މަހުގެ ތުއްތު ކުއްޖެއްގެ މަންމައެވެ. ދެމަފިރިން ވަޒީފާއަށް ގޮސްގެން ގޭގެކުލި ދެއްކުމަށްފަހު އަމިއްލަ ބޭނުންތަކަށް އޮންނަނީ 1500އެއް ހާ ރުފިޔާއެވެ. ރަމަޟާން މަހުގެ 5 ވަނައަށް ވީދުވަހު އަތުގައި އޮތީ 1000 ރުފިޔާއެވެ. ދަރިފުޅަށާއި ޒަރޫރީ އެނޫންވެސް ބޭނުންތަކަށް އަތުގައި ހުރި ފައިސާ ކޮޅުން ނުފުދޭނެތީ އާއިލާ މީހެއްގެ އަތުން މަސް ނިމުމުން އަނބުރާ ދައްކާގޮތަށް 2000 ރުފިޔާ ނެގިއެވެ. ނަމަވެސް ނުބައިނުލަފާ މީހެއްގެ ސަބަބުން އެކައުންޓުގައި ހުރި އެ ރުފިޔާކޮޅުވެސް ވަނީ ގެއްލިފައެވެ.

އޭޕްރީލް 22 ވަނަދުވަހު ހަވީރު 17:00 ހާއިރު މަސައްކަތް ނިއްމާލުމަށްފަހު ވަސްމާ ގެއަށް އައިވަގުތު ބީއެމްއެލްގެ ނަމުގައި ފޯން ކޯލެއް އައެވެ. ސަލާން ގޮވާލުމަށްފަހު ބުނީ ދިއްފުށިން 5 ކަސްޓަމަރަކާއި މާލެއިން 5 ކަސްޓަމަރެއްގެ އެކައުންޓަށް ދާންނުޖެހޭ ޓްރާންސެކްޝަންތަކެއް ގޮސްގެން އުޅޭ ކަމަށެވެ. މިނޫންވެސް އެތަކެއް ވާހަކައެއް ދެއްކުމަށްފަހު މެއިލްއަށް މިހާރު ގޮސްފައިވާ ކޯޑު ކިޔާދިނުމަށް އެދުނެވެ. ދެން ވަސްމާ އެކޯޑް ބުނުމުން ކުޑަވަގުތު ކޮޅަކުން ގުޅާނެކަމަށް ބުނެފައި ފޯނު ބޭއްވީއެވެ.

އޭރުވެސް ވަސްމާއަށް މިވީގޮތެއް ނޭނގެއެވެ. ގެއަށް ވަދެ ދަރިފުޅު ރޯން ފެށުމުން ކައިރީގައި އިން ފިހާރަޔަށް ޔޯގަޓް ތައްޓެއް ގަތުމަށްޓަކައި ނުކުތެވެ. އަނެއްކާވެސް ދެން އައީ ހަމަ އެކޯލެވެ.

ބުންޏެވެ. ތިޔަ އެކައުންޓުގައިވާ ފައިސާ މިހާރު ވާނީ އެހެން އެކައުންޓަކަށް ޖަމާކުރެވިފައެވެ. އެހެންވީމާ ކޭޝް ކާޑު މިވަގުތު ބޭނުން ނުކުރުން އެދެމެވެ.

ވަސްމާއަށް ޝައްކުވީ ދެނެވެ. އަވަސްއަވަހަށް އެކައުންޓް ބެލިއިރު ފައިސާއެއް ނެތެވެ. ރޮވިފައި ހުރެގެން އެނަންބަރަށް ގުޅުމުން އަނެއްކޮޅުން ޖަހާލީ ހިނިގަނޑެކެވެ. ތިޔަ ފައިސާއަކީ މިމަހުގެ ބާކީ އޮތްތާގައި ވަސްމާގެ ދެމަފިރިންނާއި ކުޑަ ދަރިފުޅުގެ ޚަރަދުކަމަށް ބުނެ އެފައިސާ އަނބުރާ ދިނުމަށް ވަސްމާ އާދޭސް ކުރިއެވެ.

އަނެއްކޮޅުން ވާހަކަ ދެއްކީ ހިލަ ހިތެއްގެ ވެރިއެކެވެ. ބުންޏެވެ. ކަލޭމެންގެ ކައިރީގައި ބޭންކުން އަބަދުވެސް އެކިޔަނީ މިކަހަލަ ފޯނުތަކަށް ޖަވާބު ނުދޭށޭއެވެ. އެހެންވީމާ މިއީ ކަލޭ މަށަށް ގަސްތުގައިދިން ހަދިޔާއެކެވެ. މިއެއް އަބުރާ ނުދޭނަމެވެ. އެހެނެއް ނޫނެވެ. ވީޑިއޯ ކޯލެއް ކޮށްފައި ދަރިފުޅު ދައްކާފައި ފިހާރައަށް ވަދެ ބޭނުންވާ އެޗެއް ނަގާފައި އަރާވަރު ބުނީމާ އެ ފައިސާ ދައްކައިދީފާނަމެވެ. މިއީ ކަލޭގެ މޮޔަކަމުން ވީ ކަމެކެވެ.

ފޯނު ކަނޑާލުމަށްފަހު ވަސްމާގެ ވައިބަރ އަށް 10،000 ރުފިޔާ ޖަމާކޮށްފައިވާކަމަށް ބުނެ ފޭކް ސްލިޕެއްވެސް ވަނީ ފޮނުވައިފައެވެ. މިފަދަ އެތައް ޖަރީމާއެއް މި ގައުމުގައި އަންނަނީ ހިންގަމުންނެވެ. ފުލުހުންގެ އިދާރާއެއް އޮވެމެ، އެ އިދާރާއަށްވެސް މިކަންކަން ހުއްޓުވޭނެ ގޮތެއް ނުވެއެވެ. އާންމުކޮށް މިކަމަށް ގިނަ ރައްޔިތުން މިހާރު ސަމާލުކަންދޭއިރު އަދިވެސް މިކަމަށް ހޭލުންތެރި ނޫން މީހުން އެބައުޅެއެވެ.

މިކަންކަން ކުރާ މީހުން އެކަން ކުރަނީ އާންމުކޮށް ދެރަ ނިކަމެތީންނަށެވެ. މިއަދު ވަސްމާ އެހުރީ ރޯދަ މަހު އިތުރަށް ކައިބޮއި އުޅެވޭނެ ގޮތެއްވެސް ނެތިފައެވެ.