ޔޫއެންޑީޕީން ޕީޖީ އޮފީހަށް ޑިޖިޓަލައިޒޭޝަން އެކުއިޕްމަންޓް ހަދިޔާކޮށްފި
ޔޫއެންޑީޕީން ރާއްޖެއަށް ފުރިހަމަ އެއްބާރުލުން ދޭނެކަމަށް ބުނެފައިވޭ
ޔޫއެންޑީޕީން ޕީޖީ އޮފީހަށް ޑިޖިޓަލައިޒޭޝަން އެކުއިޕްމަންޓް ހަދިޔާކުރުން
ޔުނައިޓެޑް ނޭޝަންސް ޑެވެލޮޕްމަންޓް ޕްރޮގްރާމްސް (ޔޫއެންޑީޕީ)ން ޕްރޮސެކިއުޓާ ޖެނެރަލްގެ އޮފީހަށް ޑިޖިޓަލައިޒޭޝަން އެކުއިޕްމަންޓް ހަދިޔާކޮށްފިއެވެ.
އެކަން ހާމަކޮށް ޔޫއެންޑީޕީން ކުރި ޓުވީޓުގައި ބުނީ ރާއްޖޭގެ އަދުލުގެ ނިޒާމުގެ މަސައްކަތްތަކަށް އެހީތެރިވުމުގެ ގޮތުން ޑިޖިޓަލައިޒޭޝަން އެކުއިޕްމަންޓް ހަދިޔާކޮށްފައިވާ ކަމަށެވެ. އަދި ކުރިއަށް އޮތްތަނުގައިވެސް ރާއްޖޭގެ ސަސްޓެއިނަބަލް ޑިވެލޮޕްމަންޓް ގޯލްތަކުގެ ތެރެއިން އަދުލުއިންސާފު ގާއިމްކޮށް ދެމެހެއްޓުމުގެ އަމާޒަށް ވާސިލްވުމަށް ކުރަމުން އަންނަ މަސައްކަތްތަކަށް ފުރިހަމައަށް އެބާރުލުން ދޭނެކަމަށް ބުނެފައިވެއެވެ.
އެކަން ފާހަގަކޮށް ޕްރޮސެކިއުޓާ ޖެނެރަލް ހުސައިން ޝަމީމް ކުރެއްވި ޓުވީޓުގައި ވަނީ ޑިޖިޓަލައިޒޭޝަން އެކުއިޕްމަންޓް ހަދިޔާކުރެއްވި ކަމަށްޓަކާ ޝުކުރު އަދާކުރައްވާފައެވެ. އަދި އެ ހަދިޔާކުރުމަށް ހުކުރު ދުވަހު ބޭއްވި ބައްދަލުވުމުގައި ޔޫއެންޑީޕީގެ ރެޒިޑެންޓް ރިޕްރެޒެންޓޭޓިވް އަކިކޯ ފުޖީޖީއާއެކު ބޭއްވުނު މަޝްވަރާއަށް އަލިއަޅުއްވާލައްވާ ވިދާޅުވީ ކުރިއަށް އޮތްތަނުގައި އަދުލުގެ ނިޒާމު ހަރުދަނާކުރުމަށް ޔޫއެންޑީޕީއާ ވީހާވެސް ގުޅިގެން މަސައްކަތްކުރުމާގުޅޭ މަޝްވަރާކޮށްފައިވާ ކަމަށެވެ. އަދި ޕީޖީ އޮފީހުގެ މަސައްކަތްތައް އިތުރަށް ހަރުދަނާކުރުމަށް ކުރާ މަސައްކަތުގައި ޔޫއެންޑީޕީއަކީ އެންމެ ގާތް އެއް އެހީތެރިޔާކަން އެނގުމަކީ އުފަލެއް ކަމަށްވެސް ޝަމީމް ވިދާޅުވެފައިވެއެވެ.
