އިންޑިއާގައި ކޭސްތައް ގިނަވެ، އެއް އެނދެއްގައި ދެމީހުންނަށް ފަރުވާދެނީ

އިންޑިއާގައި ކޮވިޑް-19ށް ޕޮޒިޓިވްވާ މީހުންގެ އަދަދު އިތުރުވެ ހޮސްޕިޓަލްތަކުގައި އެއް އެނދެއްގައި ދެ މީހުންނަށް ފަރުވާދޭން ފަށައިފިއެވެ.

އިންޑިއާގެ ހެލްތު މިނިސްޓްރީގެ ތަފާސްހިސާބުތައް ދައްކާގޮތުން އެއްދުވަހާ 200,739 މީހުން ވަނީ އެގައުމުން ކޮވިޑަށް ޕޮޒިޓިވްވެފައެވެ. މިއީ މިހާތަނަށް އެގައުމުން އެއްދުވަސްތެރޭ މިއަދަދަށް މީހުން ޕޮޒިޓިވްވި ފުރަތަމަ ފަހަރެވެ. އިންޑިއާއަށް އައި ކޮވިޑްގެ މި އައު ރާޅާއެކު އެގައުމުން ގިނަ އަދަދެއްގެ ބަޔަކު ޕޮޒިިޓިވްވަމުންދާތީ ހޮސްޕިޓަލްތަކަށް ވަނީ ބާރު ބޮޑުވެފައެވެ. އެގޮތުން އެނދުގެ ދަތިކަމާއި އޮކްސިޖަންގެ ދަތިކަމާ އެގައުމުން މިހާރު ވަނީ ކުރިމަތިލާންޖެހިފައެވެ.

މިއަހަރުގެ ކުރީކޮޅު އިންޑިޔާގައި ދުވާލެއްގެ މައްޗަށް ކޮވިޑް ޖެހޭ މީހުންގެ އަދަދު ހުރީ 10،000ށް ވުރެ ދަށުގައެވެ. ނަމަވެސް އޭޕްރީލް މަހުގެ 2 ވަނަ ދުވަހުން ފެށިގެން އެގައުމުގެ ހާލަތު ވަނީ ވަރަށް ބޮޑަށް ގޯސްވެފައެވެ. އިންޑިޔާގެ އެކި ހިސާބުތަކުގައި މި ބަލި ފެތުރިފައިވާއިރު މަހަރާޝްތްރާ، ކެރެލާ، ކަރްނަޓާކާ، އަދި ޓެމިލް ނާޑޫން ފެނިފައިވާ ކޭސްތަކުގެ އަދަދު ދަނީ ކޮންޓްރޯލް ނުކުރެވި އިތުރު ވަމުންނެވެ. 

ދުނިޔޭގައި މިވަގުތު ކޮވިޑްގެ ހާލަތު އެންމެ ގޯސްވެފައިވާ އަނެއް ދެގައުމުކަމުގައިވާ ބްރެޒިލް އާއި އެމެރިކާ ގައި ދުވާލެއްގެ މައްޗަށް ފެންނަ ކޭސްތަކަށްވުރެ އިންޑިޔާގައި ފެންނަ ކޭސްތައް ދެގުނަ އިތުރެވެ. ނަމަވެސް މީހުން މަރުވާ ރޭޓް އަނެއް ދެގައުމާ އަޅާބަލާއިރު މަދެވެ.

ކޭސްތައް އިތުރުވަމުން އައި ނަމަވެސް އެގައުމުގައި ކުރިޔަށްގެންދާ ހިންދީ ދީނުގެ ބޮޑެތި ހަރަކާތްތަކަށް ހުއްޓުމެއްނާދެއެވެ. މިހަރަކާތްތަކުގައި 650،000ށް ވުރެ ގިނަ މީހުން ބައިވެރިވެފައިވާކަމަށް ރިޕޯޓްތައް ބުނެއެވެ. މި ހަރަކާތްތަކުގައި ގައިދުރުކަމެއް ނޯންނައިރު މާސްކު އެޅުމެއް ވެސް ނޯވެއެވެ.

އަނެއްކޮޅުން ހަތަރު ސްޓޭޓެއްގައި ބޭއްވި އިންތިޚާބުތަކުގެ ކެމްޕެއިން ހަރަކާތްތަކާ ގުޅިގެން ވެސް ކޭސްތައް ވަނީ އިތުރުވެފައެވެ.

އިންޑިއާއިން 14 މިލިއަނަށް ވުރެ ގިނަ މީހުން ވަނީ ކޮވިޑަށް ޕޮޒިޓިވްވެފައެވެ.