ޑެންމާކުން އެސްޓްރަޒެނެކާ ވެކްސިން ޖެހުން ހުއްޓާލައިފިއެވެ.
ބީބީސީގައި ރިޕޯޓް ކޮށްފައިވާ ގޮތުން ޑެންމާކުން އެގޮތަށް ނިންމާފައިވަނީ ވެކްސިންގެ ސަބަބުން ލޭގަނޑުވުމުގެ މައްސަލަތައް ކުރިމަތިވާކަމަށް ބުނެ އުފެދެމުންދާ ކަންބޮޑުވުންތަކާ ގުޅިގެންނެވެ. އެއާއެކު ޑެންމާކު ވެގެން ގޮސްފައިމިވަނީ ޔޫރަޕްގެ ޤައުމުތަކުގެ ތެރެއިން މި ވެކްސިން ޖެހުން ހުއްޓާލި ފުރަތަމަ ޤައުމަށެވެ. އަދި މިކަމުގެ ސަބަބުން އެ ޤައުމުގެ ވެކްސިން ޕްރޮގްރާމަށް ބުރޫއަރާނެކަމަށް ބޭރުގެ މީޑިއާތަކުން ރިޕޯޓު ކުރެއެވެ.
ޑެންމާކުން މި ވެކްސިން ޖެހުން ހުއްޓާލުމަށް ނިންމާފައިވާއިރު، ޔޫރަޕުގެ ބައެއް އެހެން ޤައުމުތަކުންވެސް މީގެ ކުރިން މި މައްސަލަ ފާހަގަކޮށް އެކަމުގެ ކަންބޮޑުވުން ފާޅުކޮށްފައިވެއެވެ. އަދި ވެކްސިން ޖެހުން މެދުކަނޑާލުމަށްފަހު ބައެއް ޤައުމުތަކުން އަލުން ވެކްސިން ޕްރޮގްރާމް ފަށާފައިވެސް ވެއެވެ. ނަމަވެސް އުމުރުން ދުވަސްވީ އުމުރުފުރާތަކަށް މި ވެކްސިން ޖެހުމާ ގުޅޭގޮތުން އެ ޤައުމުތަކުންވެސް ބައެއް އުސޫލުތައް ހަދާފައިވެއެވެ.
އޭގެ އިތުރުން، އަންގާރަ ދުވަހު އެމެރިކާ، ކެނެޑާ އަދި ޔޫރަޕިއަން ޔޫނިއަނުން ވަނީ ޖޯންސަން އެންޑް ޖޯންސަން ވެކްސިން ޖެހުންވެސް ވަގުތީގޮތުން މެދުކަނޑާލާފައެވެ. އެ ވެކްސިން ޖެހުން މެދުކަނޑާލާފައިވަނީވެސް ލޭގަނޑުވުމުގެ މައްސަލަތަކަކާއި ގުޅިގެންކަމަށް ރިޕޯޓުތައް ބުނެއެވެ. ދެކުނު އެފްރިކާއިންވެސް މިވަގުތަށް ޖޯންސަން ވެކްސިން ޖެހުން މެދުކަނޑާލާފައިވާއިރު، އެ ޤައުމުގެ ވޭރިއަންޓާ ދެކޮޅަށް އެންމެ ރަނގަޅަށް މަސައްކަތް ކުރަނީވެސް ޖޯންސަން ވެކްސިން ކަމަށް ރިޕޯޓުތައް ބުނެއެވެ.
