އެޗްޕީއޭއިން ރައްޔިތުންގެ މަޖިލީހަށް ދޮގުހަދާ އޮޅުވާލިކަމުގެ ޝަކުވާ ލިބިފައި އެބަވޭ: ބޮންޑޭ
ރޯގާ ބޮޑަށް ފަތުރައިގެން އާމްދަނީ ހޯދަން އުޅޭ ކަމުގެ އިހުސާސެއް ރައްޔިތުން ކުރަމުން ގެންދާކަމަށް ބޮންޑޭ ވިދާޅުވި
އިބްރާހިމް ރަޝީދު
ހެލްތު ޕްރޮޓެކްޝަން އޭޖެންސީ( އެޗްޕީއޭ) އިން ރައްޔިތުންގެ މަޖިލީހަށް ދޮގުހަދާ އޮޅުވާލިކަމުގެ ޝަކުވާ ލިބިފައިވާކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑޭ) ވިދާޅުވެއްޖެއެވެ.
ކޮވިޑްއާ ގުޅިގެން ހޮޓާ ކެފެޓީރިއާ އަދި ރެސްޓޯރެންޓް ހިންގާ ފަރާތްތަކަށް، ކުރިމަތި ވަމުންދާ ދަތިތައް ހައްލުކޮށްދިނުމަށް ސަރުކާރަށް ގޮވާލައި، ހޯރަފުށީ ދާއިރާގެ މެންބަރު އަޙްމަދު ސަލީމް ހުށަހަޅާފައިވާ މައްސަލައާ ގުޅިގެން، މަޖިލީހުގެ އިގްތިސާދީ ކޮމެޓީން ރެސްޓޯރެންޓުތައް ހިންގާ ފަރާތްތަކާއެކު ބޭއްވި ބައްދަލުވުމުގައި ބޮންޑޭ ވިދާޅުވީ، އެޗްޕީއޭގެ ހިންގުމުގައި މައްސަލަތަކެއް އުޅޭކަން ފާހަގަވެފައި ވާކަމަށެވެ.
ބޮންޑޭ ވިދާޅުވީ، އެޗްޕީއޭގެ މެޑިކަލް އެޑްވައިޒަރީ ބޯޑުގައި ވިޔަފާރި ކުރާ މީހުން އެބަ ތިބިކަމަށާއި، އެމީހުންގެ ތެރޭގައި މަސްލަހަތު ފުށުއެރުމުގެ މައްސަލަ އިންތިހާއަށް އެބަ އޮތް ކަމަށެވެ. އަދި ވެކްސިންގެ ފައިސާ ލިބޭ ބަޔަކު ވެސް އެތަނުގައި އެބަ ތިބި ކަމަށް ވެސް އޭނާ ތުހުމަތު ކުރެއްވިއެވެ.
މި މައްސަލަތަކާ ގުޅޭ ގޮތުން ވާހަކަ ދައްކަވަމުން، ބޮންޑޭ ވިދާޅުވީ، ރޯގާ ބޮޑަށް ފަތުރައިގެން އާމްދަނީ ހޯދަން އުޅޭ ކަމުގެ އިހުސާސެއް މިހާރު ރައްޔިތުން ކުރަމުން ގެންދާކަމަށެވެ.
ބޮންޑޭ ވަނީ މީގެ ކުރިން ވެސް، އެޗްޕީއޭގެ ޓެކްނިކަލް އެޑްވައިޒަރީ ޓީމް (ޓެގް) އަށް ބޮޑެތި ފާޑުކިޔުންތަކެއް އަމާޒުކޮށްފައެވެ. އެގޮތުން، ޓެގް ޓީމުން މާލީ މަންފާއެއް ހޯދުމަށް އެޗްޕީއޭ ހައިޖެކް ކޮށްފައި ވާކަމަށް އޭނާ ކުރިން ވިދާޅުވެފައިވެއެވެ.
