ބޯހިޔާވަހިކަމަށް މަސައްކަތް ނުކުރެވޭ ކޮންޓްރެކްޓްތައް އުވާލަނީ
2008 ވަނަ އަހަރުން ފެށިގެން މިއަދާ ހަމައަށް ބޯހިޔާކަމުގެ 33 މަޝްރޫޢެއް ކޮންޓްރެކްޓްކޮށްފައިވޭ
ހުޅުމާލެ ދެވަނަ ފިޔަވަހި
ރާއްޖޭގެ ބޯހިޔާވަހިކަމުގެ މައްސަލަ ހައްލުކުރުމަށް އެކި ސަރުކާރުތަކުން ކޮންޓްރެކްޓްކޮށް މަސައްކަތް ނުހިނގާ ހުރި ކޮންޓްރެކްޓްތައް ބާތިލުކުރަން ނިންމާފައިވާކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މަޖިލީހުގެ ރައީސް މިފަދައިން ވިދާޅުވީ، ސަރުކާރުގެ ބޯހިޔާވަހިކަމުގެ ސިޔާސަތާއި ހިޔާ މަޝްރޫޢުގެ ފްލެޓްތައް ދިނުމާ ގުޅޭގޮތުން ކޮމިޓީން ދިރާސާކޮށް ނިންމިގޮތުގެ ރިޕޯޓާ ގުޅޭގޮތުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ. ރައީސް ނަޝީދު ވިދާޅުވީ، 2008ވަނަ އަހަރުން ފެށިގެން މިއަދާ ހަމައަށް ބޯހިޔާކަމުގެ 33 މަޝްރޫޢެއް ކޮންޓްރެކްޓްކޮށްފައިވާކަމަށެވެ. މި މަޝްރޫއުތައް ހިންގުމަށް ދެ މިލިއަން އަކަ ފޫޓުގެ ބިން ހުޅުމާލެއިން ހިފެހެއްޓިފައިވާއިރު، މި ބިމަކީ މާލޭގައި މިހާރު މީހުން ދިރިއުޅެމުންދާ ބިމުގެ ބޮޑުމިނާ އެއްވަރުގެ ސަރަހައްދެއްކަމަށް ނަޝީދު ވިދާޅުވިއެވެ. މަޖިލީހުގެ ރައީސް ވަނީ މީގެން އެއްވެސް، މަޝްރޫޢުއެއް އެންމެ އެކަށޭނަގޮތެއްގައި ބެލެހެއްޓިފައި ނުވާކަމަށް ވިދާޅުވެފައެވެ. ކޮންޓްރެކްޓް ބަލަހައްޓާނެ ނިޒާމެއް އެކުލަވާލުމަށް ސަރުކާރަށް ލަފާއަރުވަން ނިންމާފައިވާކަމަށް ރައީސް ނަޝީދު ވިދާޅުވިއެވެ. އަދި ކޮމިޓީއިން މިހާރު ދަނީ އުވާލަންވީ ކޮންޓްރެކްޓްތަކާއި، ކުރިއަށް ގެންދަވީ ކޮންޓްރެކްޓްތައް އެނަލައިޒްކުރަމުންކަމަށް ރައީސް ނަޝީދު ވިދާޅުވިއެވެ.
މި ނޫސްވެރިންގެ ބައްދަލުވުމުގައި ވަނީ ކޮމިޓީއިން ހިޔާ މަޝްރޫޢުގެ ކަންކަން ހިނގާދިޔަގޮތް ބެލިބެލުމާއި، އިތުރު އެހެނިހެން ބޯހިޔާވަހިކަމުގެ މައްސަލަތަކުގައި ފާހަގަވިކަންކަން ވެސް ހިއްސާކޮށްފައެވެ. އެގޮތުން ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީން އާންމުކުރި ރިޕޯޓުގައި ވަނީ ސިވިލް ސަރވިސް މުއައްޒަފުންގެ ކެޓަގަރީ ހިޔާ ފްލެޓްގައި އެކުލަވާލާފައިވާގޮތުގެ ސަބަބުން ޙާލަތު ދެނެގަނެފައި ނުވާތީ، މި ޙާލަތު ދެނެގަނެ އަލުން މި ލިސްޓް އެކުލަވާލަންޖެހޭކަމަށް ފެންނަކަމަށް ބުނެފައެވެ.
މަޖިލީހުގެ ރައީސް އަދި ވެރިކަން ކުރާ ކޯލިޝަންގެ މައި ޕާޓީ އެމްޑީޕީގެ ރައީސްއެއްގެ ގޮތުގައި ވެސް ހުންނެވި ރައީސް ނަޝީދު ވަނީ މި ސަރުކާރުން ބޯހިޔާވަހިކަން ރައްޔިތުންނަށް ކަށަވަރުކޮށްދެއްވާނެކަމުގެ ޔަޤީންކަން ދެއްވާފައެވެ. މިހާތަނަށް އައިރު ބޯހިޔާވަހިކަމުގެ ފޮނި މީރުކަން ލިބިފައިވަނީ ހަމައެކަނި އެމްޑީޕީގެ ސަރުކާރަކުން އެޅި ފްލެޓްތަކަކުންކަން ރައީސް ނަޝީދު ފާހަގަކުރެއްވިއެވެ.
