ތިލަފުށިން ހުޅުމާލެއަށް ދަތުރުކުރި ބޯޓެއް އަޑިއަށް ހިނގައްޖެ
މި ބޯޓުގައި ތިބި މީހުން މިހާރު ވަނީ ސަފާރީއަކަށް ނަގާފައި
އަޑިއަށް ދިޔަ ބޯޓު، އެމްއެންޑީއެފް ކޯސްޓްގާޑުން ދަނީ ހަރަކާތްތެރިވަމުން
ތިން މީހުންނާއެކު ދަތުރުކުރި ތެޔޮ އުފުލާ ބޯޓެއް އަޑިއަށް ހިނގައްޖެއެވެ.
އެމްއެންޑީއެފުން ބުނީ ދިވެއްސަކާއި ދެ ބިދޭސީން ދަތުރުކުރި ތެޔޮ އުފުލާ ބޯޓެއް ކަނޑު ގަދަވެ އަޑިއަށް ދާތީ އެމްއެންޑީއެފް މާލޭ އޭރިއާ ކޯސްޓްގާޑުން ހަރަކާތްތެރިވަމުންދާ ކަމަށެވެ. އަދި މި ބޯޓުގައި ތިބި މީހުން މިހާރު ވަނީ ސަފާރީއަކަށް ނަގާފައި ކަމަށެވެ.
''ސަވާރީ'' ނަމަކަށް ކިޔާ މިބޯޓު ދަތުރުކުރީ ކ. ތިލަފުށިން ހުޅުމާލެއަށް ދިހަހާސް ލީޓަރު ޑީސަލްއާއެކުއެވެ.
މި ހާދިސާގެ ރިޕޯޓު ލިބިފައިވަނީ ހޯމަ ދުވަހުގެ ހެނދުނު 11:00 ހާއިރުއެވެ. އަދި ''ކުޑަ ބަނާނާ'' ސަރަހައްދަށް އެބޯޓު ވަނީ އަޑިއަށް ގޮސްފައެވެ.
އެމްއެންޑީއެފުން ބުނީ މި ބޯޓު ފެންމަތި ކުރުމަށް ބޯޓުގެ ވެރިފަރާތާއި އެމްއެންޑީއެފްގެ ކޯސްޓްގާޑުގެ ޑައިވަރުން މަސައްކަތް ކުރަމުންދާ ކަމަށެވެ. ބޯޓު އަޑިއަށް ދިޔަނަމަވެސް ޑީސަލް ލީކްވާކަމެއް ނުވަތަ ނުވާކަމެއް ވެސް އެމްއެންޑީއެފުން އަދި ހާމަކޮށްފައެއް ނުވެއެވެ.
މޫސުން ގޯސްވެ ކަނޑުމަތީގެ ހާދިސާތައް ހިނގާކަމުގެ ރިޕޯޓު އެމްއެންޑީއެފްގެ ކޯސްޓްގާޑްއަށް ދަނީ ލިބެމުންނެވެ.
