ވައިގަދަވެ މާލޭގެ މަގުމަތީގައި ހުރި ބޮޑެތި ގަސްތަކެއް ވެއްޓިއްޖެ
އަމީނީ މަގުގައި ހުރި ގަސްތަކުން ބައެއް ގޮފިތައް ވެއްޓިފައިވޭ
މާލޭގެ މަގުމަތީގައި އިންދާފައި ހުރި ގަހެއް މަގުމައްޗަށް ވެއްޓިފައި،
ރާއްޖެއަށް މިހާރު ކުރަމުންދާ ވިއްސާރާގައި މާލޭގެ މަގުމަތީގައި އިންދާފައި ހުރި ބައެއް ބޮޑެތި ގަސްތައް ވެއްޓިއްޖެއެވެ.
ގަދަވަޔާއެކު އަމީނީ މަގުގައި ހުރި ގަސްތަކުން ބައެއް ގޮފިތައް ވެއްޓިފައިވާއިރު، އެމްޕްލޯއިމަންޓް ޓްރައިބިއުނަލް ކައިރީގައި ހުރި ބޮޑު ގަހެއް ވެސް ވެއްޓިފައިވެއެވެ. މީގެއިތުރުން ހުޅުމާލޭ އަދި ވިލިމާލޭގައި އިންދާފައި ހުރި ބައެއް ގަސްތައް ވެސް ވެއްޓިފައިވެއެވެ.
ބާރަށް ވައި ޖެހުމުގެ ސަބަބުން މިގަސްތައް ވެއްޓިފައިވަނީ ހޯމަ ދުވަހުގެ ހެނދުނުގެ ވަގުތެއްގައެވެ. މިހާރު މިގަސްތައް ނެގުމުގެ މަސައްކަތްތައް އެމްއެންޑީއެފުން ދަނީ ކުރަމުންނެވެ.
މިހާދިސާތަކާ ގުޅިގެން މީހަކަށް އަދި ވެހިކަލްއަކަށް ގެއްލުން ލިބިފައިވާ ކަމުގެ ރިޕޯޓު ލިބިފައެއް ނުވެއެވެ.
ބާރަށް ވައި ޖެހި މޫސުން ގޯސްވެފައިވާތީ ހުރިހާ ފަރާތްތަކުން ސަމާލުވުމަށް ވަނީ އިލްތިމާސްކޮށްފައެވެ. އަދި ބައެއް ގެތަކުގެ ބެލްކަނިތަކުގައި ގަސްއިންދާފައިވާ ޕޮޓްފަދަ ތަކެތި މަގުމައްޗަށް ނުވެއްޓޭނެ ގޮތަކަށް ހެދުމަށާއި، ކުޑަދޮރުތައް ލައްޕާފައި ބެހެއްޓުމަށް ވެސް އެމްއެންޑީއެފުން އެދިފައިވެއެވެ.
