ވެންޓިލޭޓަރު ކޮރަޕްޝަން މައްސަލައިގެ ފައިސާ ޖަމާވި ތަނެއް އެނގިއްޖެނަމަ އަދިވެސް ދައުވާ ކުރައްވާނެ ކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.

ކޮވިޑް-19 އާ ގުޅިގެން ހެލްތުގެ މިނިސްޓްރީގެ ފަރާތުން ރާއްޖެ ގެނައުމަށް މަސައްކަތްކުރި ވެންޓިލޭޓަރުތަކާ ބެހޭ މައްސަލައިގައި، އެންޓި ކޮރަޕްޝަން ކޮމިޝަނުން ޕީޖީ އޮފީހަށް ހުށަހެޅި އިތުރު މައުލޫމާތުތަކާ ގުޅިގެން، މައްސަލަ އަލުން މުރާޖައާ ކުރުމަށްފަހު، ދައުވާ ނުކުރުމަަށް ކުރިން ޕީޖީން ނިންމި ނިންމުން ވަނީ ދަމަހައްޓާފައެެވެ.

ރާއްޖެ ޓީވީގެ ފަށާއިރު ޕޮރްގުރާމުގައި ވާހަކަ ދައްކަވަމުން، ޝަމީމް ވިދާޅުވީ، އޭސީސީއާއި ފުލުހުން ގުޅިގެން ހިންގި ތަހުގީގުގައި، މިހާތަނަށް، އެ ފައިސާ ޖަމާވެފައި ވަނީ ކޮންކޮން އެކައުންޓްތަކަކަށް ކަމެއް، ނުވަތަ އެފައިސާ ލިބިފައިވަނީ ކާކަށް ކަމެއް އެނގިފައި ނުވާ ކަމަށެވެ. އަދި އެކަން އޭސީސީން ފޮނުވި، ސިޓީގައި ވެސް ފާހަގަ ކޮށްފައިވާކަމަށް ޝަމީމް ވިދާޅުވިއެވެ.

އޭސީސީން ފަހުން ފޮނުވި ރިޕޯޓުގައި، އެކައުންޓުތަކެއްގެ މައުލޫމާތު ހިމަނާފައިވާކަމަށާއި، އެހެން ނަމަވެސް، ތުހުމަތު ކުރާ މިންވަރަށް، އެ އެކައުންޓުތަކަށް ފައިސާ ޖަމާވެފައިވާކަން ތަހުގީގަށް އެނގިފައި ނުވާކަމަށް ޝަމީމް ވިދާޅުވިއެވެ. އަދި ކޮރަޕްޝަނުގެ ފައިސާއާއި އެކައުންޓުތަކަށް ވަދެފައިހުރި ފައިސާއާ ގުޅުމެއް ހުރިކަން ތަހުގީގަށް އެނގިފައި ނުވާކަން، އޭސީސީން ފޮނުވި ސިޓީގައި ބަޔާންކޮށްފައި ވާކަމަށް ޝަމީމް ވިދާޅުވިއެވެ.

ޝަމީމް އިތުރަށް ވިދާޅުވީ، ދައުވާ ކުރުމަށް އެކަށީގެންވާ މިންވަރަށް ހެކި ހުރުމާއި، ސާބިތުކުރެވޭ މިންވަރަށް ހެކި ހުރުމަކީ ތަފާތު ދެކަމެއް ކަމަށެވެ. އެކަށީގެންވާ މިންވަރަށް ހެކި ނެތީސް ދައުވާ ކުރުމުން އެއިން ނުކުމެދާނެ ނުރަނގަޅު ނަތީޖާތަކެއް ހުންނާނެ ކަމަށް ވެސް ޝަމީމް ވިދާޅުވިއެވެ. އެގޮތުން، ދައުވާ ކުރާނެ ހެކި ނެތީސް ދައުވާ ކުރާ ފަހުން، ފައިސާ ޖަމާވެފައި ހުރި އެކައުންޓެއް، ތަހުގީގަށް ހޯދިއްޖެނަމަ ދެން އަލުން ދައުވާ ކުރުމުގެ ފުރުސަތު ގާނޫނުއަސާސީން ފަހިވެފައި ނުވާކަން ފާހަގަ ކުރެއްވިއެވެ.

ދުބާއީގެ ކުންފުންޏެއްކަމަށްވާ އެގްޒެކިއުޓާސް ޖެނެރަލް ޓްރޭޑިންއާ އެކު 75 ވެންޓިލޭޓަރު ސަޕްލައިކޮށްދިނުމަށް އެއްބަސްވެފައި ވާއިރު، މިހާތަނަށް ލިބިފައިވަނީ އެންމެ 15 ވެންޓިލޭޓަރެވެ. އެއްބަސްވުން ހެދި އިރު އެއްވެސް ގެރެންޓީއަކާ ނުލާ އެ ކުންފުންޏަށް ވަނީ އެޑްވާންސަށް 30.91 މިލިއަން ރުފިޔާ ދީފަ އެވެ.