މިޔަރުގެ މަސްވެރިކަން ކުރާނަމަ ގާނޫނީ ފިޔަވަޅު އަޅާނަން: ފިޝަރީޒް މިނިސްޓްރީ

ގަވާއިދާ ޚިލާފަށް މިޔަރުގެ މަސްވެރިކަން ކުރުމާއި، ޕްރޮސެސްކުރުމާއި، އެކްސްޕޯޓު ކުރުމުގައި ހަރަކާތްތެރިވާ ފަރާތްތަކާއިމެދު މަސްވެރިކަމުގެ ގާނޫނުގައި ވާގޮތުގެ މަތިން ފިޔަވަޅު އަޅާނެ ކަމަށް ފިޝަރީސް މިނިސްޓްރީން ބުނެފިއެވެ.

މި ފަހަކަށް އައިސް، ގަވާއިދާ ހިލާފަށް މިޔަރު މަސްވެރިކަން ކުރުމާއި، މިޔަރުމަހާއި އުރަހަ ޕްރޮސެސް ކުރުން، ރާއްޖޭގައި ވަނީ ވަރަށް ބޮޑަށް އިތުރުވެފައެވެ.

މިކަމާ ގުޅިގެން ފިޝަރީސް މިނިސްޓްރީން މިއަދު ނެރުނު ބަޔާނުގައި، ވަގަށް ކުރާ މިޔަރުގެ މަސްވެރިކަން ހުއްޓުވުމަށް ގިނަ ފިޔަވަޅުތަކެއް މިހާރުވެސް އަޅާފައިވާކަން ފާހަގަ ކޮށްފައިވެއެވެ.

މިޔަރު ބޭނުމާއި، ޕްރޮސެސްކުރުމާއި، އެކްސްޕޯޓުކުރުމުގެ ކަޅު ބާޒާރެއް ރާއްޖޭގައި މިހާރު ހިނގަމުން ދާކަން ފާހަގަކޮށް މިނިސްޓްރީން ބުނީ، ޚާއްސަކޮށް މިޔަރުގެ މަސްވެރިކަން ކުރާ ކަމަށް ބެލެވޭ ސަރަހައްދުތައް ޕެޓްރޯލް ކުރުން، ފުލުހުންނާއި ކޯސްޓްގާޑު ސިފައިންގެ ފަރާތުން ވަރުގަދަ ކޮށްފައި ވާކަމަށެވެ.

ފޮށީގައި ބަންދުކޮށްފައިވާ ލޮނުމަސް ޝިޕްމެންޓެއްގެ ގޮތުގައި ރާއްޖެއިން ބޭރުކުރަން އުޅުނު މިޔަރު އުރަހަތަކެއް ޖެނުއަރީ މަހުގެ 3 ވަނަ ދުވަހު، މޯލްޑިވްސް ކަސްޓަމްސް ސާވިސް އަދި އޭވިއޭޝަން ސެކިއުރިޓީ ކޮމާންޑު ގުޅިގެން، ވަނީ ހިފަހައްޓާފައެވެ. މި މައްސަލައިގެ ތަހުގީގުނިމި ފިޔަވަޅުއެޅުމުގެ މަސައްކަތް، ކަސްޓަމްސްއާއި މިނިސްޓްރީގެ ފަރާތުން ކުރަމުން ދާކަމަށް، ފިޝަރީޒް މިނިސްޓްރީގެ ބަޔާނުގައި ވެއެވެ.

މީގެ އިތުރުން މާޗު މަހުގެ 22 ވަނަ ދުވަހު ފުލުހުން ކުރިއަށް ގެންދިޔަ އޮޕަރޭޝަނެއްގައި، މިޔަރުގެ މަސްވެރިކަން ކުރަމުން ދިޔަ ދޯންޏެއް ގިނަ އަދަދެއްގެ މިޔަރާއިއެކު އަތުލައިގެންފައިވެއެވެ. މި މައްސަލަ ތަހުގީގުކުރުމުގެ މަސައްކަތް، ފުލުހުންނާއި ގުޅިގެން މިހާރު ކުރަމުން ދާކަމަށް އެ މިނިސްޓްރީން ބުނެއެވެ.