ދިއްގަރު ބިން ހިއްކުމާއި ގޮނޑުދޮށް ހިމާޔަތްކުރުމުގެ އަމަލީ މަސައްކަތް ފަށައިފި
24 މާރިޗު 2021 | ބުދަ 05:54މި 2 މަޝްރޫއު ވެސް ހަވާލުކޮށްފައިވަނީ އެމްޓީސީސީއާ
މ. ދިއްގަރު ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫޢުގެ މަސައްކަތް ފެށުން
ދިއްގަރު ބިން ހިއްކުމާއި ގޮނޑުދޮށް ހިމާޔަތް ކުރުމުގެ އަމަލީ މަސައްކަތް ފަށައިފިއެވެ.
އެމްޓީސީސީއާ ހަވާލުކޮށްގެން ކުރިއަށް ގެންދާ މި 2 މަޝްރޫއުގެ އަމަލީ މަސައްކަތް ފަށައިފައި ވަނީ ބުދަ ދުވަހު އެރަށުގައި ބޭއްވި ރަސްމިއްޔާތެއްގައެވެ.
މަޝްރޫއު އިފްތިތާހުކޮށްދެއްވީ ދިއްގަރު ދާއިރާގެ މެންބަރު އިކްރާމް ހަސަން އާއި އެމްޓީސީސީގެ ސީއީއޯ އާދަމް އާޒިމެވެ.
މި ރަސްމިއްޔާތުގައި ވާހަކަ ދައްކަވަމުން ދިއްގަރު ދާއިރާގެ މެންބަރު އިކްރާމް ހަސަން ވިދާޅުވީ ދާއިރާގެ ރަށްތަކަށް ކަންކަން ނުވެފައި ހުރި ސަބަބު ސާފުކަމަށެވެ. ކުރީގެ މަޖިލިސް މެންބަރުން މަސައްކަތްކުރެއްވީ އަމިއްލަ އެދުން ފުއްދުމަށް ކަމަށެވެ. އަދި އެބޭފުޅުން ރަށް ރަށުގެ ކުރިމަގަށް މަސައްކަތް ކޮށްފައި ނުވާކަން ފެންނަން ހުރިކަމަށް އިކްރާމް ވިދާޅުވިއެވެ. އިކްރާމް ވިދާޅުވީ އެމްޑީޕީއަކީ ކަޑަ ޖަހާނެ ބައެއް ނޫން ކަމަށާއި އެމްޑީޕީއަކީ ވައުދުވެ ވައުދު ފުއްދާނެ ބައެެއް ކަމަށެވެ.
މިރަސްމިއްޔާތުގައި ވާހަކަ ދައްކަވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ އެމްޓީސީސީގެ ޓީމަކީ ހަލުވު ޓީމެއް ކަމަށާއި ތަނަކަށް އައިސް ތަތްގަނޑެއް ވައްޓާލާ ބައެއް ނޫން ކަމަށެެވެ. އަދި މިވަގުތު ވެސް ރާއްޖޭގެ 42 ރަށެއްގައި މަސައްކަތް ހުއްޓުމެއް ނެތި ކުރިއަށްދާ ކަމަށާއި ކުރިއަށް އޮތް މަދު ދުވަސްކޮޅެއްގެ ތެރޭގައި ހިލަބާޖު ދިއްގަރަށް ވަންނާނެ ކަމަށެވެ.
އާޒިމް ވިދާޅުވީ ދިއްގަރުގެ މަސައްކަތް ހުއްޓުމެއް ނެތި ކުރިއަށް ދާނެ ކަމަށާއި އަންނަ މަހުގެ 1 ވަނަ ދުވަހު މ. މުލީ އެއަރޕޯޓުގެގެ މަސައްކަތް ފެށުމަށް ސައިޓް މޮބިލައިޒް ކުރެވިގެންދާނެ ކަމަށެވެ. އަދި 1 އަހަރުގެ ތެރޭގައި އެއަރޕޯޓުގެ މަސައްކަތް ނިންމާ ރާއްޖޭގެ ކޮންމެ ހިސާބަކުން ވެސް މުލީ އެއަރޕޯޓަށް އާދެވޭވަރު ކޮށްދެއްވާނެ ކަމަށެވެ.
މ. ދިއްގަރު ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫޢުގެ މަސައްކަތް ފެށުމަށްޓަކައި 20 މާރޗް 2021 ވަނަ ދުވަހު ޕްރޮޖެކްޓް ސައިޓް މޮބިލައިޒްކޮށްފައެވެ. މި މަޝްރޫޢުގެ ދަށުން، 25 ހެކްޓަރުގެ ބިން ހިއްކުމާއި، ބޮޑުހިލައިގެ ރިވެޓްމެންޓް ޖެހުމާއި، ބޭރުތޮށި ލުމުގެ މަސައްކަތް ހިމެނެއެވެ. މި މަޝްރޫޢަކީ 121.84 މިލިއަން ރުފިޔާގެ މަޝްރޫއެކެވެ.
