މެމްބަަރުން ކެމްޕެއިނަށް ދާންބޭނުންވާނަމަ، މަޖިލީހުން އެފުރުސަތު ދޭނަން - ނަޝީދު
ކެމްޕެއިންގެ ފުރުހިމަ ބޭނުން ހިފުމަކީ މަޖިލީހުގެ ވާޖިބެއް
މުހައްމަދު ނަޝީދު، ރައްޔިތުންގެ މަޖިލީހުގެ ރައީސް
ކުރިއަށް އޮތް ލޯކަލް ކައުންސިލްގެ އިންތިޚާބަށް، ކެމްޕެއިން ކުރުމަށްޓަކައި މެމްބަަރުން، އެ މެމްބަރެއްގެ ދާއިރާއަށް ދާން ބޭނުންވެގެން މަޖިލީހުގައި އެދިއްޖެނަމަ އެ ފުރުސަތު މަޖިލީހުން ދޭނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ. ރައީސް މިހެން ވިދާޅުވީ، ކުރިއަށް އޮތް ލޯކަލް ކައުންސިލް އިންތިހާބުގައި ސިޔާސީ ހަރަކާތްތައް ހިންގުމުގެ ހަމަހަމަ ފުރުސަތު އިދިކޮޅު ފަރާތްތަކަށް ދިނުމަށް ގޮވާލައި، މާވަށު ދާއިރާގެ މެންބަރު މުހައްމަދު ސައީދު ހުށަހެޅުއްވި މައްސަލައާ ގުޅިގެންނެވެ. ރައީސް ނަޝީދު ވިދާޅުވީ، އިންތިޚާބުގެ ކެމްޕެއިންގެ ބޭނުން އެންމެ ފުރިހަމަ ގޮތުގައި މެމްބަރުން ހިފަންޖެހޭނެ ކަމަށާއި އެއީ އެ މެމްބަރުންގެ ވާޖިބެއް ކަމަަށް ދެކިވަޑައިގަންނަވާ ކަމަށެވެ.
ރައީސް ނަޝީދު ވިދާޅުވީ، އެ މަނިކުފާނު ދެކެވަޑައިގަންނަވާ ގޮތުގައި ކެމްޕެއިން ކުރުމަށްޓަކައި، މަޖިލީހުގެ ބޭނުން ފުރިހަމަ ގޮތުގައި މެމްބަރުން ހިފަން ޖެހޭނެއެވެ.
ރައީސް ނަޝީދު ވިދާޅުވީ، މެމްބަރުންނަކީ ސިޔާސީ ބަޔަކަށްވާތީވެ ކެމްޕެއިންގައި އުޅުމަކީ މެމްބަރުންގެ މަސްއޫލިއްޔަތު ތެރޭގައި ހިމެނޭ ކަމެއް ކަމަށެވެ. އަދި ޕެންޑަމިކްގެ މިހާލަތާހުރެ، ކެމްޕެއިންކުރުން އޭގެ އެންމެ ފުރިހަމަ ގޮތުގައި ކުރިއަށް ނުގެންދެވޭތީ އެކަމުގެ ކަންބޮޑުވުން އެބައޮތް ކަމަށާއި، ކަންމަތީ ޖަލްސާތައް ބޭއްވޭނެ ނަމައޭ ޚުދު އެމަނިކުފާނުގެ ހިތްޕުޅަށްވެސް އަރާ ކަމަށް ވިދާޅުވިއެވެ.
އެޗްޕީއޭގެ ގައިޑްލައިނާ އެއްގޮތަށް ކެމްޕެއިން ހަރަކާތްތައް ކުރިއަށް ގެންދިޔުމަށް އެޗްޕީއޭއިންވަނީ އިލްތިމާސްކޮށްފައެވެ.
