މަނަދޫގައި ޓުއަރިސްޓް ހޮޓަލެއް ތަރައްޤީކުރުމުގެ ފުރުސަތު ހުޅުވާލައިފި

ނ. މަނަދޫގައި ޓުއަރިސްޓް ހޮޓަލެއް ތަރައްޤީކުރުމަށް ޝައުގުވެރިވާ ފަރާތްތަކަށް އެ ފުރުސަތު ހުޅުވާލައިފިއެވެ.

ޓުއަރިޒަމް މިނިސްޓްރީން އާންމުކޮށްފައިވާ އިއުލާނުގައި ބުނެފައިވަނީ، ނ. މަނަދޫގެ 132،000 އަކަ ފޫޓުގެ ބިމެއްގައި ޓުއަރިސްޓް ހޮޓަލެއް ތަރައްޤީކޮށް ހިންގުމަށް ޝައުގުވެރިވާފަރާތްތަކުން އެޕްރީލް 8 ވަނަ ދުވަހުގެ ކުރިން ޕްރޮޕޯޒަލް ހުށަހެޅުމަށް އެދޭ ކަމަށެވެ.

މި ކަމާ ގުޅޭ ގޮތުން މައުލޫމާތު ދިނުން އޮންނާނީ މާރޗު 29ގައި ޒޫމް މެދުވެރިކޮށެވެ. ޝައުގުވެރިވާ ފަރާތްތަކުން މައުލޫމާތު ދިނުމަށް ބާއްވާ ބައްދަލުވުމުގައި ބައިވެރިވުމަށް އެދި މާރޗު 28ގެ ކުރިން planning@tourism.gov.mv އަށް މެއިލް ކުރުމަށް އެ މިނިސްޓްރީން އެދެއެވެ. ބިޑަށް އެދި ހުށަހަޅާ ފޯމް މިނިސްޓްރީގެ ވެބްސައިޓުން ލިބެން ހުންނާނެކަމަށް މިނިސްޓްރީން ބުނެއެވެ.

ރާއްޖޭގެ އެކިކަންކޮޅުތަކުގައި ފަތުރުވެރިކަން ތަރައްޤީކުރުމަށް ސަރުކާރުން ކުރަމުން އަންނަ މަސައްކަތުގެ ތެރެއިން، ރަށްރަށުގައި ގެސްޓް ހައުސްތަކާއި، ޓުއަރިސްޓް ހޮޓާތައް ތަރައްޤީކުރުމަށް އަންނަނީ ފުރުސަތު ހުޅުވާލަމުންނެވެ. އެގޮތުން މި މަހުގެ ތެރޭގައި އައްޑޫ ސިޓީގައި ވެސް ވަނީ ޓުއަރިސްޓް ހޮޓާ ތަރައްޤީކުރުމަށް ބިން ހަވާލުކޮށްފައެވެ.