ކައުންސިލް އިންތިހާބަށް ބޭނުންވާ އިތުރު ފައިސާ ލިބިއްޖެ: ޝަރީފް

ކުރިއަށް އޮތް ލޯކަލް ކައުންސިލް އިންތިހާބަށް ބޭނުންވާ އިތުރު ފައިސާގެ ބަޖެޓު ހޯމަ ދުވަހު އިލެކްޝަންސް ކޮމިޝަނަށް ލިބިފައިވާކަމަށް އެ ކޮމިޝަންގެ ރައީސް އަހުމަދު ޝަރީފް ވިދާޅުވެއްޖެއެވެ.

ޝަރީފް ކުރެއްވި ޓުވީޓެއްގައި ވިދާޅުވީ ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބަށް ދީފައިވާ ބަޖެޓުގެ އިތުރަށް ބޭނުންވާނެ ކަމަށް ލަފާކުރެވޭ 29.8 މިލިއަން ރުފިޔާގެ ބަޖެޓު އިލެކްޝަންސް ކޮމިޝަނަށް ހޯމަ ދުވަހު ލިބިފައިވާ ކަމަށެވެ.

Advertisement

މިދިޔަ އަހަރު ބާއްވަން ތާވަލްކުރި ލޯކަލް ކައުންސިލް އިންތިހާބު ފަސްކުރީ ކޮވިޑް-19ގެ ސަބަބުންނެވެ. އަންނަ އޭޕްރިލް މަހުގެ 10 ވަނަ ދުވަހަށް އިންތިހާބު ތާވަލްކޮށްފައިވާއިރު ކޮވިޑް-19ގެ ސަބަބުން އަޅަން ޖެހޭ ސަލާމަތީ ފިޔަވަޅުތަކާއެކު އިންތިހާބު ބާއްވާތީ އިންތިހާބަށް ބޮޑު ހަރަދެއް ކުރަން ޖެހެއެވެ. އެގޮތުން އިންތިހާބަށް މީގެ ކުރިން ކަނޑައަޅާފައިވާ 51 މިލިއަން ރުފިޔާގެ އިތުރަށް 42 މިލިއަން ރުފިޔާ ބޭނުންވާނެކަމަށް އިލެކްޝަންސް ކޮމިޝަނުން ލަފާކުރި ނަމަވެސް ރައްޔިތުންގެ މަޖިލީހާއެކު ބޭއްވި މަޝްވަރާތަކަށް ފަހު ކޮމިޝަނުން ވަނީ އެ އަދަދު 29.8ށް ތިރިކޮށްފައެވެ.

އެކަމާ ގުޅިގެން ކޮމިޝަންގެ ރައީސް އަހުމަދު ޝަރީފް "ރާއްޖެ އެމްވީ"އަށް ވިދާޅުވީ ބަޖެޓު ލިބުނުނަމަވެސް މި ދަނޑިވަޅުގައި އެހާބޮޑު ހަރަދެއް ކުރަން ޖެހުމަކީ ކަންބޮޑުވެވަޑައިގަންނަވާ ކަމެއް ކަމަށެވެ. ޝަރީފް ވިދާޅުވީ ފުރަތަމަ ލަފާކުރި އަދަދު ކުޑަކުރީވެސް ވަރަށް ގިނަ ކަންކަން މަދުކޮށްފައި ކަމަށެވެ. އޭނާ ވިދާޅުވީ އެހާ ބޮޑު އިތުރު ހަރަދެއް ހިނގަނީ ސަލާމަތީ ކަންކަމުގެ ސަބަބުން ކަމަށެވެ. އެގޮތުން އެޗްޕީއޭއިން އަންގާފައިވާ އުސޫލާ އެއްގޮތަށް އަމަލުކުރާއިރު، ކޮންމެ ފޮއްޓަކަށް ވޯޓުލާ މީހުން އަދަދު މަދުކުރަން ޖެހޭކަމަށާއި އޭގެ ސަބަބުން ވޯޓު ފޮށިތަކާއި އޮފިޝަލުންވެސް އިތުރުކުރަން ޖެހިފައިވާކަމަށް ވިދާޅުވިއެވެ.

ޝަރީފް ވިދާޅުވީ ކައުންސިލް އިންތިހާބަށް އެންމެ ފަހުގެ ތައްޔާރީތައްވަމުން އަންނައިރު އަދިވެސް އޮފިޝަލުން ހަމަނުވާ ކަމަށެވެ. އަދި އެކަމަށް ޝައުގުވެރިކަން ހުރި މީހުން ވީހާވެސް އަވަހަށް އެކަމަށް ކުރިމަތިލުމަށް އެދިވަޑައިގެންނެވިއެވެ. ޝަރީފް ވިދާޅުވީ ކޮވިޑް-19ގެ ހާލަތަށް ބަލައި އޮފިޝަލުންގެ ބެކްއަޕް ޓީމެއްވެސް އެކުލަވާލަން ޖެހޭ ކަމަށެވެ. އަދި އެކަންވެސް ކޮށްފައިވާ ކަމަށް ވިދާޅުވިއެވެ.

ކޮވިޑް-19ގެ ސަބަބުން ލޯކަލް ކައުންސިލް އިންތިހާބު ފަސްކޮށް އޭޕްރިލް މަހުގެ 10ގައި އިންތިހާބު ބޭއްވުމަށް ތައްޔާރީތައްވަމުން އަންނައިރު މި ހާލަތުގައި ޕާޓީތަކަށް ކެމްޕޭން ކުރުމުގެ އެންމެ ރަނގަޅު ފުރުސަތުވެސް ނުލިބެއެވެ. އެގޮތުން ރަށްރަށަށް ގޮސް ކެމްޕޭން ކުރުމުގެ ފުރުސަތު މި އިންތިހާބުގައި ގެއްލިފައިވާއިރު ހުރިހާ ޕާޓީއަކުންވެސް އޮންލައިންކޮށް ކެމްޕޭންކުރުމަށް ކޮމިޝަނުންވެސް ވަނީ އިލްތިމާސްކޮށްފައެވެ.