ވަރކް ޕަރމިޓް ހެލްތް ކަވަރ ޕެކޭޖްގެ ގޮތުގައި ބަލައިގަންނާނީ "މިނިމަމް ރިކުއަރމެންޓް" ފުރިހަމަވާ ޕެކޭޖް - އިކޮނޮމިކް މިނިސްޓްރީ
މިނިސްޓްރީގައި ރަޖިސްޓްރީވެފައިވާ އިންޝޫރެންސް ހިދުމަތް ފޯރުކޮށްދޭ ފަރާތްތަކާއި އެ ފަރާތްތައް ރަޖިސްޓްރީ ކުރެވިފައިވާ ތާރީހު މިނިސްޓްރީގެ ވެބްސައިޓްގައި ވަނީ ޝާއިއުކޮށްފައި
ރާއްޖޭގައި ދިރިއުޅޭ ބިދޭސީ މަސައްކަތްތެރިން
ރާއްޖޭގައި ވަޒީފާ އަދާކުރާ ބިދޭސީންގެ ވާރކް ޕާރމިޓް ހެއްދުމަށް, ނަގަންޖެހޭ "ވަރކް ޕަރމިޓް ހެލްތް ކަވަރ ނުވަތަ އިންޝޫރެންސް"، އިކޮނޮމިކް މިނިސްޓްރީން ބަލައި ގަންނާނީ، އެ މިނިސްޓްރީގައި ރަޖިސްޓްރީވެފައިވާ އިންޝޫރެންސް ޚިދުމަތް ފޯރުކޮށްދޭ ފަރާތްތަކުން ހޯދާފައިވާ "މިނިމަމް ރިކުއަރމެންޓް" ފުރިހަމަވާ "ވަރކް ޕަރމިޓް ހެލްތް ކަވަރ ޕެކޭޖްތައް ކަމަށް މިނިސްޓްރީން ބުނެފިއެވެ.
އިކޮނޮމިކް މިނިސްޓްރީން އާންމުކޮށްފައިވާ ބަޔާނެއްގައިވާ ގޮތުން "މިނިމަމް ރިކުއަރމެންޓް" އާ އެއްގޮތްވާގޮތަށް އިންޝޫރެންސް ޕެކޭޖް ދޫކުރުމަށް އެއްބަސްވެ، އެ މިނިސްޓްރީގައި ރަޖިސްޓްރީވެފައިވާ އިންޝޫރެންސް ޚިދުމަތް ފޯރުކޮށްދޭ ފަރާތްތަކާއި އެ ފަރާތްތައް ރަޖިސްޓްރީ ކުރެވިފައިވާ ތާރީޚު މިނިސްޓްރީގެ ވެބްސައިޓް، www.trade.gov.mv އަދި އެކްސްޕަޓް އޮންލައިން ސިސްޓަމް، xpat.egov.mv ގެ ހޯމް ޕޭޖްގައި މިނިސްޓްރީން ވަނީ ޝާއިއު ކޮށްފައެވެ.
އޭގެ އިތުރުން މިއަހަރުގެ އޭޕްރިލް މަހުގެ އެއް ވަނަ ދުވަހުން ފެށިގެން، ވަރކް ޕަރމިޓް ދޫކުރާނީ، މިނިސްޓްރީގައި ރަޖިސްޓްރީވެފައިވާ އިންޝޫރެންސް ޚިދުމަތް ފޯރުކޮށްދޭ ފަރާތްތަކުގެ ތެރެއިން ފަރާތަކުން ހޯދާފައިވާ މިނިސްޓްރީން އާންމުކޮށްފައިވާ މިނިމަމް ރިކުއަރމެންޓް ފުރިހަމަވާ ވަރކް ޕަރމިޓް ހެލްތް ކަވަރ ޕެކޭޖް އޮތް ފަރާތްތަކަށް ކަމަށް މިނިސްޓްރީން ބުނެއެވެ. އަދި މި ތާރީޚާ ހަމައަށް ވަރކް ޕަރމިޓް ހެލްތް ކަވަރ ޕެކޭޖެއްނެތި، ވަރކް ޕަރމިޓް ދޫކޮށްފައިވާ ބިދޭސީންގެ ވަރކްޕަރމިޓް ފީ މި ތާރީޚަށް ފަހު ދެއްކޭނީ، މިނިސްޓްރީން އާންމުކޮށްފައިވާ އުސޫލާ އެއްގޮތަށް ވަރކް ޕަރމިޓް ހެލްތް ކަވަރ ޕެކޭޖް ނަގައި އެ މައުލޫމާތު މިނިސްޓްރީއަށް ހުށަހެޅުމުންކަމަށް އިިކޮނޮމިކް މިނިސްޓްރީން ބުނެއެވެ.
އިކޮނޮމިކް މިނިސްޓްރީން ބުނީ މިގޮތަށް އަމަލުކުރަން ނިންމި ނަމަވެސް މިއަހަރުގެ މަރޗް 15 ގެ ކުރިން، އެ މިނިސްޓްރީގައި ރަޖިސްޓްރީކޮށްފައި ނުވާ އިންޝޫރެންސްގެ ޚިދުމަތް ފޯރުކޮށްދޭ ފަރާތްތަކުން ނަގާފައިވާ، މުއްދަތު ހަމަނުވާ ވަރކް ޕަރމިޓް އިންޝޫރެންސް ޕެކޭޖެއް އޮތް ނަމަ، އެ ޕެކޭޖްގެ މުއްދަތު ހަމަވުމާ ހަމަޔަށް ވަރކް ޕަރމިޓް ދޫކުރާނެ ކަމަށެވެ.
ރާއްޖޭގައި ވަޒީފާ އަދާކުރާ ބިދޭސީންނަށް ވަރކް ޕަރމިޓް ދޫކުރަން ފެބްރުއަރީ 15 ގައި ފަށާފައިވާއިރު، ބިދޭސީން ވަޒީފާ އަދާކުރުމާބެހޭ ގަވައިދުގައި ބަޔާންކުރާ ގޮތަށް ވަރކް ޕަރމިޓް ދޫކުރެވޭނީ، އިކޮނޮމިކް މިނިސްޓްރީން ބިދޭސީންގެ ވެރިފިކޭޝަނެއް ފުރިހަމަ ކުރުމަށް ފަހުކަމަށާއި، އެކްސްޕެޓް ސިސްޓަމް މެދުވެރިކޮށް ވެރިފިކޭޝަން ފުރިހަމަ ކުރެވޭނެ ކަމަށް އިކޮނޮމިކް މިނިސްޓްރީން ވަނީ ބުނެފައެވެ. އަދި ވެރިފިކޭޝަން ފުރިހަމަކުރުމަށް އެޕޮއިންޓްމެންޓެއް ހެދުމަށްފަހު، ވަޒީފާދޭ ފަރާތުން ނުވަތަ އެ ފަރާތުން އައްޔަންކުރާ އެހެން ފަރާތަކުން، ހުރަވީ ބިލްޑިންގެ 3 ވަނަ ފަންގިފިލާގައި ހުންނަ އިކޮނޮމިކް މިނިސްޓްރީގެ އެމްޕްލޯއިމަންޓް ރަޖިސްޓްރޭޝަން ސެކްޝަންގެ ކައުންޓަރަށް ބިދޭސީން ގެންދަން ޖެހެއެވެ. ބިދޭސީން ރާއްޖެ އެތެރެވާ ދުވަހުން ފެށިގެން، ވަރކް ޕަރމިޓް ހޯދަން ކަނޑައެޅިފައިވާ މުއްދަތު ހަމަވަންދެން ކޮންމެ ދުވަހަކު ވެސް ވެރިފިކޭޝަންގެ ޚިދުމަށް ހޯދޭނެ ކަމަށް އެ މިނިސްޓްރީން ބުނެއެވެ.
