ޖޭޕީއަށް ފާޑު ވިދާޅުވުމަށްފަހު، މަލީހު ޕާޓީން ވަކިވެވަޑައިގެންފި

އިތިބާރުނެތްކަމުގެ ވޯޓަކާއެކު މަގާމުން ވަކިކުރި ކުރީގެ ކޮމިއުނިކޭޝަން މިނިސްޓަރު މުހައްމަދު މަލީހު ޖަމާލު ޖުމްހޫރީ ޕާޓީއިން (ޖޭޕީ) އިން ވަކިވެވަޑައިގެންފިއެވެ.

ޖޭޕީއަށް ފާޑު ވިދާޅުވެ ބުދަ ދުވަހުގެ ރޭ މަލީހު ކުރެއްވި ޓްވީޓެއްގައި ވިދާޅުވީ ސަރުކާރުތެރޭ ޖޭޕީގެ އަޑު އެންމެ އިޚުލާސްތެރިކަމާއި އެކު އުފުލި މީހާއާއި ދޭތެރޭ ބޭއިންސާފު ހުސްކޮށް އެމްޑީޕީއިން ކަންކުރަމުން ދިޔަ އިރު ޖޭޕީއިން ހުރީ ހަނު ކަމަށެވެ. އަދި ބޮޑެތި ތުހުމަތުތަކާއި އެކު ވަކި ކުރެވުނެ ފަރާތްތަކާއި މެދު ފިޔަވަޅު ނާޅާކަން މަލީހު ފާހަގަކުރެއްވިއެވެ. މަލީހު އެއިޝާރާތް ކުރައްވާފައިވަނީ ޖިންސީ ގޯނާގެ ތުހުމަތުތަކެއްގައި ދައުވާކޮށްފައިވާ ކުރީގެ ޓޫރިޒަމް މިނިސްޓަރު އަލީ ވަހީދުގެ މައްސަލައަށެވެ.

މަލީހުގެ ފާޑުކިޔުން ޕޭޖީއަށް އަމާޒުވެފައި މިވަނީ މަލީހު އިތުބާރު ނެތްކަމަށް ރައްޔިތުންގެ މަޖިލީހުން ފާސްކުރިއިރު އެޕާޓީން އެކަމާ ދެކޮޅަށް އެއްވެސް ވާހަކައެއް ދައްކާފައިނުވާތީ ކަމަށްވެއެވެ.

މީގެ އިތުރުން މަލީހު ވަނީ އިދިކޮޅު ކޯލިޝަނުން ކުރިއަށް އޮތް ލޯކަލް ކައުންސިލް އިންތިހާބުގެ ކެމްޕޭން ހަރަކާތްތަކުގެ ތެރެއިން ފުވައްމުލަކު ކެމްޕޭން ފެށުމަށް ބޭއްވި ރަސްމިއްޔާތުގައި ވެސް ބައިވެރިވެވަޑައިގެންފައެވެ.

ޖުމްހޫރީ ޕާޓީ މިހާރު އޮތީ "ސައިލެންޓް މޯޑު" ގައިކަން ފާހަގަކުރައްވައި މަލީހު ވިދާޅުވީ އެޕާޓީގެ ނަމުުގައި އެމްޑީޕީން އެ ހިންގާ ކަންކަމާ ދެކޮޅަށް މިވަގުތު ނިކުމެވެން ނެތް ކަމަށާއި، އެކަމުގައި އިދިކޮޅު ކޯލިޝަނާ ގުޅިވަޑައިގެންނެވީ އެ ސަބަބައްޓަކާ ކަމަށެވެ. އޭނާ ވިދާޅުވީ ލޯކަލް ކައުންސިލް އިންތިހާބުގައި އެމްޑީޕީއަށް މެޖޯރިޓީ ލިބިއްޖެ ނަމަ އެ ބޭނުންވާ ގޮތަށް ބަރުލަމާނީ ނިޒާމަކަށް ބަދަލުކުރަން ވަރަށް ބޮޑު ބާރެއް އެ ޕާޓީއަށް ލިބޭނެ ކަމަށެވެ. އެ ފުރުސަތު ދެވެން ނެތް ކަމަށާއި، ސިޔާސީ މީހެއްގެ ހައިސިއްޔަތުން ހުއްޓިގެން ހުރެވެން ވެސް ނެތް ކަމަށެވެ. އެހެންވެ ޖުމްހޫރީ ޕާޓީގެ މެމްބަރުން ކުރިމަތިލާފައި ނުވާ ހުރިހާ ދާއިރާއަކަށް ވެސް އިދިކޮޅަށް ކެމްޕޭންކޮށްދެއްވާނެ ކަމަށް މަލީހު ވިދާޅުވިއެވެ.

އިދިކޮޅު ކޯލިޝަންގެ ކެމްޕޭން ހަރަކާތްތަކާ މަލީހު ގުޅިވަޑައިގެން މައްސަލައިގައި ޖޭޕީއިން ބުނީ އެކަމަށް އެޕާޓީގެ ތާއީދު ނެތް ކަމަށެވެ. އެ ޕާޓީ އޮތީ ސަރުކާރު ހިންގާ ކޯލިޝަނާއެކު ކަމަށާއި އެއްވެސް ހާލެއްގައި އިދިކޮޅު ކޯލިޝަންއާ ނުގުޅޭނެ ކަމަށާއި، ކޯލިޝަން ދަމަހައްޓަން ކުރެވެން ހުރި ހުރިހާ މަސައްކަތެއް ކުރާނެ ކަމަށް ވެސް ބުންޏެވެ. އެ ޕާޓީން ބުނީ މަލީހު އިދިކޮޅުގެ ކެމްޕޭނުގައި ބައިވެރިވި މައްސަލަ ބަލަމުން އަންނަ ކަމަށާއި، އެކަން ކުށްވެރިކުރާ ކަމަށެވެ.