ބްރެޒިލްގެ ހޮސްޕިޓަލްތައް ފުރި ބަންޑުންވަނީ!

ކޮވިޑްގެ ކޭސްތައް އިންތިހާއަށް އިތުރުވެ ބްރެޒިލްގެ ހޮސްޕިޓަލްތައް ފުރި ބަންޑުންވުމާ ގާތްވެއްޖެ ކަމަށް ބައިނަލްއަގުވާމީ މީޑިއާތަކުން ރިޕޯޓްކޮށްފިއެވެ.

ބައިނަލްއަގުވާމީ މީޑިއާތަކުން ބުނެފައިވަނީ ބުރަޒިލްގެ ބޮޑެތި ސިޓީތަކުގެ ހާލަތު ގޯސްކަމަށެވެ. އެގޮތުން ރިއޯ ޑި ޖެނޭރޯގެ 80 އިންސައްތަ އައިސީޔޫ އެނދުތައް ފުލްވެފައިވާ އިރު، މިހާލަތު 27 ސްޓޭޓުގެ ތެރެއިން 25 ސްޓޭޓަކަށް ދިމާވެފައިވާ ކަމަށެވެ. އަންގާރަ ދުވަހު އެކަނި ވެސް އެގައުމުގައި 2000 އާ ގާތްކުރާ އަދަދަކަށް މީހުން ވަނީ މަރުވެފައެވެ. މިއީ މިފަހުން ރެކޯޑް އަދަދަކަށް މީހުން މަރުވި ދުވަހެވެ. އަންގާރަ ދުވަހުގެ އަދަދުތަކާއެކު ބްރެޒިލްގައި 266،000ށް ވުރެ ގިނަ މީހުން މަރުވެފައިވާ އިރު، ކޮވިޑް ފެތުރެން ފެށިފަހުން މިހާތަނަށް 11 މިލިއަނަށްވުރެ ގިނަ މީހުން ވަނީ ބައްޔަށް ޕޮޒިޓިވްވެފައެވެ.

އެމެރިކާއަށް ފަހު ދުނިޔޭގައި އެންމެ ގިނަ މީހުން މަރުވި ގައުމަކީ ބްރެޒިލްއެވެ. އަދި 3 ވަނަ އަށް އެންމެ ގިނަ ކޭސްތައް ރިޕޯޓްކޮށްފައިވަނީ އެގައުމުގައެވެ.

ފިއޯކްރޫޒުން އާންމުކޮށްފައިވާ މައުލޫމާތުތައް ދައްކާ ގޮތުން 15 ސްޓޭޓެއްގެ ވެރިކަން ކުރާ ރަށުގެ އައިސީޔޫތަކުގެ 90 އިންސައްތަ ބެޑްތައް ވަނީ ފުލްވެފައެވެ. މީގެ ތެރޭގައި ރިއޯ ޑި ޖެނެއިރޯ، ބްރަސިލިއާ އަދި ސައު ޕައުލޯ ހިމެނެއެވެ. ޕޯޓޯ އެލެގްރާ އަދި ކެމްޕޯ ގްރާންޑްގައި އައިސީޔޫގެ ނިސްބަތަށްވުރެ އެޑްމިޓްކުރަން ޖެހޭ މީހުންގެ އަދަދު އިތުރުވެފައިވާ ކަމަށް ފިއޯކްރޫޒުން ވަނީ ބުނެފައެވެ. މިއާއެކު އެގައުމުގެ ސިއްހީ ނިޒާމް ފުނޑިދާނެކަމުގެ އިންޒާރު ކަމާބެހޭ ފަރާތްތަކުން އަންނަނީ ދެމުންނެވެ.

ބްރެޒިލްގައި ކޮވިޑްގެ ހާލަތު ގޯސްވެ ފިޔަވަޅުތަކަށް އިތުރަށް ސަމާލުކަން ދިނުމަށް ވަނީ ގޮވާލާފައެވެ. އެގޮތުން ސޯޝަލް ޑިސްޓެންސިންގ، މާސްކް އެޅުމާއި އަތް ދޮވުމުގެ އުސޫލުތައް ވަރުގަދަކުރުމަށް ވަނީ ގޮވާލާފައެވެ.

ކަމާގުޅޭ މާހިރުން ވެލޯރ އިކޮނަމިކް ނޫހަށް މިދިޔަ ހަފްތާގައި ދީފައިވާ މައުލޫމާތުތައް ދައްކާ ގޮތުން ދުވާލެއްގެ މައްޗަށް އާންމުކޮށް ވެސް މަރުވާ މީހުންގެ އަދަދު 2000ން މައްޗަށް ހިނގައިދާނެކަމަށް ވަނީ ބުނެފައެވެ. އަދި މިކަމަށް މިވަގުތު އޮތް ހައްލަކީ މަރުކަޒީ ސަރުކާރުތަކުން ބާރުތައް ނުހިންގާ މައި ސަރުކާރުން ކޮވިޑް-19 އާ ދެކޮޅަށް މަސައްކަތް ކުރުމަށް ނުކުތުން ކަމަށެވެ. އަދި މިއާއެކު ގައުމު ލޮކްޑައުން ކުރުމާއި، މާސްކް އެޅުން މަޖުބޫރުކޮށް ވެކްސިނޭޝަން ޕްރޮގްރާމް އިތުރަށް ވަރުގަދަ ކުރުން ހިމެނެއެވެ.

މިހާތަނަށް އައި އިރު، އެގައުމުގައި ވެކްސިން ޖަހާފައިވަނީ 8 މިލިއަން މީހުންނެވެ. މިއީ އާބާދީގެ 4 އިންސައްތައެވެ. އަންގާރަ ދުވަހު އެކަނި ވެސް އެގައުމުގައި 70،000ށް ވުރެ ގިނަ މީހުން ކޮވިޑަށް ޕޮޒިޓިވްވެގެން ރިޕޯޓްކޮށްފައިވެއެވެ. މިއީ ނިމިގެން ދިޔަ ހަފްތާއާ އަޅާ ބަލާއިރު 39 އިންސައްތައިގެ އިތުރުވުމެކެވެ. އަދި މިހާރު ފެންނަމުންދާ ކޭސްތަކަކީ އައު ވޭރިއަންޓްގެ ކޭސްތައް ކަމަށް ކަމާ ބެހޭ ފަރާތްތަކުން ވަނީ ބުނެފައެވެ.