ފުރިހަމަ ތަރައްޤީއެއް ރައްޖެއަށް ގެނައުމަށް ރައީސްކަމުގެ ދެ ދައުރު ފުރިހަމަކުރުމަށް ފުރުސަތު ދޭންޖެހޭކަމަށް ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވެއްޖެއެވެ.

ރާއްޖެޓީވީގެ "ފަށާއިރު" ޕްރޮގްރާމްގައި ވާހަކަދައްކަވަމުން، ރައީސް އޮފީހުގެ ތަރުޖަމާނަކަށް ދާދިފަހު ހަމަޖެއްސެވި މުހައްމަދު މަބްރޫކް އަޒީޒް ވަނީ އެމަނިކުފާނުގެ ޒާތީ ބައެއް ކަންކަމާއި ސިޔާސީ ޙަޔާތްޕުޅާ ގުޅޭގޮތުން ވާހަކަދައްކަވާފައެވެ. އެގޮތުން އެންމެ ފަހުން ބޭއްވި ރައްޔިތުންގެ މަޖިލީހުގެ އިންތިޚާބުގައި ނާކާމިޔާބީ ކުރިމަތިވިޔަސް ޤައުމަށް ޚިދުމަތްކުރުމަށް ކަނޑައަޅުއްވައިގެން ހުންނެވި އަޒުމަށް ގުޑުލެއް ނާރުވާ ހުރުމުގެ ނަތީޖާއަކީ މިއަދު މަބްރޫކްގެ މަސައްކަތް އާންމުން ބަލައިގަންނަ އެއް ސަބަބުކަމަށް މަބްރޫކް ވިދާޅުވިއެވެ. އެގޮތުން ކޮވިޑާ ދެކޮޅަށް ފެށި ހަނގުރާމައިގައި ނެޝަނަލް އިމަޖެންސީ އޮޕަރޭޝަން ސެންޓަރުގެ ތަރުޖަމާނެއްގެ ގޮތުން ކުރި މަސައްކަތް އާންމުން ވަރަށް ބޮޑަށް ބަލައިގަތްކަން ފާހަގަކުރައްވައި މަބްރޫކް ވަނީ ރައީސް އޮފީހުގެ ތަރުޖަމާނެއްގެ ގޮތުން ވެސް ރައީސް އޮފީހުގެ ކަންކަން ރާއްޖޭގެ ނޫސްވެރިންނަށް ހިއްސާކުރުމަށް މަސައްކަތްކުރައްވާނެކަމަށް ވިދާޅުވެފައެވެ.

މި ޕްރޮގްރާމްގައި ވާހަކަދައްކަވަމުން، މަބްރޫކް ވަނީ އެމަނިކުފާނުގެ ބައެއް ސިޔާސީ ވިސްނުންފުޅުތަކާ ގުޅޭގޮތުން ވެސް ވާހަކަދައްކަވާފައެވެ. އެގޮތުން ރާއްޖޭގެ ވެރިކަމުގެ ނިޒާމު މިހާރު ހިނގާގޮތުން ތަރައްޤީގެނައުމުގައި ލަސްތަކެއް ކުރިމަތިވާކަން މަބްރޫކް ފާހަގަކުރެއްވިއެވެ. އެގޮތުން 5 އަހަރުގެ 1 ދައުރަށްވުރެ ދިގުކޮށް މިހާތަނަށް އައިރު ރާއްޖޭގެ ޑިމޮކްރަސީގައި ވެރިކަން ކުރެވިފައި ނުވާއިރު، މި މުއްދަތަކީ ތަރައްޤީ ގެނައުމަށް އެންމެ އެކަށޭނަ މުއްދަތެއް ނޫންކަމަށް މަބްރޫކް ވިދާޅުވިއެވެ.

މިފަހުގެ ތާރީޚެއްގައި އެމެރިކާގެ އެންމެ ކާމިޔާބު އެއް ރައީސްގެ ގޮތުގައި ފާހަގަކުރެއްވުނު ބަރަކް އޮބާމާގެ ވެރިކަމުގެ 8 އަހަރުން މިސާލު ނަންގަވަމުން މަބްރޫކް ވަނީ އޮބާމާގެ ފުރަތަަމަ ދައުރުގެ 4 އަހަރުގައި މާގިނަ ކާމިޔާބީތަކެއް ޙާސިލުނުވުމުން ފާޑުކިޔުންތައް އަމާޒުވިޔަސް، ދެވަނަ ދައުރުގައި އޮބާމާ ގެންނެވި ތަރައްޤީގެ އަވަސް ފިޔަވަޅުތަކަކީ އެމަނިކުފާނުގެ ވެރިކަން ކާމިޔާބީއެއްގެ ގޮތުގައި ސިފަކުރާ މައިގަނޑު ސަބަބުކަމަށެވެ. މަބްރޫކް ވަނީ ފުރިހަމަ ތަރައްޤީއެއް ރައްޖެއަށް ގެނައުމަށް ރައީސްކަމުގެ ދެ ދައުރު ފުރިހަމަކުރުމަށް ފުރުސަތު ދޭންޖެހޭކަމަށް ވިދާޅުވެފައެވެ.

ދެވަނަ ދައުރަކަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވާދަކުރައްވަފާނެތޯ ސުވާލުކުރުމުން، މަބްރޫކްވަނީ މިކަން އެނގިގެންދާނީ ކުރިއަށް އޮތް އަހަރެއްހާދުވަހުގެ ތެރޭގައި ކަންކަން ވާގޮތުންކަމަށް ވިދާޅުވެފައެވެ. އެހެންނަމަވެސް، ރައީސް ޞާލިޙް ދެވަނަ ދައުރަކަށް ހޮވިވަޑައިގަތުމަށް ކުރާ ކެމްޕޭންގައި ބައިވެރިވަޑައިގަތުމަށް ބޭނުންވާކަމަށް މަބްރޫކް ވިދާޅުވިއެވެ.

ޕްރޮގްރާމްގެތެރެއިން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙްއާ ގުޅޭގޮތުން ވާހަކަދައްކަވަމުން މަބްރޫކްވަނީ އެމަނިކުފާނަކީ، ވަރަށް ދުރު ވިސްނުންފުޅެއް ގެންގުޅުއްވާ، އެންމެންގެ ޚިޔާލާއި މަޝްވަރާ ހޯއްދަވާ ބޭފުޅެއްކަމަށް ވިދާޅުވެފައެވެ. ކޮވިޑްގެ ބިރުވެރި ޙާލަތުގައި ވެސް އެންމެ ބިރުން އުޅުނު އިރު ރައީސް ޞާލިޙްގެ ކިބައިން ފެނިގެން ދިޔައީ ތަޖުރިބާކާރުންގެ މަޝްވަރާއާއެކު ޙިކްމަތްތެރިކަން އިސްކުރެއްވިތަންކަމަށް މަބްރޫކް ވިދާޅުވިއެވެ. އެމްޑީޕީއިން ނުކުންނަ ކެންޑިޑޭޓަކަށް ކެމްޕޭންކުރުމަށް ނުކުންނަވާނެކަމަށް މަބްރޫކް ވިދާޅުވިއެވެ.

މި ޕްރޮގްރާމްގައި މަބްރޫކްވަނީ އެމަނިކުފާނުގެ ސިޔާސީ އިތުރު ވިސްނުންތަކާ ގުޅޭގޮތުން ވެސް ވާހަކަދައްކަވާފައެވެ. އެގޮތުން ރާއްޖޭގެ ވެރިކަމުގެ ނިޒާމަށް ބަދަލުގެނައުމުގެ ވާހަކަތަކެއް ދެކެވޭ މި ދަނޑިވަޅުގައި އެކަމަށް ވުރެ އަވަހަށް ހައްލު ގެންނަންޖެހޭކަންކަން އެބަހުރިކަމަށް ވިދާޅުވިއެވެ. އެގޮތުން ވެރިކަމުގެ ނިޒާމު ހިންގާނީ ބަރުލަމާނީ ނިޒާމަކުންތޯ ނުވަތަ ރިޔާސީ ނިޒާމަކުންތޯ ނިންމުމުގެ ކުރިން އެއް ވެރިކަމުން އަނެއް ވެރިކަމަށް ބަދަލުވާއިރު މަޝްރޫޢުތައް ނުހުއްޓޭ ނިޒާމެއް ގެނައުމާއި، ދާއިރާތައް ބެހިފައިވާގޮތް އިތުރަށް ހަރުދަނާކޮށް މަޖިލިސް މެމްބަރުންގެ ރޯލު އިތުރަށް ހަރުދަނާކުރުން މުހިންމުކަން މަބްރޫކް ފާހަގަކުރެއްވިއެވެ.