ޔާމީން ރަޝީދުގެ މަރުގެ މައްސަލައިގައި މީހަކު ހައްޔަރުކޮށްފި
1 މެއި 2017 | ހޯމަ 13:40ހައްޔަރު ކުރި މީހާގެ ނަމެއް ފުލުހުން ހާމައެއް ނުކުރޭ
ފުލުހުންގެ ބެލުމުގެ ދަށަށް ދިފްރާން ގެންދަނީ
ސޯޝަލް މީޑިއާ އެކްޓިވިސްޓް އަދި ބްލޮގާ ޔާމީން ރަޝީދު ގަތުލުކޮށްލި މައްސަަލައިގެ ތުހމަތުގައި މީހަކު ހައްޔަރުކޮށްފި އެވެ.
މި މައްސަލައިގައި މީހަކު ހައްޔަރުކުރިކަން ފުލުހުން ހާމައެއް ނުކުރެ އެވެ.
ރާއްޖެއެމްވީއަށް އެނގިފައިވާ ގޮތުގައި މި މައްސަލައިގައި ހައްޔަރުކޮށްފައިވަނީ ގދ. ގައްދޫ މުހައްމަދު ދިފްރާން ނަމަކަށް ކިޔާ މީހެކެވެ.
ދިފްރާނުގެ އާއިލާގެ މެމްބަރަކު ބުނި ގޮތުގައި ރޭ ފަތިސް ނަމާދަށް އޭނާ ދިޔަ ގޮތަށް ޚަބަރެއް ނުވެއެވެ. އެއަށް ފަހު ފުލުހުން ދިފްރާން ގޮވައިގެން، މާލޭގައި އޭނާ ދިރިއުޅޭ ގެއަށް ގޮސް ގެބަލައި ފާސްކޮށް ބައެއް ތަކެތި ގެންދިޔަ ކަމަށް ރާއްޖެއެމްވީއާ ވާހަކަ ދެއްކި އާއިލާގެ މެމްބަރު ބުންޏެވެ.
ދިފުރާން ދިރިއުޅެމުން ދަނީ މާފަންނު ބިސްބުރު ކައިރީގައި ހުންނަ ގެއެއްގަ އެވެ. ޔާމީން ރަޝީދު ދިރިއުޅެމުންދިޔަ، މ. ސްޓެޕިއުލާގެ އާއި ދިފްރާން ދިރިއުޅެމުންދާ ގެއާ ވަރަށް ކައިރި އެވެ.
ދިފްރާން ދިރިއުޅެމުންދިޔަ ގެ ބަލައި ފާސްކުރުމަށް ފުލުހުން ހޯދާފައިވާ ކޯޓް އަމުރުގައި ބުނެފައި ވަނީ، ޔާމީން ރަޝީދުގެ ފަހަތުން ފާރަލަމުން ގޮސް، އޭނާ ދިރިއުޅޭ މ. ސްޕެޓިއުލާ ގޭތެރެއަށް ޔާމީން ވަނުމުން، އޭނާ ހިފަހައްްޓައި އޭނާ އަށް ތޫނު ހަތިޔާރުން ހަމަލާ ދިނުމުގެ ސަބަބުން، ޔާމީން ރަޝީދު ނިޔާވެފައިވާ މައްސަލައާ ގުޅުން ހުރި ހެއްކާއި ގަރީނާ ހޯދުމަށް ކަމަށެވެ.
ޔާމީން ރަޝީދުގެ ގާތިލުން ދެނެގަނެވިފައިވާ ކަމަށް ފުލުހުން އޭޕްރީލް 25 ވަނަ ދުވަހު ބުނެފައިވާއިރު، އެ މީހުންގެ ނަންތަކެއް މިހާތަނަށް ހާމައެއް ނުކުރެ އެވެ. އަދި އެ މީހުން ރާއްޖޭގައި ހުރި ކަމެއް ވެސް ނުވަތަ ނެތް ކަމެއް ވެސް ހާމައެއް ނުކުރެ އެވެ.
އިފްރާން ދިރިއުޅެމުންދިޔަގެ ބަލައި ފާސްކުރުމާ ގުޅޭ ގޮތުން ވެސް ފުލުހުންގެ ތަރުޖަމާން އަހްމަދު ޝިފާން ވިދާޅުވީ ފުލުހުން ހިންގަމުންދާ ހާއްސަ އޮޕަރޭޝަނެއްގައި ގެއެއް ބަލައި ފާސްކޮށްފައިވާ ކަމަށެވެ.
