މުޅި ރާއްޖެއިން ކޮވިޑް-19ގެ ދިފާއުގައި ވެކްސިން ޖެހި މީހުންގެ ޖުމްލަ އަދަދު 25,000ށް ވުރެ މައްޗަށް އަރައިފިއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނީ ބުދަ ދުވަހުގެ އިރުއޮއްސި 6:00ށް ބުރާސްފަތި ދުވަހުގެ އިރުއޮއްސި 6:00ށް 5،166 މީހަކު ވެކްސިން ޖަހާފައިވާ ކަަމަށެވެ. އޭގެ ތެރެއިން މާލެ ސަރަހައްދުން 4،257 މީހުން، އަތޮޅުތެރެއިން 909 މީހަކު ވެކްސިން ޖަހާފައިވެއެވެ.

އެޗްޕީއޭއިން އާންމުކުރި ތަފާސްހިސާބުތައް ދައްކާގޮތުން މިހާތަނަށް 25،327 މީހަކު ވެކްސިން ޖަހާފައިވާއިރު، މާލެ ސަރަހައްދުން 20،960 މީހުން ވެކްސިން ޖަހާފައިވެއެވެ. އަދި އަތޮޅުތެރެއިން ޖުމްލަ 4،367 މީހުން ވެކްސިން ޖަހާފައިވެއެވެ.

ރާއްޖޭގައި ފެބްރުއަރީ މަހުގެ އެއްވަނަ ދުވަހު ވެކްސިނޭޝަން ޕްރޮގްރާމް ފަށާފައިވާއިރު، މިހާތަނަށް ސަރުކާރުގެ ގިނަ އިސްވެރިން ވަނީ ވެކްސިން ޖަހާފައެވެ. އަދި ސިއްހީ ޚިދުމަތްތެރިންނާއި، ސިފައިންނާއި ފުލުހުންގެ އިތުރުންވެސް އެކި މުއައްސަސާތަކުގައި މަސައްކަތް ކުރާ މީހުން ދަނީ ވެކްސިން ޖަހަމުންނެވެ.

ވެކްސިން ދިނުމުގެ ޕްރޮގްރާމް ހަލުވިކަމާއެކު ކުރިއަށް ދާއިރު މާލެ ސަރަހައްދުގައި ދިރިއުޅޭ އުމުރުން 45 އަހަރުން މަތީގެ މީހުންނަށް ކޮވިޑް-19 ވެކްސިން ޖެހުން ބުދަ ދުވަހު ވަނީ ފަށާފައެވެ.

އެގޮތުން މި ފަރާތްތަކަށް ވެކްސިން ޖެހުމުގެ ކަންތައްތައް ސޯޝަލް ސެންޓަރުން 9:00ން 17:00ށް އަދި ހުޅުމާލެ ވެކްސިނޭޝަން ސެންޓަރ (ހުޅުމާލޭ ފްލޫ ކްލިނިކް) 9:00ން 17:00ށް އަދި ވިލިމާލެ ޔޫތު ސެންޓަރުން 9:00ން 13:00ށް ކުރިއަށްދާނެ ކަމަށް ވަނީ ބުނެފައެވެ.