ކޮވިޑް-19ށް ފަރުވާ ހޯދަމުންދިޔަ އުމުރުން ދުވަސްވީ މީހެއް ނިޔާވެއްޖެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނީ ދަރުމަވަންތަ ހޮސްޕިޓަލްގެ ޑީއެޗް11 ގައި އެޑްމިޓްކޮށްގެން ފަރުވާ ހޯދަމުން ދިޔަ ފިރިހެނެއް ބުރާސްފަތި ދުވަހުގެ ރޭ 8:20 އެހާކަންހާއިރު ނިޔާވެފައިވާ ކަަމަށެވެ. ނިޔާވީ 84 އަހަރުގެ ފިރިހެނެއްކަމަށް އެޗްޕީއޭއިން ބުނެއެވެ.
ކޮވިޑް-19ގެ ކޭސްތައް އިތުރުވަމުންދާ ދަނޑިވަޅުގައި، މިބަލީގައި ޖުމްލަ 54 މީހަކު މިވަނީ ނިޔާވެފައެވެ. މީގެ ތެރޭގައި ވެސް އުމުރުން ދުވަސްވީ މީހުން ގިނައެވެ.
ރާއްޖޭއަށް ކޮވިޑްގެ ތިން ވަނަ ރާޅު އައިސްފައިވާއިރު، އައު ވޭރިއެންޓްވެސް ވަނީ ފެނިފައެވެ. އެހެންކަމުން ރައްކާތެރިވުމުގެ ގޮތުން އަޅާފައިވާ ފިޔަވަޅުތަކަށް ޚާއްސަ ސަމާލުކަމެއް ދިނުމަށް އިލްތިމާސްކޮށްފައިވެއެވެ.
