''އަޅުގަނޑެއް ހަމަ ގައިމުވެސް ޕީ.ޕީ.އެމް.އަށް ނުލިބޭ ފުރުޞަތެއް ބޭނުމެއް ނުކުރާނަން''
31 ޖެނުއަރީ 2021 | އާދީއްތަ 09:52އެއްވެސް ފުލުހަކު ރައްޔިތެއްގެ މައްޗަށް ބާރު ފޯރުވުމަކީ ތާއީދުކުރާ ކަމެއް ނޫން
އާދިއްތަ ދުވަހު އިންތިޚާބުގެ ކެންޕޭންފެށުމުގެ ގޮތުން އެމް.ޑީ.ޕީ. އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް މުހައްމަދު ނަޝީދު ވާހަކަފުޅު ދައްކަވަނީ
ކުރިއަށް އޮތް ލޯކަލް ކައުންސިލް އިންތިޚާބުގައި ވާދަކުރާ ހުރިހާ ފަރާތްތަކަށް ވެސް ހަމަހަމަ ފުރުޞަތު ލިބޭނެ ކަމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
އާދިއްތަ ދުވަހު އިންތިޚާބުގެ ކެމްޕޭންފެށުމުގެ ގޮތުން އެމް.ޑީ.ޕީ. އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް ނަޝީދު ވިދާޅުވީ ހަމަހަމަ ފުރުޞަތު ހުރިހާ ފަރާތްތަކަށް ލިބޭނެ ކަމަށާއި، ޕީ.ޕީ.އެމް.އަށް ނުލިބޭ ފުރުޞަތެއްގެ މަންފާއެއް އެމަނިކުފާނު ނުނަންގަވާނެ ކަަމަށެވެ.
އިދިކޮޅުން ކުރަމުންދާ މުޒާހަރާތަކަށް އަލިއަޅުއްވާލައްވާ ރައީސް ނަޝީދު ވިދާޅުވީ ފުލުހުންގެ ޤާނޫނަށް ގެނެވުނު އިޞްލާޙުތަކާއެކު ފުލުހުންގެ ރިފޯމް ކުރިއަށްދާ ކަމަށާއި، ބާރު ބޭނުންކުރާނެ ގޮތް ކަނޑައެޅިގެންދާ ކަމަށެވެ. އަދި އެއްވެސް ފުލުހަކު ރައްޔިތެއްގެ މައްޗަށް ބާރު ފޯރުވުމަކީ އެމަނިކުފާނު ތާއީދު ކުރާނެ ކަމެއް ނޫން ކަމަށް ރައީސް ނަޝީދު ވިދާޅުވިއެވެ.
ފުލުހުންނަކީ ވަރަށް ކެތްތެރި ބައެއްކަން ފާހަގަކުރައްވައި ރައީސް ނަޝީދު ވިދާޅުވީ ގިނަ ފަހަރަށް ރުޅި އިސްކުރަނީ އާންމު ރައްޔިތުން ކަމަށެވެ. ސުލްޙަވެރި އެއްވުންތަކުގައި ހިފައި ހައްޔަރުކޮށް އަނިޔާވެރިވުމަކީ ބަލައިގަނެވޭނެ ކަމެއް ނޫން ކަމަށް ވެސް ރައީސް ނަޝީދު ވިދާޅުވިއެވެ.
މީގެ އިތުރުން ރައީސް ނަޝީދު ވިދާޅުވީ އެމް.ޑީ.ޕީ.އަކީ މިނާ ނާޅިން މިނާ ބައެއް ނޫން ކަމަށާއި، މުޅި ހަޔާތް އަނިޔާގެ ތެރެއަށް ވައްޓާލި ނަމަވެސް އެގޮތަށް އަމަލު ނުކުރާނެ ކަމަށެވެ. އަދި އެމް.ޑީ.ޕީ.ގެ މެމްބަރުންގެ ގައިގައި ތަޅައި، އަނދަގޮނޑި ޖަހައި، ބިޑިއަޅުވައި، އަދި ހައްޔަރުކުރި ނަމަވެސް އެމަނިކުފާނުގެ އިތުރުން އެމް.ޑީ.ޕީ.ގެ މެމްބަރު ވެސް މިނާ ނާޅިން ނުމިނާނެ ކަމަށެވެ. ކުރީގެ ރައީސް އަބްދުﷲ ޔާމީންގެ އިތުރުން ޕީ.ޕީ.އެމް.ގެ ފަރާތުން މުޒާހަރާ ކުރަން ނުކުންނަ ފަރާތްތަކަށް ވެސް އެދެނީ ހެޔޮގޮތް ކަމަށް ރައީސް ނަޝީދު ވިދާޅުވިއެވެ.
