ކޮވިޝީލްޑް ވެކްސިން: ނޭޕާލްއަށް އެއްމިލިއަން ޑޯޒް އަދި ބަންގްލަދޭޝްއަށް ދެ މިލިއަން ޑޯޒް ފޮނުވައިފި
21 ޖެނުއަރީ 2021 | ބުރާސްފަތި 09:50ބުދަ ދުވަހު ރާއްޖެއަށް ވަނީ މިވެކްސިން ގެނެސްފައި
ވެކްސިން ހިފައިގެން ބަންގްލަދޭޝްއަށް ފުރި ފްލައިޓް
ސެރަމް އިންސްޓިއުޓުން އުފައްދާފައިވާ ކޮވިޝީލްޑް ވެކްސިން ބަންގްލަދޭޝްއާއި ނޭޕާލްއަށް ފޮނުވައިފިއެވެ.
މިނިސްޓްރީ އޮފް އެކްޓަރނަލް އެފެއަރޒްގެ ސްޕޯކްޕަރސަން އަނޫރަގް ސްރިވަސްޓަވަރ ވިދާޅުވީ ކޮވިޑް-19ގެ ވެކްސިން ބަންގްލަދޭޝްގެ އިތުރުން ނޭޕާލްއަށް ބުރާސްފަތި ދުވަހު ފޮނުވާފައިވާ ކަމަށެވެ.
އެގޮތުން ދެމިލިއަން ޑޯޒް ވެކްސިން ބަންގްލަދޭޝްގެ ޑާކާއަށް ފޮނުވާފައިވާއިރު، ނޭޕާލްއަށް އެއް މިލިއަން ޑޯޒް ވެކްސިން ވަނީ ފޮނުވާފައެވެ.
ކޮވިޝީލްޑް ވެކްސިން ބުދަ ދުވަހު ރާއްޖެއަށް ވަނީ މިވެކްސިން ގެނެސްފައެވެ. އިންޑިއާއިން އުފެއްދި ވެކްސިން އެ ގައުމުގެ އެތައްހާސް ބަޔަކަށް މިހާތަނަށް ދީފައިވާއިރު، ބޭރު ގައުމަކަށް ވެކްސިން ފުރަތަމަ ފޯރުކޮށްދިން ދެގައުމަކީ ރާއްޖެއަށާއި ބޫޓާންއެވެ. މީގެ އިތުރުން މިޔަންމާ ޝީސެލްސް ފަދަ ގައުމުތަކަށް ވެސް އިންޑިއާގެ ވެކްސިން ފޯރުކޮށްދިނުމަށް ހަމަޖެހިފައިވާކަން ވަނީ ހާމަކޮށްފައެވެ.
މި މިވެކްސިންއަކީ އެސްޓްރަޒެނެކާގެ އޮކްފޯރޑް ޔުނިވަރސިޓީ ކޮލަރބްރޭޓް ވެފައިވާ ވެކްސިންއެކެވެ. ސެރަމް އިންސްޓިއުޓުން މިވެކްސިންގެ ޑޯޒްތައް އުފައްދާތީ އިންޑިއާއިން ވަނީ މިވެކްސިންއަށް ''ކޮވިޝީލްޑް'' ނަމުން ނަންދީފައެވެ. އެސްޓްރަޒެނެކާގެ ވެކްސިންތައް އެމަރޖެންސީކޮށް ބޭނުންކުރުމުގެ ހުއްދަ ގިނަ ގައުމުތަކުގައި ވަނީ ދީފައެވެ. އެގޮތުން އިނގިރޭސިވިލާތް، ޕާކިސްތާން، ބްރެޒިލް އަދި މެކްސިކޯގެ ގައުމުތައް ހިމެނެއެވެ.
ޑަބްލިޔުއެޗްއޯގެ ފުރިހަމަ އިތުބާރާއެކު ކާމިޔާބު ގިނަ ވެކްސިންތަކެއް އުފައްދާ އިންޑިއާގެ ސެރަމް އިންސްޓިއުޓުން ވެސް ވަނީ ކޮވިޝީލްޑް ވެކްސިން ކާމިޔާބު ވެކްސިންއަކަށް ވާނެކަމުގެ ޔަގީންކަން ދީފައެވެ. އަދި އުސޫލު އޮންނަ ގޮތުން ކޮންމެ ވެކްސިންއަކަށް ވެސް ވަކިން ހުއްދަ ދޭން ޖެހޭއިރު، ފެބްރުއަރީ މަހުގެ މެދެއްހާ ހިސާބުގައި ޑަބްލިޔުއެޗްއޯގެ ހުއްދަ ލިބޭނެ ކަމަށް ކަމާބެހޭ ފަރާތްތަކުން ދަނީ ވިދާޅުވަމުންނެވެ.
