ކޭސްތައް ފެނިފައިވާ ރިސޯޓުތަކުން ބަލި ކޮންޓްރޯލްކުރުމަށް ވަކިވަކިން ދަނީ ފިޔަވަޅުތައް އަޅަމުން!
21 ޖެނުއަރީ 2021 | ބުރާސްފަތި 07:29އޮޅުވެލި ރިސޯޓުން ޖުމްލަ 78 ކޭސް މިހާތަނަށް ފެނިފައިވޭ
އޮބްލޫ ސިލެކްޓް ސަންގެލި ރިސޯޓު، މިރިސޯޓުން ވެސް ގިނަ އަދަދެއްގެ ކޭސްތައް ފެނިފައިވޭ
ކޮވިޑް-19ގެ ކޭސްތައް ފެނިފައިވާ ރިސޯޓުތަކުގައި ބަލި ކޮންޓްރޯލްކުރުމަށް އެރިސޯޓުތަކުގައި އަޅަންޖެހޭ ފިޔަވަޅުތައް އަޅަމުންދާ ކަމަށް ހެލްތް އެމަރޖެންސީ އޮޕަރޭޝަން ސެންޓަރ (އެޗް.އީ.އޯ.ސީ)ން ބުނެފިއެވެ.
ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އެޗް.އީ.އޯ.ސީ.ގެ ތަރުޖަމާނު ޑރ. ނަޒްލާ ރަފީގު ވިދާޅުވީ ކޮވިޑްގެ ކޭސްތައް ފެންނަމުންދާ ރިސޯޓުތައް ވަކިވަކިން މޮނިޓަރ ކުރަމުންދާ ކަމަށާއި، އައުޓް ބްރޭކް ކުރިއަށްދާ ގޮތަށް ބަލައި، ބަލި ކޮންޓްރޯލް ކުރުމަށް ވަކިވަކި ރިސޯޓުތަކަށް އެކި ފިޔަވަޅުތައް އަޅަމުންދާ ކަމަށެވެ. އަދި ވިދާޅުވީ މި މަސައްކަތްތައް ކުރަމުންދަނީ ޓޫރިޒަމް މިނިސްޓްރީއާ ގުޅިގެން ކަމަށެވެ.
ރިސޯޓުތަކަށް އަލިއަޅުއްވާލައްވާ ޑރ.ނަޒްލާ ވިދާޅުވީ މިހާތަނަށް އޮޅުވެލި ރިސޯޓުން ޖުމްލަ 78 ކޭސް މިހާތަނަށް ފެނިފައިވާ ކަމަށާއި، ބުދަ ދުވަހު އެކަނި ވެސް އެރިސޯޓުން 14 މީހަކު ޕޮޒިޓިވްވެފައިވާ ކަމަށެވެ. އަދި އޮބްލޫ ސެލެކްޓް އެޓް ސަންގެލި ރިސޯޓުން 70 މީހަކު ޕޮޒިޓިވްވެފައިވާ ކަމަށް ޑރ.ނަޒްލާ ވިދާޅުވިއެވެ. އަދި ވިދާޅުވީ ޕޮޒިޓިވްވި މީހުންގެ އިތުރުން 65 ކޮންޓެކްޓެއް އެރިސޯޓުގައި އެބަތިބި ކަމަށެވެ.
ކޭސްތައް ފެނިފައިވާ ރިސޯޓުތަކުގައި ކޮންޓެކްޓް ޓްރޭސިންގެ މަސައްކަތްތައް ކުރިއަށްދާކަން ފާހަގަކުރައްވައި ޑރ.ނަޒްލާ ވިދާޅުވީ އަނަންތަރާ ކިހަވަށް މޯލްޑިވްސް ވިލަރސް ރިސޯޓުން 6 މީހަކު ޕޮޒިޓިވްވެފައިވާ ކަމަށެވެ. ޑރ.ނަޒްލާ ވިދާޅުވީ އިރުވަލި ރިސޯޓުން ވެސް ފަސް މީހަކު ޕޮޒިޓިވްވެފައިވާ ކަމަށެވެ.
މީގެ އިތުރުން ގއ. ފަޅުމާފުށީގައި ހިންގާ ރެސިޑެންސް މޯލްޑިވްސްއިން ޖެނުއަރީ 17 ވަނަ ދުވަހު ބަލީގެ އަލާމަތްތައް ހުރި 7 މީހަކު ޓެސްޓުކޮށްފައި ޕޮޒިޓިވް ވުމާ ގުޅިގެން އެތަނުން ވެސް އިތުރު ސާމްޕަލްތައް ނަގައި ޓެސްޓުކުރުމުގެ މަސައްކަތްތައް ކުރިއަށްދާ ކަމަށެވެ. އެގޮތުން މިހާތަނަށް 14 މީހަކު ޕޮޒިޓިވްވެފައިވާ ކަމަށް ޑރ.ނަޒްލާ ވިދާޅުވިއެވެ.
ޑރ.ނަޒްލާ ވިދާޅުވީއަދާރަން ރަންނާޅިން ޖެނުއަރީ17 ވަނަ ދުވަހު އަލާމަތްތައް ހުރި ދެ މުއައްޒަފުންގެ ސާމްޕަލް ނެގުނު ކަމަށާއި، އޭގެތެރއިން މިހާތަނަށް 13 މީހަކު ޕޮޒިޓިވްވެފައިވާ ކަމަށެވެ.
ރާއްޖޭގެ ކޮވިޑްގެ ހާލަތަށް ބަލާއިރު، މިހާރު ރިސޯޓުތަކުން ފެންނަ ކޭސްތައް ދަނީ އިތުރުވަމުންނެއެވެ. އަދި ފާއިތުވި 24 ގަޑިއިރުގެ ތެރޭގައި ރިސޯޓުތަކުން 35 މީހަކު ބައްޔަށް ޕޮޒިޓިވްވެފައިވާއިރު، ގިނައިން ޕޮޒިޓިވްވަނީ އެރިސޯޓުތަކުގައި މަސައްކަތް ކުރާ މުއައްޒަފުންނެވެ. ރިސޯޓުތަކުން ގިނަ ކޭސްތައް ފެންނަމުންދާތީ އެޗް.އީ.އޯ.ސީ.ން ކަންބޮޑުވުންފާޅުކޮށްފައިވެއެވެ.
އެޗް.އީ.އޯ.ސީ.ން ބުނެފައިވަނީ ބަލީގެ އަލާމަތްތައް ހުންނަ މީހުން ތިބި ނަމަވެސް ބައެއް ރިސޯޓުތަކުގައި ޓެސްޓުނުކުރާ ކަމަށެވެ. މާލެއިން ބައެއް ރިސޯޓުތަކަށް މަސައްކަތް ކުރުމަށްދާ މުވައްޒަފުން ކަރަންޓީން ވާން ޖެހޭއިރު، ކަރަންޓީންގެ މުއްދަތު ހަމަނުކޮށް ވަޒީފާއަށް ނުކުންނަމުންދާކަން ފާހަގަކުރެވިފައިވާ ކަމަށެވެ. އަދި ބައެއް ރިސޯޓުތަކުގައި މުވައްޒަފުން އުޅޭ ސަރަހައްދުގައި މާސްކް އެޅުމާއި، ސޯޝަލް ޑިސްޓެންސްއަށް ނުބަލައި ވަރަށް ބޮޑަށް ފަރުވާކުޑަކުރަމުންދާ ކަމަށް އެޗް.އީ.އޯ.ސީ.ން ބުނެއެވެ.
ކުޑަކުޑަ ކަމަކަށް ފަރުވާ ކުޑަކުރެވުނު ކަމުގައިވީ ނަމަވެސް ބަލި ވަރަށް ބޮޑަށް ފެތުރިގެން ހިނގައިދާނެ ކަމަށާއި، ގައިޑްލައިންތަކާ އެއްގޮތަށް އަމަލުކުރުމަށް އެޗް.އީ.އޯ.ސީ.ން އިލްތިމާސްކޮށްފައިވެއެވެ.
ކޮވިޑް-19 އިން ރައްކާތެރިވުމަށް އެޅި ފިޔަވަޅުތަކުގެ ތެރެއިން، ރާއްޖޭގެ ބޯޑަރު، ގާތްގަނޑަކަށް ހަތަރު މަސް ދުވަހަށް ބަންދު ކުރުމަށް ފަހު އަލުން ހުޅުވައިލީ 15 ޖުލައި 2020 ގައެވެ.
