ކަރަންޓީނު ނިމުމުން ނެގެޓިވް ނަތީޖާ ލިބުމުން ނޫނީ އެއްވެސް މުވައްޒަފަކު ނެރެގެން ނުވާނެ- ރައްޒާން
ވިދާޅުވީ ކޭސްއެއް ފެންނަ ހިސާބުން ކޮންޓެކްޓް ޓްރޭސިންގގެ މަސައްކަތް ވަގުތުން ފަށާ
ޓޫރިޒަމް މިނިސްޓްރީގެ ސީނިއަރ އެގްޒެކިއުޓިވް ޑިރެކްޓަރ އަލީ ރައްޒާން
ރިސޯޓުތަކަށް އެނބުރި މަސައްކަތަށް ދާ މުވައްޒަފުން 10 ދުވަހުގެ މެންޑޭޓަރީ ކަރަންޓީނު އެއްވެސް އިތުރު ފަރާތަކާ ކޮންޓެކްޓު ނުވެ ފުރިހަމަކޮށް، ޓެސްޓުކޮށް ނެގެޓިވް ނަތީޖާ އަކާއެކު ނޫނީ މަސައްކަތުގެ މާހައުލަށް، ނެރެގެން ނުވާނެ ކަމަށް ޓޫރިޒަމް މިނިސްޓްރީގެ ސީނިއަރ އެގްޒެކިއުޓިވް ޑިރެކްޓަރ އަލީ ރައްޒާން ވިދާޅުވެއްޖެއެވެ.
އާދިއްތަ ދުވަހު ބޭއްވި ނޫސްވެރިންގެ ބައްދަލު ވުމެއްގައި ރައްޒާން ވިދާޅުވީ ރާއްޖެ އަންނަ ފަތުވެރިންގެ ތެރެއިން ކޮވިޑަށް ޕޮޒިޓިވްވާ މިންވަރު ވަރަށް ދަށް އަދަދެއްގައި ހިފެހެއްޓިފައިވާ ކަމަށެވެ.
ނަމަވެސް އައު އަހަރު ފެށިގެން މިހާރު މި އައި ދުވަސްކޮޅުގެ ތެރޭގައި، ޓޫރިސްޓު ޕްރޮޕަޓީތަކުން ފެންނަ ކޭސްތަކުގެ އަދަދު ގިނަވެފައި ވާކަން ރައްޒާން ފާހަގަ ކުރެއްވިއެވެ.
ރައްޒާން ވިދާޅުވީ މިހާރު މި ފެންނަ ގިނަ ކޭސްތަކަކީ، ކުރިން ފަތުރުވެރިންގެ ތެރެއިން ފެނުނު ކޭސްތަކާ ހިލާފަށް މުވައްޒަފުންގެ ތެރެއިން ފެންނަ ކޭސްތަކެއް ކަމަށާއި ގިނަ ރިސޯޓުތަކަކުން އެއްފަހަރާ ނުފެނުނު ކަމުގައި ވީނަމަވެސް އެއް ރިސޯޓުން ޕޮޒިޓިވް ކޭސްތައް ފެންނަ އަދަދު އިތުރުވެގެން ދާކަމަށެވެ.
އެގޮތުން މުވައްޒަފަކު ޕޮޒިޓިވް ވެގެން ބަލާއިރު ކޮންޓެކްޓްސްގެ އަދަދު ވަރަށް ބޮޑު ކަމަށް ރައްޒާން ވިދާޅުވިއެވެ. ރައްޒާން އިތުރަށް ވިދާޅުވީ ކޭސްއެއް ފެންނަ ހިސާބުން އެޗްޕީއޭގެ ޓީމުތަކާއި އަދި ރިސޯޓުގެ މެޑިކަލް ޓިމުތަކާ ގުޅިގެން ކޮންޓެކްޓު ޓްރޭސިންގެ މަސައްކަތް ވަގުތުން ފަށާކަމަށެވެ. އަދި ކޮންޓެކްޓުންނާއި ޕޮޒިޓިވްވާ މީހުން ކަރަންޓީނުކޮށް، ކޮންޓެކްޓުވާ މީހުން ވެސް ވަގުތުން ޓެސްޓު ކުރާ ކަމަށް ރައްޒާން ވިދާޅުވިއެވެ.
އިތުރަށް ވާހަކަ ދައްވަކަމުން ރައްޒާން ވިދާޅުވީ ރަށެއްގެ ކޭސްތަކުގެ ނިސްބަތް ބޮޑުވެއްޖެނަމަ އަދި އެ ރިސޯޓަކީ އެންމެ ރައްކާތެރިކޮށް ޚިދުމަތް ދެވިދާނެ ތަނެއް ކަމަށް ނުފެންނަ ހާލަތައް އެ ރަށެއް ގޮސްފިނަމަ އެ ރަށަށް އަރާ ފޭބުން ހުއްޓުވާ ކަމަށެވެ.
އަދި އެ ރަށަކަށް އަލަށް އައުމަށް ބުކިންގ ހައްދާފައިވާ ފަތުރުވެރިން އެހެން ތަންތަނަށް ޑައިވަރޓްކުރުމާއި އެފަދަ އެހެން އުނދަގޫ އެތައް މަސައްކަތެއް ކުރަން ޖެހޭ ކަމަށް ރައްޒާން ވިދާޅުވިއެވެ.
ރައްޒާން ވިދާޅުވީ މީގެ ކުރިން މުވައްޒަފުންގެ ފަރާތުން މިހާރު ފެންނަމުންދާ އަދަދަށް ޕޮޒިޓިވް ކޭސްތައް ނުފެނުނީ އޭރު ރަނގަޅަށް ކަންކަން ކޮށް އިރުޝާދުތަކަށް އަމަލު ކުރަމުން ދިއުމުން ކަމަށެވެ.
ގައިޑްލައިންތަކަށް ރަނގަޅަށް އަމަލު ކުރުމަށް އިލްތިމާސް ކުރަމުން ރައްޒާން ވިދާޅުވީ ކޮންމެ ދުވަހަކުވެސް އަލާމާތްތައް ހުރިތޯ ބެލުމަށް ޓެމްޕަރޭޗަރ ބެލުމާއި، ރިސޯތުގެ މެޑިކަލް ފެސިލިޓީތަކުން ރެންޑަމްކޮށް މުވައްޒަފުންގެެ އަލާމާތެއް ހުރިތޯ ބެލުމާ، ކިތަންމެ ކުޑަ ނަމަވެސް އަލާމާތެއް ފެނިއްޖެެ ނަމަ ވަގުތު ޓެސްޓު ކުރުމަށެވެ.
