ގއ. ދެއްވަދޫ ކްލަސްޓަރއާ ގުޅިގެން ޕޮޒިޓިވްވި 55 މީހުންގެ ތެރެއިން ގިނައީ އުމުރުން ދުވަސްވީ މީހުން ކަމަށް އެރަށުގެ ކައުންސިލުން ބުނެފިއެވެ.

ރާއްޖެއެމްވީއަށް މަޢުލޫމާތު ދެއްވަމުން އެރަށުގެ ކައުންސިލްގެ ރައީސް އިބްރާހިމް ތައުފީގު ވިދާޅުވީ ކޮވިޑް-19ގެ ކޭސްތައް ފެނުމާ ގުޅިގެން އަޅަމުންދާ ރައްކާތެރިކަމުގެ ފިޔަވަޅުތަކަށް ހުރިހާ ރައްޔިތުން ވެސް ވަރަށް ރަނގަޅަށް އަމަލު ކުރަމުންދާ ކަމަށާއި، ކުރަމުންދާ މަސައްކަތްތަކަށް އެއްބާރުލުން ލިބޭ ކަމަށެވެ.

ތައުފީގު ވިދާޅުވީ ރަށުން 55 މީހަކު މިހާތަނަށް ޕޮޒިޓިވްވެފައިވާއިރު، 400 އާ ގާތްކުރާ އަދަދަކަށް ސާމްޕަލް ނަގާފައިވާ ކަމަށެވެ. ހޮނިހިރު ދުވަހު ނަތީޖާ ލިބުނު ހުރިހާ ސާމްޕަލެއް ނެގެޓިވް ކަމަށާއި، ނަތީޖާ ނުލިބި ވެސް ގިނަ ސާމްޕަލްތަކެއް އެބަހުރި ކަމަށް އޭނާ ވިދާޅުވިއެވެ. އަދި ވިދާޅުވީ އިތުރު ސާމްޕަލްތައް ނެގުމުގެ މަސައްކަތްތައް ދެން ކުރިއަށް ގެންދާނީ މިހާރު ނަތީޖާ ނުލިބި ހުރި ސާމްޕަލްތަކުގެ ނަތީޖާ ލިބުމުން ކަމަށެވެ.

މީގެ އިތުރުން ތައުފީގު ވިދާޅުވީ ބައްޔަށް ޕޮޒިޓިވްވީ މީހުންގެ ތެރޭގައި ޒުވާނުންނާއި، ކުޑަ ކުދިންނާއި، އުމުރުން ދުވަސްވީ މީހުން ހިމެނޭ ކަމަށެވެ. މީގެ ތެރޭގައި ގިނައީ އުމުރުން ދުވަސްވީ މީހުންކަން ވެސް އޭނާ ފާހަގަކުރެއްވިއެވެ.

ރަށުގެ އާންމު ހާލަތު ރަނގަޅުކަން ފާހަގަކުރައްވައި ތައުފީގު ވިދާޅުވީ ފެނާއި، ކާބޯތަކެތި، ބޭސް އަދިވެސް އެހެނިހެން ބޭނުންތަކަށް ބޭނުންވާ އާލަތްތައް އެބަހުރި ކަމަށެވެ. ވަރަށް ގިނަ ފަރާތްތަކަށް އަތޮޅުތެރޭގެ އެހެން ރަށްރަށުގެ ރައްޔިތުންގެ ފަރާތުން ވަރަށް ބޮޑަށް އެހީތެރިކަން ލިބެމުންދާ ކަމަށް ތައުފީގު ވިދާޅުވިއެވެ. އަދި ވިދާޅުވީ އާންމު ރައްޔިތުން ހޭލުންތެރި ކުރުވުމުގެ މަސައްކަތްތައް ކުރަމުންދާ ކަމަށެވެ.

ގާތްގަނޑަކަށް 1380 މީހުންގެ އާބާދީއެއް އޮންނަ ދެއްވަދޫއިން ކޮވިޑްގެ ފުރަތަމަ ކޭސް ފެނިފައިވަނީ ޑިސެންބަރު މަހުގެ 24 ވަނަ ދުވަހުއެވެ.