މައުރީސިއޯ ޕޮޗެޓީނޯގެ އިރުޝާދުގެ ދަށުން ފްރެންޗް ލީގުގެ އެންމެ ފަހުގެ ޗެމްޕިއަން ޓީމު ކަމަށްވާ ޕީއެސްޖީން ފުރަތަމަ މޮޅު ހޯދައިފިއެވެ.
ޕީއެސްޖީ މޮޅުވީ ލީގުގައި ހޮނިހިރު ދުވަހުގެރޭ ބްރެސްޓޮއިސް އަތުން ފަސޭހަކަމާއެކު 3-0 ގެ ނަތީޖާއަކުންނެވެ. މި މަހުގެ ތިންވަނަ ދުވަހު ޕީއެސްޖީގެ ކޯޗުގެ މަގާމާ ހަވާލުވި ޕޮޗެޓީނޯގެ އިރުޝާދުގެ ދަށުން ޕީއެސްޖީ ފުރަތަމަ ފަހަރަށް މޮޅުވިއިރު، ޕޮޗެޓީނޯގެ ފުރަތަމަ މެޗުން ލީގުގައި ބުދަ ދުވަހުގެރޭ ޕީއެސްޖީ ވަނީ ސެއިންޓް އެޓިއެންއާ 1-1 ން އެއްވަރުވެފައެވެ.
ހޮނިހިރު ދުވަހުގެރޭ ޕީއެސްޖީގެ ދަނޑުގައި ކުޅުނު މެޗުގައި އެ ޓީމުން މޮޅު ކުޅުމެއް ދެއްކިއިރު، މެޗުގެ 16 ވަނަ މިނެޓުގައި ޕީއެސްޖީން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ މި ސީޒަނުގައި ތަފާތު މޮޅު ކުޅުމެއް ދައްކަމުން އަންނަ ފޯވާޑް މޮއިސް ކީންއެވެ. އޭގެ ފަހުން މި މެޗުގައި ޕީއެސްޖީން ލީޑު ފުޅާކޮށްފައިވަނީ 81 ވަނަ މިނެޓުގައި މައުރޯ އިކާޑީ ކާމިޔާބުކުރި ލަނޑުންނެވެ. އަދި އޭގެ ދެ މިނެޓު ފަހުން ޕަބްލޯ ސަރާބިއާ ވަނީ ޕީއެސްޖީގެ ތިންވަނަ ލަނޑު ޖަހާފައެވެ.
މި މޮޅާއެކު ޕީއެސްޖީ އޮތީ ތާވަލުގެ ދެވަނައިގައި ކުޅުނު 19 މެޗުން ލިބުނު 39 ޕޮއިންޓާއެކުއެވެ. ތިންވަނައިގައި އޮތް ލިލްއަށްވެސް 19 މެޗުން 39 ޕޮއިންޓް ލިބިފައިވާއިރު، ޕީއެސްޖީއަށް ކުރި ލިބެނީ ފައިދާ ލަނޑުންނެވެ. އަދި ތާވަލުގެ އެއްވަނައިގައި 19 މެޗުން 40 ޕޮއިންޓާއެކު އޮތީ ލިޔޯނެވެ.
