ދެވަނަ ޓަރމުގައި ކިޔެވުމުގެ އައު ފުރުސަތުތަކަށް އެދި ދަރިވަރުންނަށް ރައީސް ތަހުނިޔާ ވިދާޅުވެއްޖެ
ދަރިވަރުން، މުދައްރިސުން އަދި ބެލެނިވެރިންނަށްވެސް ކާމިޔާބަށް އެދިލައްވާކަމަށް ވިދާޅުވި
ދެވަނަ ޓާމުގެ ކިޔެވުން ފެށުމަށްޓަކައި އިސްކަންދަރު ސްކޫލުގައި ބޭއްވި ހާއްސަ އެސެމްބުލީ
ދެވަނަ ޓަރމުގައި ކިޔެވުމުގެ އައު ފުރުސަތުތައް ލިބުމަށް އެދޭކަމަށް ވިދާޅުވެ، މި ޓަރމުގެ ކިޔެވުން ފެށުމާއި ގުޅިގެން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ދަރިވަރުންނަށް ތަހުނިޔާ ވިދާޅުވެއްޖެއެވެ.
ދަރިވަރުންނަށް ތަހުނިޔާ ވިދާޅުވެ އާދިއްތަ ދުވަހު ކުރެއްވި ޓްވީޓެއްގައި ރައީސް ވިދާޅުވީ ދަރިވަރުން، މުދައްރިސުން އަދި ބެލެނިވެރިންނަށްވެސް ކާމިޔާބަށް އެދިލައްވާކަމަށެވެ.
އަދި ކޮވިޑް-19ގެ ސަބަބުން ގިނަ ދުވަސްތަކެއް ސްކޫލުތަށް ބަންދު ކުރުމަށްފަހު އަލުން ހުޅުވާލުމާއެކު ސްކޫލުގެ މާހައުލުގައި ދަރިވަރުން އެއް ކުއްޖަކު އަނެއްކުއްޖަކާއި ބައްދަލުވެ ރަހުމަތްތެރިކަން ގާއިމް ކޮށް އެކުވެރިންނާއި ބައްދަލުވެގެން ދާނެކަން ރައީސް ފާހަގަ ކުރެއްވިއެވެ.
ނިއު ނޯމަލްއާއި އެކު ސްކޫލުތަކުގެ ކިޔެވުން ބޭބީނާސަރީ އިން ފެށިގެން ގްރޭޑް 12 ގެ ހުރިހާ ދަރިވަރުންނަށް ފެށިފައިވާއިރު މިފަހަރު ޓައިމްޓޭބަލް އިންނާނީ ހަފްތާއަކު އެއްގޮތަކަށް ނޫން ކަމަށް ސްކޫލްތަކުން ވަނީ މީގެ ކުރިން ބުނެފައެވެ.
އަދި ސްކޫލުތަކުގެ ކިޔެވުން އަލުން ފެށުމާއެކު އެޑިއުކޭޝަން މިނިސްޓްރީން ބުނީ ސްކޫލުތަކުގައި ދަރިވަރުން އަތް ދޮވެވޭނެ އިންތިޒާމު ހަމަޖައްސާފައިވާއިރު، މާސްކުއެޅުމާއި، ހުން ޗެކްކުރުމުގެ އިތުރުން އިޖުތިމާއީ ގައިދުރުކަމަށް މިއަހަރުވެސް ހާއްސަ ސަމާލުކަމެއް ދޭނެ ކަމަށެވެ.
ކޮވިޑް-19ގެ ސަބަބުން ސްކޫލްތައް ބަންދުކުރަން ޖެހުމާ ގުޅިގެން އާދިއްތަ ދުވަހު ފަށާފައިވަނީ 2020 ވަނަ އަހަރު ފެށި ދިރާސީ އަހަރުގެ ދެވަނަ ޓާމުގެ ކިޔެވުމެވެ. އެޑިއުކޭޝަން މިނިސްޓްރީން ބުނީ އާދިއްތަ ދުވަހުން ފެށިގެން ބޭބީ ނާސަރީއާއި ގްރޭޑް 12 އާ ދެމެދުގެ ހުރިހާ ގްރޭޑަކަށް ވެސް ރަސްމީކޮށް ކިޔެވުން ފަށާނެ ކަމަށެވެ.
ސްކޫލްތައް އަލުން ހުޅުވާފައިވާއިރު ސްކޫލްތަކުގައި އަމަލުކުރަން ޖެހެނީ ނިއު ނޯމަލްގައި އަމަލުކުރަން އަންގާފައިވާ ހާއްސަ އުސޫލެއްގެ ދަށުންނެވެ. އެގޮތުން ޕްރީ ސްކޫލް ދަރިވަރުން ސްކޫލަށް ނެރޭ އިރު އެ ދަރިވަރުންނަށް ކިޔަވައިދޭން ޖެހެނީ ފަސް ދުވަހު ދުވާލަކު ދެ ގަޑިއިރަށް ވުރެ މަދު ނުވާނެ ގޮތަށެވެ. އޭގެ ތެރެއިން އެއް ގަޑި އިރު ވަންދެން ކުދިންނަށް ގައި ދުރުކަމާއި އަތް ދޮޮވުން ފަދަ ކޮވިޑް-19އާ ގުޅިގެން އަޅާފައިވާ ހާއްސަ ފިޔަވަޅުތައް ކިޔައިދޭން ޖެހެއެވެ.
ޕްރައިމަރީ ސެކަންޑަރީ އަދި ހަޔަރ ސެކަންޑަރީގެ ދަރިވަރުންނަށް ކިޔަވައިދޭން ޖެހެނީ 5 ގަޑިއިރަށެވެ. ސްކޫލުގައި ކުދިން ތިބޭ ނިސްބަތަށް ބަލާފައި ކިޔެވުމުގެ ދަންފަޅި އޮންނަނީ ތިން ބަޔަކަށް ބަހާލައިގެންނެވެ. އެއީ ހަފްތާ އަކު ފަސް ދުވަހު ދެ ސެޝަން އަކަށް ބަހާލައިގެން ކިޔަވައި ދިނުމާއި ދެ ދުވަހުން އެއް ދުވަހު ކުދިން ސްކޫލަށް ގެންދިއުމެވެ. އެގޮތަށް އަމަލުކުރާ ނަމަ ކުދިންނަށް އޮންލައިން ކްލާސްތައް ވެސް ނަގައިދޭން ޖެހެއެވެ.
މިދިޔަ މާޗް މަހު ރަސްމީކޮށް ސްކޫލްތައް ބަންދުކޮށްފައިވާއިރު އޭގެ ފަހުން ދަރިވަރުންނަށް ކިޔަވައިދީފައި ވަނީ ޓެލެ ކްލާހާއި އޮންލައިން ކްލާސްތައް މެދުވެރިިކޮށެވެ. ފަހުން ގްރޭޑް 8 އާއި 12 އާ ދެމެދުގެ ދަރިިވަރުން ސްކޫލް އަށް ނެރެ ކިޔަވައިދީފައި ވެއެވެ.
