ހައިކޯޓުން ނިއުޕޯރޓް މައްސަލަ ތާވަލުކުރީ ރައީސަށް ކުރި މެސެޖާ ގުޅިގެންނެއް ނޫން، ކަން ވީ މިހެން
ދެން އޮންނާނީ މި މައްސަލައިގެ ގޮތެއް ނިންމުމަށް ބޭއްވޭ އަޑުއެހުމެއް
ނިއުޕޯރޓް ރެސްޓޯރަންޓްސްގެ މެނޭޖިންގ ޑިރެކްޓަރަކީ ޕީޕީއެމްގެ ކުރީގެ ކައުންސިލު މެމްބަރު ޒާހިދު ރަމީޒުގެ އަނބިކަނބަލުން، ޒާހިދު ވަނީ ރައީސް ސޯލިޙަށް މެސެޖު ކުރައްވާފައި
ބްރިޖް ވިއު ޕްލެޓްފޯރމް ސަރަހައްދުގައި ސްޓްރާޑާ ކުންފުނިން ހުޅުވާފައިވާ ނިއުޕޯރޓް ވިއު ސަރުކާރާ ހަވާލުކޮށް 1.1 މިލިއަން ރުފިޔާ ދެއްކުމަށް ސިވިލް ކޯޓުން ކުރި ހުކުމް ހައިކޯޓުގައި އިސްތިއުނާފު ކޮށްފައިވާ މައްސަލައިގެ އަޑުއެހުމެއް އާދިއްތަ ދުވަހު ހައިކޯޓުގައި ތާވަލުކުރީ މައްސަލަ ހުށައެޅި ފަރާތުން ރައީސް އިބްރާޙިމް މުޙައްމަދު ސޯލިޙަށް މެސެޖު ކުރުމުން ނޫންކަން ހާމަވެއްޖެއެވެ.
ނިއުޕޯރޓް ރެސްޓޯރަންޓްސްގެ މެނޭޖިންގ ޑިރެކްޓަރަކީ ޕީޕީއެމްގެ ކުރީގެ ކައުންސިލު މެމްބަރު ޒާހިދު ރަމީޒުގެ އަނބިކަނބަލުން މަލަކާ އަބްދުލް ޙަކީމެވެ. މި މައްސަލަ ކުރިއަށް ނުދާތީއާއި، ޙައްޤުތަކަށް ދައުލަތުން އަރައިގަންނަމުންދާ ކަމަށް ބުނެ، ޒާހިދު ރަމީޒު ވަނީ ރައީސް ސޯލިޙަށް މެސެޖެއް ކޮށް، އެ މެސެޖު ޓްވިޓަރ ގައި ހިއްސާ ކޮށްފައެވެ. އެ މެސެޖުގައި ޒާހިދު ވަނީ ރައީސް ސޯލިޙު ކޯޓުތަކަށް ނުފޫޒު ފޯރުވަމުން ގެންދަވާކަމަށް ތުހުމަތު ކޮށްފައެވެ.
މި މައްސަލަ އާދިއްތަ ދުވަހު ހައިކޯޓުގައި ތާވަލު ކުރުމާއެކު، ގިނަ ބަޔަކު ދަނީ މި މައްސަލަ ތާވަލު ކޮށްފައިވަނީ ރައީސް ސޯލިޙަށް ކުރި މެސެޖުގެ ސަބަބުންކަމަށް ބުނަމުންނެވެ. އެހެން ނަމަވެސް، މި އަޑުއެހުމަކީ މާ ކުރިން ތާވަލުކޮށް، މައްސަލަ ހުށައެޅި ފަރާތާއި، ދައުލަތަށްވެސް އެކަމުގެ ޗިޓް ފޮނުވާފައިވާ މައްސަލައެއްކަން މިވަނީ ހާމަވެފައެވެ.
އާދިއްތަ ދުވަހުގެ އަޑުއެހުން ފައްޓަވަމުން މައްސަލަ ބައްލަވާ ގާޒީ ޝުއައިބް ޙުސައިން ޒަކަރިއްޔާ ވަނީ މި މައްސަލައިގެ އަޑުއެހުންތައް ކުރިއަށް ގޮސްފައިވާ ގޮތާއި ގުޅޭގޮތުން ވާހަކަ ދައްކަވާފައެވެ. އެގޮތުން މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ ނިމިދިޔަ އަހަރުގެ ޖުލައި މަހުގެ 20 ވަނަ ދުވަހުކަން ފާހަގަ ކުރައްވައި ގާޒީ ވިދާޅުވީ، އެ ދުވަހުގެ އަޑުއެހުމުގައި ދެ ފަރާތުންވެސް ތަފްސީލީ ގޮތެއްގައި މައްސަލައާ ގުޅިގެން ވާހަކަ ދައްކާފައިވާ ކަމަށެވެ.
މި މައްސަލައިގައި އޭގެ ކުރިންވެސް އަޑުއެހުންތަކެއް ބޭއްވުމަށް ތާވަލު ކުރެވުނެވެ. އެހެން ނަމަވެސް، ކޮވިޑް-19 ގެ ބަލިމަޑުކަމުގެ ސަބަބުން އޭޕްރީލް މަހު ތާވަލުކުރި 2 އަޑުއެހުންވެސް ވަނީ ކެންސަލް ކޮށްފައެވެ. އެއަށްފަހު ސްޓްރާޑާއިންވެސް މި މައްސަލައިގައި ކޯޓުން ބޭރުން ޙައްލެއް ގެނައުމަށް މަސައްކަތް ކުރަމުންދާކަމަށް ދެފަހަރެއްގެ މަތިން އަންގާފައިވެއެވެ. އަދި ޖެހިގެން އައި އޯގަސްޓު މަހުގެ 23 ވަނަ ދުވަހުވެސް އަޑުއެހުމެއް ހައިކޯޓުން ތާވަލު ކުރިއެވެެ. އެހެންނަމަވެސް، އެފަހަރުގެ އަޑުއެހުންވެސް ކެންސަލް ކޮށްފައިވަނީ ކުންފުނިން އެދިގެންކަން ގާޒީ ފާހަގަ ކުރެއްވިއެވެ.
މި މައްސަލައިގައި ކޯޓުން ބޭރުން ޙައްލެއް ގެނައުމަށް މަސައްކަތް ކުރަމުންދާކަން ބަޔާން ކުރުމަށްފަހުވެސް، ކޯޓަށް މައްސަލައިގެ ތަފްސީލެއް ނުލިބުމުން ނިމިދިޔަ ޑިސެމްބަރު މަހުގެ 27 ވަނަ ދުވަހު ކޯޓުން ވަނީ މައްސަލަ ތާވަލުކޮށް، ޗިޓު ފޮނުވާފައެވެ. އަދި ޖެހިގެން އައި ދުވަހު ކުންފުނިންވެސް ޗިޓު ޤަބޫލު ކޮށްފައިވާއިރު، އާދިއްތަ ދުވަހުގެ އަޑުއެހުމަކީ މާކުރިންވެސް ތާވަލުކޮށް، ދެ ޚަސްމުންނަށް އަންގައިގެން ބޭއްވިފައިވާ އަޑުއެހުމެއްކަން މިވަނީ ސާފު ވެފައެވެ. އެހެން ނަމަވެސް، ޒާހިދު ރައީސް ސޯލިޙަށް މެސެޖު ކުރިތާ 24 ގަޑިއިރު ނުވަނީސް ހައިކޯޓުގައި މައްސަލަ ތާވަލު ކުރިކަމަށް ބުނެ، ބައެއް އޮންލައިން ނޫސްތަކުން ވަނީ ރިޕޯޓް ކޮށްފައެވެ.
މި މައްސަލައިގައި އާދިއްތަ ދުވަހު ހައިކޯޓުގައި ކުރިއަށްދިޔަ އަޑުއެހުމުގައި ދެ ފަރާތުންވެސް ފާހަގަކުރަން ހުރި ކަންކަން ފާހަގަ ކުރުމަށް ޝަރީއަތުން ވަނީ ފުރުސަތު ދީފައެވެ. އަދި މި މައްސަލައިގައި ސާފު ކުރަންޖެހޭ އިތުރު ކަމެއް ނެތްނަމަ، ދެން އޮންނާނީ މި މައްސަލައިގެ ގޮތެއް ނިންމުމަށް ބޭއްވޭ އަޑުއެހުމެއްކަން މައްސަލަ ބައްލަވާ ގާޒީ ފާހަގަ ކުރެއްވިއެވެ.
ބްރިޖް ވިއު ޕްލެޓްފޯރމް ސަރަހައްދުގައި ސްޓްރާޑާ ކުންފުނިން ހުޅުވާފައިވާ ނިއުޕޯރޓް ވިއު ސަރުކާރާ ހަވާލުކޮށް 1.1 މިލިއަން ރުފިޔާ ހަވާލު ކުރަން ސިވިލް ކޯޓުން ޙުކުމް ކުރީ 2019 ވަނަ އަހަރުގެ ސެޕްޓެމްބަރު މަހުގެ 26 ގައެވެ.
