''ސްކިލްސް ފޯ އަ ރެޒީލިއަންޓް ވާކްފޯސް'' ޕްރޮގްރާމް ގެ ދަށުން ތަމްރީނުވާ ދަރިވަރުންނަށް ގިނަ ފުރުސަތުތަކެއް ލިބިގެންދާނެ ކަމަށް ހަޔަރ އޭޑިޔުކޭޝަން މިނިސްޓަރު ޑރ. އިބްރާހިމް ހަސަން ވިދާޅުވެއްޖެއެވެ.

ހަޔަރ އެޑިޔުކޭޝަން މިނިސްޓަރު މިހެން ވިދާޅުވީ ސްކިލްސް ފޯ އަ ރެޒީލިއަންޓް ވާކްފޯސް ދެވަނަ ބެޗް ފެށުމަށް ބޭއްވި އޮރިއެންޓޭޝަންގައި ވާހަކަ ދައްކަވަމުންނެވެ. ވަރޗުއަލްކޮށް ކުރިއަށް ގެންދިޔަ މިރަސްމިއްޔާތުގައި މިނިސްޓަރު ވިދާޅުވީ މިނިސްޓްރީއާ މޯލްޑިވްސް ޕޮލިޓެކްނިކް ގުޅިގެން ކުރިއަށް ގެންދާ މިޕްރޮގްރާމުގެ ތެރެއިން ގިނަ ކުދިންތަކަކަށް ވަޒީފާގެ ފުރުސަތުތައް ޔަގީންވެ، ގާބިލް ބަޔަކަށް ވެގެންދާނެ ކަމަށެވެ.

މިނިސްޓަރު ވިދާޅުވީ ދިވެހިންނަކީ ހުނަރުވެރި ބައެއް ކަމަށާއި، އެހުނަރުވެރިކަން އިތުރަށް ތަރައްގީކޮށް ހުރިހާ ސިނާއަތެއްގައި ވެސް ދިވެހިން މިއަދު މަސައްކަތް ކުރަންޖެހޭ ކަމަށެވެ. މިއަޒުމުގައި ފެށި ސްކިލްސް ފޯ އަ ރެޒީލިއަންޓް ވާކްފޯސްގެ ދަށުން މަގުސަދު ހާސިލްވެގެންދާނެ ކަމުގެ އުންމީދު ބޮޑު ކަމަށް މިނިސްޓަރު ވިދާޅުވިއެވެ.

ސްކިލްސް ފޯ އަ ރެޒީލިއެންޓް ވޯކްފޯސަކީ ކޮވިޑް-19އާ ގުޅިގެން އިގްތިސާދަށް ލިބިފައިވާ ގެއްލުމުން އަރައިގަތުމަށް ކުރަމުންދާ މަސައްކަތުގެ ތެރެއިން އެކި ސިނާއަތްތަކަށް ބޭނުންވާ ދިވެހީން ތަމްރީނުކުރުމަށް ފަށާފައިވާ ޕްރޮގްރާމްއެކެވެ.

މިޕްރޮގްރާމްގެ ދަށުން އަހަރަކު 1200 ދިވެހިން ތަމްރީނު ކުރުމަށް ޕޮލިޓެކްނިކްއިން ވަނީ ނިންމާފައެވެ. އެއީ ފަތުރުވެރިކަމުގެ ސިނާއަތުން 600 ޒުވާނުންނާއި، އައިސީޓީ ދާއިރާއިން 200 ޒުވާނުން އަދި އިމާރާތް ކުރުމުގެ ދާއިރާއިން 400 ޒުވާނުންނެވެ.

ޖުލައި މަހު 15 ވަނަގައި އިއުލާން ކުރި މިޕްރޮގްރާމްގެ ދަށުން ގައުމީ ސަނަދުގެ ލެވެލް 3 ގެ ފެންވަރުގެ ކޯސްތައް ހިންގުމަށް ވަނީ ހަމަޖެހިފައެވެ. އެ ޕްރޮގްރާމް ފުރިހަމަ ކުރާ ދަރިވަރުންނަށް ކިޔެވި ދާއިރާއިން ހަޔާ އެޑިއުކޭޝަނުން އިންޓާންޝިޕް ހަމަޖައްސައިދޭނެއެވެ.