ދިވެހިންގެ މުސްތަގުބަލު އުޖާލާ ކުރުމަށް އަބަދުމެ ހޭލާ ސަމާލުވެ ތިބެންޖެހޭ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
ދިވެހިންގެ ގައުމީ އެއްބައިވަންތަކަމުގެ ދުވަހުގެ މުނާސަބަތުގައި ހޮނިހިރު ދުވަހުގެރޭ ޖުމްހޫރީ މައިދާނުގައި ބޭއްްވި ޚާއްސަ ޖަލްސާގައި މިނިސްޓަރު އިމްރާން ވިދާޅުވީ ދިވެހިންގެ އެއްބައިވަންތަކަން ރޫޅާލަން ނުވަތަ ދިވެހިން ބައިބައިވެ ނަފްތަރު އުފެދިދާނެ ހުރިހާ ސިފަތަކުން ދުރުވެ ހުރިހާ ހާލަތެއްގައިމެ ވިސްނާ ފިކުރުކުރަން ޖެހޭ ކަމަށެވެ.
ދިވެހިންނަކީ އެއްބައިވަންތަ ބައެއްކަން ފާހަގަކުރައްވައި މިނިސްޓަރު އިމްރާން ވިދާޅުވީ ދިވެހިންނާއި ކުރިމަތިވާ އެންމެހައި ނުރައްކާތެރި ހާދިސާތަކާއި، ހިތްދަތިކަމާއި ދަތިކަމުން އަރައިގަނެވެނީ ދިވެހިންގެ ކިބައިގައިވާ މަތިވެރި ސިފަތަކުގެ ސަބަބުން ކަމަށެވެ. ދިވެހިންގެ ތެރޭގައިވާ އަޅާލުމާއި އެހީތެރިކަމުގެ ދީލަތި ސިފަތަކާއި، ވެރިންނަށް އަދާކުރި ކިޔަމަންތެރިކަމާއި ދެއްކި އިހުތިރާމަކީ ދިވެހިނަށް ކުރިމަތިވާ އެންމެހައި ބޮޑެތި ކާރިސާތަކުން އަރައިގަނެވޭ ސަބަބު ކަމަށް މިނިސްޓަރު ވިދާޅުވިއެވެ.
ނަމަވެސް ދިވެހިންގެ ތެރޭގައިވާ އެއްބަވަންތަކަމުގެ ގުޅުމަށް މިހާރު ގިނަ ގޮންޖެހުންތައް ކުރިމަތިވަމުންދާ ކަމަށް މިނިސްޓަރު ފާހަގަކުރެއްވިއެވެ.
މިނިސްޓަރު އިމްރާން ވިދާޅުވީ މުޖުތަމައުގައި އުފެދިގެން އަންނަ ބައެއް ކަހަލަ ސިޔާސީ ނުތަނަވަސްކަމާއި ދީނީ ގޮތުން އުފެދިގެންދާ ތަފާތު ހިޔާލުތަކާއި ފިކުރުތަކަކީ އެއްބައިވަންތަ ކަމަށް ހުރި ގޮންޖެހުންތަކެއް ކަމަށެވެ. އަދި މިފަދަ އެންމެހާއި ކަންކަމުން ދުރެވެ އަރައިގަތުމަށް ހުރިހާ ރައްޔިތުން އެކަމުގައި މަސައްކަތް ކުރުމަށް މިނިސްޓަރު އިމްރާން ގޮވާލެއްވިއެވެ.
އަޅުގަނޑުމެންގެ ތެރޭގައި އުފެދިގެން އަންނަ ބައެއް ކަހަލަ ސިޔާސީ ނުތަނަވަސްކަމާއި ދީނީ ގޮތުން އުފެދިގެންދާ ތަފާތު ހިޔާލުތަކާއި ފިކުރުތަކަށް ބޮޑެތި ކުށްތަކަށް އަރައިގަތުމާއި މިކަންކަމުގެ ސަބަބުން މުޖުމަތައުގައި އުފެދިގެންދާ ހުރިހާ ނުރައްކާތަކަކީ އަޅުގަނޑުމެންގެ އެއްބައިވަންތަ ކަމަށް ހުރި ގޮންޖެހުންތައް. މިކަންކަމުން އަރައިގަނެވޭނީ ސަރުކާރާއި ރައްޔިތުންނާއި ހުރިހާ އެންމެން އެކުގައި ގުޅިގެން ބޮޑެތި މަސައްކަތްތަކެއް ކޮށްގެން.މިނިސްޓަރު އިމްރާން އަބްދުﷲ
މިނިސްޓަރު އިމްރާން ވިދާޅުވީ ދިވެހިންގެ ހިތްތަކަކީ ހުޅުވިގެންވާ ސާފު ހިތްތަކެއް ކަމަށާއި، ދިވެހިންގެ އަތްތަކަކީ ދީލަތިކަމާއި އެހީތެރިކަމާއި މޫރިތިކަން ޖަރީވެގެންވާ އަތްތަކެއް ކަމަށެވެ. އަދި ދިވެހިންނަކީ އަޅާލުމާއި އޯގާވެރިކަމާއި ކުލުނާއި ހަމްދަރުދީވުމުގެ ފުރިހަމަ މިސާލެއް ކަމަށް މިނިސްޓަރު އިމްރާން ވިދާޅުވިއެވެ. އަދި ވިދާޅުވީ ބޮޑުކަމެއް ޖެހިގެންވާ މީހާ ގިލަންވެރިކަން ފިލުވުމަށާއި، ޒިޔާރަތް ކުރާ މެހެމާނުންނަށް ހެޔޮކޮށް ހިތުމަށް ސަފަރުވެރިންނަށް ހޭހަން ކުރުމަކީ ދިވެހިންގެ ކިބައިގައި ހަރުލާފައިވާ ރީތި އާދަތަކެއް ކަމަށެވެ.
އެހެންކަމުން ކުރިއަށް އޮތްތަނުގައި ވެސް މިރީތި އާދަތައް ދެމެހެއްޓުމަށްޓަކައި ޚާއްސަ ގޮތެއްގައި ސްކޫލުތަކާއި، ޔުނިވަރިސިޓީތަކުން މަސައްކަތްތައް ކޮށްދިނުމަށް މިނިސްޓަރު އިމްރާން ގޮވާލެއްވިއެވެ.
