އިނގިރޭސިވިލާތުން ކޮރޯނާވައިރަހުގެ އައު ސްޓްރެއިންއެއް ފެނުމާއެކު އިނގިރޭސި ޕްރިމިއާ ލީގުންވެސް އަޅާފައިވާ ފިޔަވަޅުތައް އިތުރަށް ވަރުގަދަކޮށްފިއެވެ.
އިނގިރޭސިވިލާތުން ފެނިފައިވާ ވައިރަހުގެ މި އައު ސްޓްރެއިން ކޮވިޑް-19 ވައިރަހުގެ އަސްލަށްވުރެ އަވަސް މިނުގައި އަންނަނީ ފެތުރެމުންނެވެ. އެއާއެކު އިނގިރޭސިވިލާތުގެ ސަރުކާރުންވެސް އަންނަނީ އެ ގައުމުގައި ހާއްސަ ފިޔަވަޅުތަކެއް އަޅަމުންނެވެ.
މީގެ ކުރިން ކޮވިޑް-19 ގެ ނުރައްކާ ބޮޑުވެ ދެވަނަ ފަހަރަށް އިންގްލެންޑް ލޮކްޑައުން ކުރިއިރު، އެ ލޮކްޑައުން ވަނީ މި މަހުގެ ދެވަނަ ދުވަހު ހަމަވެފައެވެ. އެއާއެކު ތިން ކެޓަގަރީއަކަށް ބަހާލައިގެން އިނގިރޭސި ސަރުކާރުން ވަނީ ދަނޑުތަކަށް ސަޕޯޓަރުން ވެއްދުމަށް ހުއްދަ ދީފައެވެ. އެކަމަކު ކޮރޯނާވައިރަހުގެ އައު ސްޓްރެއިންއެއް ފެތުރޭތީ އިނގިރޭސި ސަރުކާރުން ވަނީ ހަތަރުވަނަ ކެޓަގަރީއެއް އެކުލަވާލާފައެވެ. އެއީ ވައިރަހުގެ އައު ސްޓްރެއިން އެންމެ އާންމު ސަރަހައްދުތަކަށެވެ. އެގޮތުން މި ވަގުތަށް ބަލާއިރު އެ ސަރަހައްދުގައި ހިމެނެނީ ޕްރިމިއާ ލީގުގައި ކުޅޭ ލަންޑަނަށް ނިސްބަތްވާ ކުލަބުތަކެވެ.
މީގެ އިތުރުން ވައިރަހުގެ އައު ސްޓްރެއިންއެއް ފެތުރޭތީ އެޅި ވަރުގަދަ ފިޔަވަޅުތަކުގެ ތެރެއިން ޕްރިމިއާ ލީގުގައި ކުޅޭ ބައެއް ކުލަބުތަކުގެ ކުޅުންތެރިން ހަފުތާއަކު ދެ ފަހަރު ކޮވިޑަށް ޓެސްޓުކުރަންވެސް މިހާރު ވަނީ ނިންމާފައެވެ. މީގެ ކުރިން އެކުލަވާލާފައި އޮތް އުސޫލުގައިވާ ގޮތުން ކޮންމެ ކުލަބެއްގެވެސް ހުރިހާ ކުޅުންތެރިންނާއި އޮފިޝަލުން ހަފުތާއަކު އެއް ފަހަރު ކޮވިޑަށް ޓެސްޓްކުރާނެއެވެ. އަދި ޔޫރަޕުގައި ކުޅޭ ޓީމުތަކުން އެ މުބާރާތުގެ މެޗުތަކުގެ ކުރިން ޓެސްޓުކުރާނެއެވެ.
ހާއްސަ އުސޫލުތަކެއްގެ ދަށުން ޕްރިމިއާ ލީގުގެ ކުޅުން ކުރިއަށްދާއިރު، މިހާތަނަށް ކޮވިޑް-19 އާ ގުޅިގެން ޕްރިމިއާ ލީގުން ފަސްކޮށްފައިވަނީ އެންމެ މެޗެކެވެ. އެއީ މި މަހުގެ ހަތަރުވަނަ ދުވަހު އެސްޓަން ވިލާ އާއި ނިއުކާސަލް ޔުނައިޓެޑް ބައްދަލުކުރަން އޮތް މެޗެވެ. އެ މެޗު ފަސްކުރީ ނިއުކާސަލްގެ ފަސް ކުޅުންތެރިއަކާއި އެ ޓީމުގެ ދެ އޮފިޝަލަކު ކޮވިޑް-19 އަށް ޕޮޒިޓިވްވުމާ ގުޅިގެންނެވެ.
