އިތުރު 23 މީހަކު ކޮވިޑަށް ޕޮޒިޓިވް، މާލެ ސަރަހައްދުން ޕޮޒިޓިވްވީ 14 މީހަކު
22 ޑިސެމްބަރު 2020 | އަންގާރަ 17:37ރިސޯޓުތަކުން ހަތް މީހަކު އަދި އަތޮޅުތެރޭގެ ރަށަކުން ދެ މީހަކު ޕޮޒިޓިވް ވެފައިވޭ
މާލޭގެ މަޖީދީމަގުގައި މީހުން ހޭލަމޭލަވަނިކޮށް: ބަލި ފެތުރޭ މިންވަރު މަދުވުމާ ގުޅިގެން އަޅާފައިވާ ފިޔަވަޅުތަކަށް ދަނީ ބޮޑެތި ލުއިތަކެއް ދެމުން
އިތުރު 23 މީހަކު ކޮވިޑް-19 އަށް ޕޮޒިޓިވްވެ، 31 މީހަކު ބަލިން ރަނގަޅުވެއްޖެއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނީ ހޯމަ ދުވަހުގެ އިރުއޮއްސި 6:00 ން އަންގާރަ ދުވަހުގެ އިރުއޮއްސި 6:00 ށް 2،404 ސާމްޕަލެއް ނަގާފައިވާ ކަމަށެވެ. އޭގެ ތެރެއިން ޕޮޒިޓިވް ވެފައިވަނީ 23 މީހަކު ކަމަށްވެސް ވަނީ ބުނެފައެވެ.
އެއީ މާލެ ސަރަހައްދުން 14 މީހަކާއި، ރިސޯޓުތަކުން ހަތް މީހަކު އަދި އަތޮޅުތެރޭގެ ރަށަކުން ދެ މީހަކު ކަމަށްވެސް އެޗްޕީއޭއިން ވަނީ ބުނެފައެވެ.
އެޗްޕީއޭއިން ބުނީ 41 މީހަކަށް މިހާރު ހޮސްޕިޓަލުގައި ފަރުވާ ދެމުންދާ ކަމަށާއި، މި ވަގުތަށް ރާއްޖޭގައި 509 އެކްޓިވް ކޭސް ހިމެނޭ ކަމަށެވެ.
ކޮވިޑް-19 އަށް ރާއްޖެއިން މިހާތަނަށް ޖުމްލަ 13،524 މީހަކު ޕޮޒިޓިވް ވެފައިވާއިރު، 12،960 މީހުން ވަނީ ބަލިން ރަނގަޅުވެފައެވެ. އަދި މިހާތަނަށް ބަލީގައި 41 މީހަކު ވަނީ ނިޔާވެފައެވެ.
ކޮވިޑް-19 ގެ ކޭސްތައް މަދުވުމާއި ގުޅިގެން ރައްކާތެރިވުމަށް އަޅާފައިވާ ފިޔަވަޅުތަކަށް ސަރުކާރުން އަންނަނީ ބޮޑެތި ލުއިތަކެއް ދެމުންނެއެވެ. ނަމަވެސް ބަލި ކުއްލިއަކަށް ފެތުރިގެން ހިނގައިދާނެކަމުގެ ބިރު އޮތުމާއެކު ލުއިތައް ދިން ނަމަވެސް، އެކުލަވާލާފައިވާ އުސޫލުތަކާ އެއްގޮތަށް އަމަލުކުރުމަށާއި، ހާއްސަކޮށް މާސްކް އެޅުމާއި، އިޖުތިމާއީ ގައިދުރުކަމަށް ހާއްސަ ސަމާލުކަމެއް ދިނުމަށް ހެލްތު އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) ން ވަނީ އިލްތިމާސްކޮށްފައެވެ.
