އިނގިރޭސި ޕްރިމިއާ ލީގުގައި އާދީއްތަ ދުވަހުގެރޭ ލީޑްސް ޔުނައިޓެޑް ބަލިކޮށް ތާވަލުގެ ތިންވަނައަށް މެންޗެސްޓާ ޔުނައިޓެޑް ޖެހިލައިފިއެވެ.

އަމިއްލަ ދަނޑުގައި ކުޅުނު މެޗުން ޔުނައިޓެޑް މޮޅުވީ 6-2 ގެ ތަފާތު ބޮޑު ނަތީޖާއަކުންނެވެ.

މި މެޗުގައި ޔުނައިޓެޑުން މޮޅު ކުޅުމެއް ދެއްކިއިރު، މެޗުގެ ފުރަތަމަ ހާފުގައި އެ ޓީމުން ވަނީ ހަތަރު ލަނޑު ޖަހާފައެވެ. އެގޮތުން މެޗު ފަށައިގެން ތިން މިނެޓު ތެރޭ ޔުނައިޓެޑުގެ ސްކޮޓް މެކްޓޮމިނޭ ވަނީ އެ ޓީމަށް ދެ ލަނޑު ޖަހައިދީފައެވެ. އަދި އޭގެ ފަހުން މެޗުގެ 20 ވަނަ މިނެޓުގައި ބްރޫނޯ ފެނާންޑޭސް ޔުނައިޓެޑުގެ ތިންވަނަ ލަނޑު ޖެހިއިރު، މެޗުގެ 37 ވަނަ މިނެޓުގައި ޔުނައިޓެޑުގެ ހަތަރުވަނަ ލަނޑު ޖަހައިދިނީ ވިކްޓަ ލިންޑެލޯފެވެ. އެކަމަކު ފުރަތަމަ ހާފު ނިމެން ހަތަރު މިނެޓަށް ވެފައި ވަނިކޮށް ލީޑްސްގެ ލިއަމް ކޫޕާ ވަނީ އެ ޓީމަށް ލަނޑެއް ޖަހައިދީފައެވެ.

މެޗުގެ ދެވަނަ ހާފުގައިވެސް ޔުނައިޓެޑުން މޮޅު ކުޅުމެއް ދެއްކިއިރު، މެޗުގެ 66 ވަނަ މިނެޓުގައި ޑެނިއެލް ޖޭމްސް ވަނީ އެ ޓީމުގެ ފަސްވަނަ ލަނޑު ޖަހާފައެވެ. އަދި މެޗުގެ 70 ވަނަ މިނެޓުގައި ލިބުނު ޕެނަލްޓީއަކުން ފެނާންޑޭސް ވަނީ ޔުނައިޓެޑުގެ ހަވަނަ ލަނޑު ޖަހައިދީފައެވެ. މި މެޗުގައި ލީޑްސްއިން ޖެހި ދެވަނަ ލަނޑު މެޗުގެ 73 ވަނަ މިނެޓުގައި އެ ޓީމަށް ކާމިޔާބުކޮށްދިނީ ސްޓުއާޓް ޑަލަސްއެވެ.

މި މޮޅާއެކު ތާވަލުގެ ތިންވަނައަށް ޔުނައިޓެޑް ޖެހިލީ ކުޅުނު 13 މެޗުން ލިބުނު 26 ޕޮއިންޓާއެކުއެވެ. ޔުނައިޓެޑް އަތުން ބަލިވި ލީޑްސް އޮތީ ތާވަލުގެ 14 ވަނައިގައި 14 މެޗުން 17 ޕޮއިންޓާއެކުއެވެ.

މީގެ އިތުރުން ޕްރިމިއާ ލީގުގެ ދެވަނައަށް ލެސްޓާ ސިޓީ ޖެހިލީ އާދީއްތަ ދުވަހުގެރޭ ރަށުން ބޭރުގައި ޓޮޓެންހަމް ހޮޓްސްޕާ އަތުން 2-0 ން މޮޅުވެގެންނެވެ.

މި މެޗުގައި ލެސްޓާއިން ލީޑު ނަގާފައިވަނީ ފުރަތަމަ ހާފުގެ އިތުރު ވަގުތުގައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ޖެމީ ވާޑީއެވެ. މިއީ އޭރިއޭ ތެރެއިން ލެސްޓާގެ ވެސްލީ ފޮފާނާއަށް ޓޮޓެންހަމުގެ ސާޖް އޯރިއޭ ކުރި ފައުލަކަށް ރެފުރީ ދިން ޕެނަލްޓީއެކެވެ. އަދި ދެވަނަ ހާފު ފަށައިގެން ތިންވަނަ މިނެޓުގައި ލެސްޓާގެ ޖޭމްސް މެޑިސަން ލަނޑެއް ޖަހައިދިން ނަމަވެސް، އޭނާ އޮފްސައިޑުގައި ހުރުމުން ވީޑިއޯ އެސިސްޓަންޓް ރެފުރީ (ވީއޭއާރް) އިން އެ ލަނޑު ބަލައިގެންފައެއް ނުވެއެވެ. އެކަމަކު މެޗުގެ 59 ވަނަ މިނެޓުގައި ލެސްޓާ އިން ވަނީ ލީޑު ފުޅާކޮށްފައެވެ. މި ލަނޑަކީ ޓޮޓެންހަމުގެ ޓޮބީ އަލްޑާވެއިލްޑް އަތުން ބައިކޮޅަށް ވަން ލަނޑެކެވެ.

މި މޮޅާއެކު ލެސްޓާ ދެވަނައަށް ޖެހިލީ ކުޅުނު 14 މެޗުން ލިބުނު 27 ޕޮއިންޓާއެކުއެވެ. އެއްވަނައިގައި އޮތް އެންމެ ފަހުގެ ޗެމްޕިއަން ލިވަޕޫލަށް 14 މެޗުން 31 ޕޮއިންޓް ލިބިފައިވާއިރު، މީގެ ކުރިން އެއްވަނައިގައި އޮތް ޓޮޓެންހަމް މިހާރު އޮތީ ތާވަލުގެ ފަސްވަނައިގައި 14 މެޗުން 25 ޕޮއިންޓާއެކުއެވެ.