ސޮސިއެޑާޑް ބަލިކޮށް ބާސާ ކުރިއަށް

ފަހަތުން އަރައި ރެއާލް ސޮސިއެޑާޑް ބަލިކޮށް ސްޕެނިޝް ލީގުގެ ފަސްވަނައަށް ބާސެލޯނާ ޖެހިލައިފިއެވެ.

އަމިއްލަ ދަނޑުގައި ބުދަ ދުވަހުގެރޭ ކުޅުނު މެޗުން ބާސާ މޮޅުވީ ފަހަތުން އަރައި 2-1 ގެ ނަތީޖާއަކުންނެވެ.

މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ މި ސީޒަނުގައި މޮޅު ކުޅުމެއް ދައްކަމުން އަންނަ ސޮސިއެޑާޑުންނެވެ. މެޗުގެ 27 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ފޯވާޑް ވިލިއަން ހޯސޭއެވެ. އެކަމަކު އޭގެ ހަތަރު މިނެޓު ފަހުން ޑިފެންޑަރު ޖޯޑީ އަލްބާ ވަނީ ލަނޑެއް ޖަހާ ބާސާއަށް މި މެޗުގައި ނަތީޖާ އެއްވަރުކޮށްދީފައެވެ.

ދެ ޓީމުގެ ފަރާތުންވެސް ގިނަ ހަމަލާތަކެއް ފެނިގެންދިޔަ މި މެޗުގައި ބާސާއިން ލީޑު ނަގާފައިވަނީ ފުރަތަމަ ހާފު ނިމެން ދެ މިނެޓަށް ވެފައި ވަނިކޮށެވެ. މި ލަނޑު އެ ޓީމަށް ކާމިޔާބުކޮށްދިނީ ޒުވާން މިޑްފީލްޑަރު ފްރެންކީ ޑި ޔޮންއެވެ.

މި މޮޅާއެކު ތާވަލުގެ ފަސްވަނައަށް ބާސާ ޖެހިލީ 12 މެޗުން 20 ޕޮއިންޓް ހަމަކޮށްގެންނެވެ. އަދި މި މެޗުން ބަލިވުމުން ސޮސިއެޑާޑަށް އެއްވަނަ ގެއްލުނުއިރު، މި ވަގުތު އެ ޓީމު އޮތީ 14 މެޗުން 26 ޕޮއިންޓާއެކު ދެވަނައިގައެވެ. ތާވަލުގެ އެއްވަނައިގައި އޮތީ 11 މެޗުން 26 ޕޮއިންޓާއެކު ލަނޑުގެ ތަފާތުން އެތުލެޓިކޯ މެޑްރިޑެވެ. އަދި 13 މެޗުން އެ އަދަދަށް ޕޮއިންޓް ހަމަކޮށްގެން ލަނޑުގެ ތަފާތުން ތިންވަނައިގައި އޮތީ އެންމެ ފަހުގެ ޗެމްޕިއަން ރެއާލް މެޑްރިޑެވެ.